1. Ke ku na akontisi si no “ciga pertu di Deus”?

JEOVA ama kilis ku ta sirbil. Si bu adora Jeova, bu pudi tene si benson aos i na futuru. Biblia fala: “Bo ciga pertu di Deus; i ta ciga pa bos.” — Tiagu 4:8.

2. Kuma ki no pudi pertusi di Deus, i kuma ki kila pudi afeta no orason?

² Pa bu pertusi di Deus, bu dibi di aplika si Palabra. Ora ki bu fasi orason di akordu ku si vontadi, Jeova na obiu i na ruspundi bu orason. Apostulu Jon skirbi asin: “Es i fiansa ku no ten nel, kuma, si no pidi un kusa na si vontadi, i na obinu. Si no sibi kuma i obinu na tudu ku no pidil, no ta sibi tambi kuma no risibi kil ku no pidil.” — 1 Jon 5:​14, 15.

3-7. Kuma ki no pudi tene jiresa di Deus, i kuma ki kila pudi judanu?

³ Alen di kila, asin ku bu na pertusi di Deus i na dau jiresa ki pirsis pa bu lida ku asuntus di vida. Biblia fala: “Si un di bos ka sibi ke ki dibi di fasi, pa i pidi Deus jiresa.” — Tiagu 1:5.

⁴ Kuma ki jiresa ku Deus ta da pudi judau? Pa un ladu, i pudi judau sibi kusas ku Jeova ka gosta del. Tambi, bu pudi sibi pabia di ke ku manda es kusas i eradu i ke ki bu pudi fasi pa ivita elis. Es kuñisimentu pudi tajau di manga di purbulemas ku ta kansa manga di jintis. Pur isemplu, Deus fala pa sedu limpu na asuntu seksual. Si bu obdisi es konsiju i pudi tajau di preña sin misti, di paña duensa ku ta kamba na ora di ten i di purbulemas na kasamenti.

⁵ Ke ku jiresa ku Deus ta da pudi judau nel mas? I pudi judau ciu na bu vida. I pudi judau na toma bon disison na asuntus pratikus, suma kuma ki bu pudi kontrola bu diñeru. Bu na sibi buska kusas ki na bardadi bali pena, i nega kilis ku ka ten balur o se balur i kurtu.

⁶ Jiresa di Deus pudi judau tambi na bu relason ku utrus. I pudi judau tene un familia filis. Bu na pudi tene bon amisadi ku utrus, i bu pudi tene rispitu, mesmu dianti di kilis ku ka ta sirbi Deus.

⁷ Inda mas, jiresa ku Deus ta da pudi omenta bu manera di oja vida. I pudi judau na lida ku difikuldadis o purbulemas. Tambi kila pudi judau na oja futuru ku kontentamentu. Asin, bu sintidu na susega i bu na tene bon saudi. — Ditus 14:30; Isaias 48:17.

8. Ke ki bu ka na medi si kontra bu na sirbi Deus?

⁸ Si bu sirbi Deus di bardadi bu na sta livri di medu ku ta kansa kilis ku ka ta sirbil. Suma bu sibi kuma mortus ka tene vida, bu ka na tene medu delis. I suma bu fia na promesa ki Deus fasi di bin lantanda jintis ku muri, bu ka na tene medu di mortu. I un bias ki  bu sibi kuma Deus i Tudu Puderosu, bu ka na tene medu di jambakus o futserus. — Jon 8:32.

9-11. Kal jintis ku na bin vivi na Paraisu, i ba kin ku ka na vivi la?

⁹ Si bu pertusi di Deus, bu ka na tene medu di futuru. Manga di anus atras, Biblia falaba ja di tudu es purbulemas ki ten aos na tera. Jeova falanu ki es kusas na pasa; nin i ka na tarda, Renu di Deus na torna es tera na un Paraisu. — Lukas 21:​10, 11, 31; 23:43.

¹⁰ So kilis ku pertusi di Jeova i fasi ke ki i manda ku na bin vivi na Paraisu. Biblia fala: “Dipus di puku tempu, jintis mau na disparsi; si bu buska elis, bu na oja se kau sin ningin. Ma jintis mansu na yarda tera e na kontenti ku garan­di pas.” — Salmu 37:10, 11.

¹¹ Kilis ku risu kabesa, ku ta nega obdisi leis di Deus na bin pirdi se vida. (2 Tesalonisensis 1:8, 9) E ka na izisti mas. Juntu ku Satanas, dimonius o irans e na kabadu kel un bias pa sempri. (Apokalipsi 20:10, 14) I kilis ku aprindi aserka di Jeova i e fasi ke ki i manda, e na bin vivi na Paraisu na tera ku manga di pas.

12. Ke ki Biblia fala aserka di futuru?

¹² Jeova tene manga di bon kusas pa kilis ki gosta del! Jubi so ke ki si Palabra fala aserka di vida na Paraisu li na tera:

• Manga di kusas di kume: “[I na bin] ten manga di trigu [o kumida] na tera riba di kabesa di montis.” — Salmu 72:16.

• Bon kasas: “E na kumpu kasas, e mora nel.” — Isaias 65:21.

• Bon tarbaju: “Kilis ku N kuji, e na goza rusultadu di tarbaju di se mon te na se bejisa. E ka na tarbaja amonton.” — Isaias 65:22, 23.

• Duensas ka na ten: “Nin un algin . . . ka na fala kuma i sta duenti.” — Isaias 33:24.

• I ka na ten difisiensia: “Na ki tempu ujus di segu na yabridu; orejas di surdu na disintupidu. Manku na jukuta suma gazela; lingua di mudu na kanta.” — Isaias 35:5, 6.

• I ka na ten dur, tristesa, mortu: “[Deus] na limpa tudu larma na se uju. Mortu ka na ten mas, nin tristesa, nin cur, nin dur, pabia purmeru kusas pasa ja.” — Apokalipsi 21:4.

• Gera ka na ten: “[Deus na] para gera na tudu ladu di mundu.” — Salmu 46:9.

• Vida pa tudu tempu: “Justus na yarda ki tera, e na mora nel pa sempri.” — Salmu 37:29.

13. Kin so ku pudi pui pa es tera sedu Paraisu, i pabia di ke?

¹³ Nin un pekadur ka pudi fasi es kusas. Ma Jeova tene puder di fasi tudu ke ki i purmiti. Nada ka pudi tujil fasi ke ki i misti. Biblia fala: “I ka ten nada ku Deus ka pudi fasi.” — Lukas 1:37.

14. Kuma ki bu pudi pega na kamiñu ki na leba pa vida ku ka ta kaba?

¹⁴ Jeova sta na usa si Tustumuñas pa da tudu jintis opurtunidadi di “yentra na porton pikininu” i pega na kamiñu ki na leba pa vida ku ka ta kaba. No misti pa bu fasi parti di jintis filis ki seta es konviti. Pa bu pratika riliẑion di bardadi i goza di benson di Jeova pa tudu tempu! — Mateus 7:13, 14.