1. Kal ki alguns di riliẑions ku ta pratikadu na Afrika?

NA Afrika kuas tudu jintis sta di akordu ki i importanti adora Deus. Ma, i ten puku jintis ku ta konkorda na manera ki i dibi adoradu. Alguns ta adora na miskita, utrus ta bai baloba. Utrus ta bai igreẑa. Ma i na sedu eradu pensa kuma i ten so tris riliẑions na Afrika. Entri Musulmanus i ten diferenti leis ku krensas. Riliẑions tradisional ta diferenti di un lugar pa utru. Entri kilis ku ta comadu igreẑas Kriston, ate mesmu i ta ocadu falta di union. Alen di kilis ki prinsipal, na Afrika ntidu i ten manga di utrus igreẑas diferenti.

2. (a) Pa kustumi, kuma ku jintis ta kuji se riliẑion? (b) Ke ku ka ta mostra kuma no riliẑion ta kontenta Deus?

² Pabia di ke ku manda jintis ta adora di se manera? Maioria di jintis ta seta riliẑion di se papes. Kusas ki pasa manga di tempus atras ta nfluensia pratikas di riliẑions di jintis aos. Livru ku ta comadu The Africans​—⁠A Triple Heritage (Afrikanus — Tris eransa) fala: “Riliẑion Musulmanu spaja na parti norti di disertu di Sara atraves di konkista, . . . Di mesmu manera, Kristianismu spaja na parti sul di disertu di Sara. Si na parti norti di  disertu di Sara riliẑion Musulmanu spaja atraves di spada, na parti sul di disertu di Sara Kristianismu spaja atraves di arma.” Mesmu asin, maioria di nos ta fia di ki no riliẑion ta kontenta Deus. Un riliẑion ka ta julgadu di kuma i sta sertu so pabia di kuma no papes ta pratikal o un forsa stranjeru pul aforsa pa no donas.

3-5. Kal isemplu ki ta mostranu kuma i ka tudu riliẑions ku ta sina bardadi?

³ Enkuantu tudu riliẑions ta fala ki e ta da orientason aserka di sirbi Deus, se ideias i diferenti. E ta sina manga di kusas diferenti aserka di kuma ku Deus sedu i ke ki i misti di nos. Pensa nes: Imaẑina di kuma bu oca un tarbaju na un loja. Na purmeru dia di tarbaju bu obi kuma patron bai bias. Bu punta tris tarbajaduris ke ki bu dibi di fasi. Purmeru­ tarbajadur falau kuma, patron misti pa bu limpa con. Sugundu falau, bu dibi di pinta loja. Turseru falau, bu dibi di leba kartas.

⁴ Dipus, bu punta tarbajaduris kuma ku patron sedu. Purmeru fala kuma, patron kumpridu, joven i ka ta trata jintis diritu. Sugundu fala, i kurtu, beju, i bon. Turseru fala, patron i ka omi, ma i minjer. Talves, bu pudi ciga na konkluson di kuma i ka elis tudu ku sta na konta bardadi. Si bu misti fika na bu tarbaju, talves bu na buska sibi kin ki patron i ke ki i misti pa bu fasi.

⁵ I mesmu kusa ku riliẑion. Pabia di manga di ideias aserka di kuma ku Deus sedu i ke ki i misti di nos, no pirsisa di tene sertesa ki no adorason sta di akordu ku bardadi. Ma kuma ku no pudi aprindi bardadi aserka di Deus?