Imaẑina es sena: Karla ciga na kau di festa, des minutu dipus, i obi si tras, vos di algin ki kunsi ku falal:

Karla vira i oja kuma i si amiga Jesika ku pega dus garafa. I ka pirsis pa algin kontal kuma i serveẑa. I da Karla un son dipus i falal: “Sera ki abo i mininu pa ka divirti?”

Karla misti nega, ma Jesika i si amiga. I Karla ka misti fasi si amiga fika mal. Alen di kila, Jesika i un bajuda koretu. I si i sta na bibi, nton i ka ten nada di mal. Karla kumsa na pensa, ‘i so bibida, i ka droga.’

Si bu staba na situason di Karla, ke ku bu na fasiba?

Pa toma un bon disison nes tipu di situason, bu pirsisa di tene un identidadi. Un identidadi i un kusa dentru di bo ku ta kontau kin ki bu sedu i ke ki di valor pa bo. Ora ku bu sibi es, bu na tene forsa di kontrola bu vida, en ves di disa utrus kontrolal. — 1 Koríntius 9:26, 27.

Kuma ku bu pudi disenvolvi es tipu di forsa? Ruspundi es purguntas ku sta bas na judau sibi kila.

Si bu kunsi bu kapasidadi ku bu bon kualidadis, kila na omenta bu konfiansa.

IZEMPLU BIBLIKU: Apostulu Paulu fala: “Nin ku N ka sedu garandi papiadur, ma N ten kunsimentu”. (2 Koríntius 11:6) Suma Paulu teneba bon kuñisimentu di Skrituras, kila judal manti firmi oca utrus na fala mal del. I ka disa pa se kombersas negativu nfrakisi si konfiansa. — 2 Koríntius 10:10; 11:5.

IZAMINA BU KABESA: Skirbi bas kal ki talentu ku abilidadi ku bu tene.

Gosi skirbi kal ki bu kualidadi prinsipal. (Pur izemplu, sera ki bu ta preokupa ku utrus? abo i algin ẑenerosu? fiel? pontual?)

Suma ku bagabaga pudi dana firkijas di un kasa tok i batil, asin tambi ku bu identidadi pudi dana si bu disa bu frakesas kontrola bu vida.

IZEMPLU BIBLIKU: Paulu kunsiba si frakesas. I fala: “Dentru di mi N gosta di lei di Deus, ma N oja na ña kurpu utru koldadi lei ku na geria kontra lei ku N seta; i na leban pa katiberasku di lei di pekadu ku sta na ña kurpu.” — Romanus 7:22, 23.

IZAMINA BU KABESA: Kal frakesa ku bu pirsisa di sibi kontrola?

Sera ki bu na entra na un taksi bu pidi kondutor pa i bata vira-vira ku bo tok kombustivel kaba na karu? Si bu fasi kila, i ka na sedu so tulesa ma tambi i na kustau ciu!

Kal ki lison? Objetivus ta orienta vida, tambi i ta ivitau di vira-vira na un kau. Bu ta sibi nunde ku bu na bai ku planu di ciga la.

IZEMPLU BIBLIKU: Paulu fala: “E ku manda ami N ta kuri ku uju na meta”. (1 Koríntius 9:26) Paulu ka ta sintaba so i na pera pa kusas akontisi, ma i ta stabilisi meta di ke ki misti yangasa, tambi i ta vivi di akordu ku es meta. — Filipensis 3:12-14.

IZAMINA BU KABESA: Skirbi bas tris objetivu ku bu misti yangasa dentru di un anu.

Sin konviksons, bu ka na pudi toma disisons. Bu na parsi ku kamalion, i bu na ba ta muda di kor pa parsi ku bu kolegas. Es i sinal di kuma bu ka tene bu propi identidadi.

Ma, ora ku bu asons basia na bu konviksons, kila ta judau manti bu identidadi, i ka mporta ke ku utrus na fasi.

IZEMPLU BIBLIKU: Apesar di kuma profeta Daniel seduba joven i tambi i na vivi lunju di si familia, i “pui na si sintidu” di kuma i na obdisi lei di Deus. (Daniel 1:8) Atraves di fasi es, i manti si identidadi. Daniel vivi di akordu ku si konviksons.

IZAMINA BU KABESA: Kal ki bu konviksons? Pur izemplu: Bu fia na Deus? Si bu fia, pabia ku bu fia? Kal provas ku ta konvensiu kuma Deus izisti?

Sera ki bu fia di kuma normas di moral di Deus i pa bu propiu benefisiu? Si bu fia, pabia ku bu fia?

Pa fin, ke ki bu misti parsi kel, un paja ku bentu ta leba pa tudu ladu o bu misti parsi ku arvuri ku ta manti firmi mesmu dianti di turbadas garandi? Fortalisi bu identidadi, i bu na sedu suma ki arvuri. I kila na judau ruspundi purgunta, Kin ku N sedu?