“Bo ten tempu di sedu ja pursoris”. (Eb 5:12) Imaẑina so! Jeova, ku sedu minjor Instrutor di universu, sta na kumbidanu pa no nsina utrus aserka del! Tudu disignason pa nsina bardadi aserka di Jeova, na familia, na kongregason o na ministeriu i un garandi privileẑiu ku responsabilidadi. Kuma ku no pudi sai ben?

Resposta pudi ojadu na palabras ku apostulu Paulu skirbi pa Timótiu: “Pega tesu na lei Skritura dianti di jinti, bu konsija, bu nsina.” I fala mas: “Si bu na fasi asin, bu ta salba bu kabesa, ku kilis ku na obiu.” (1 Tim 4:13, 16) Bu tene un mensaẑen ku ta salva vida pa prega. E ku manda i importanti pa bu minjoria bu leitura ku nsinu. Es broŝura fasidu pa judau fasi kila. Izamina alguns karakteristikas des broŝura.

I ka ten nin un utru algin ku ta nsina suma Jeova. (Jo 36:22) Embora es broŝura na judau minjoria bu abilidadis suma leitor i instrutor, ka bu diskisi nunka di kuma i Jeova ki fonti di no mensaẑen, i, i el ku ta tisi jintis pa rel. (Jon 6:44) Nton, ora sempri pa tene spiritu santu. Usa sempri Palabra di Deus. Fasi pa jintis oja kuma, i Jeova ku sta na nsina elis, ma ka bu nsina nunka bu ideias. Sforsa pa fortalisi amor pa Jeova na korson kilis ku na sukutau.

Bu kumbidadu pa nsina jintis mensaẑen mas importanti. No konfia di kuma si bu dipindi di ‘forsa ku Deus da’, bu na sai ben — 1 Ped 4:11.

Bu kumpañeris instrutoris,

Korpu Guvernanti di Tustumuñas di Jeova