PURGUNTA 3
Kuma ku N pudi papia diritu ku ña papes?
KE KU BU NA FASIBA?
Imaẑina es sena: I noiti di kuarta-fera. Jorẑi di 17 anu di idadi, kumsa kaba nan di fasi tarbaju di kasa i bin pa diskansa un bokadu! I liga televison, dipus i larga kurpu na sofa pa diskansa.
Na ki mumentu si pape entra, i ka sta kontenti.
“Jorẑi! Ke ku manda bu sinta bu na jubi televison, bu ka na bai juda bu ermonsiñu ku si tpc? Nunka bu ka ta fasi ke ku bu faladu pa fasi!”
Jorẑi na n̈unin̈uni: “Ami N kansa.”
Si pape falal: “Ke ku bu fala?”
Jorẑi ruspundil: “N ka fala nada, papa.”
Pape paña raiba mal, i falal: “Ami ku bu na papia kel sin, bu pensa ami i bu kolega!”
Si bu seduba Jorẑi, ke ku bu na fasiba pa ka es situason akontisi?
PENSA UN BOKADU!
Kombersa ku bu papes i suma kurinti karu. Si pedras sta na kamiñu, bu na buska utru kamiñu.
PUR IZEMPLU:
Un bajuda comadu Leia fala sin: “Utru ora N ta papia ku ña pape, ma dipus i ta falan: ‘Diskulpa, bu staba na papia ku mi?’”
LEIA TENE PELU MENUS TRIS OPSON.
-
Grita si pape.
Leia papia ku raiba: “Papa es i importanti! Sukutan!”
-
Ka fala si pape nada.
Leia para papia ku si pape aserka di si purblemas.
-
Ranja bon mumentu pa papia mas ku si pape aserka di ki asuntu.
Mas tardi Leia papia ku si pape, o i skirbil karta pa splika si purblema.
Kal opson ku bu na nsentiva Leia pa i kuji?
PENSA NES: Pape di Leia staba distraidu, i pabia di kila ki ka prestal atenson. Asin si Leia kuji opson A, si pape talves ka na ntindi pabia ki paña raiba. Es opson talves ka na fasi pa pape di Leia prestal mas atenson, tambi i ka na sedu di rispitu ku onra pa rel. (Efésius 6:2) Na bardadi, es opson ka na benefisia ningin.
Suma ku bu pirsisa di buska utru kamiñu pa ciga bu distinu, asin tambi ku bu pudi oja manera di kombersa ku bu papes
Opson B pudi sedu via mas fasil, ma i ka minjor. Pabia? Pabia si Leia misti sai ben susedidu na lida ku si purblemas i pirsisa di papia ku si pape — i si i misti pa si pape judal, pape pirsisa di sibi ke ku sta na pasa na si vida. Asin, opson di ka papia nada ku si pape ka na lebal nin un kau.
Ma ku opson C, Leia ka na pirmiti pa barera tujil di papia ku si pape. Pa kontrariu, i na tenta papia ku si pape na utru mumentu. I si kuji skirbi si pape un karta Leia pudi sinti logu minjor.
Skirbi karta talves pudi judal tambi spresa diritu ke ki misti fala. Ora ku si pape lei karta i na sibi ke ku Leia mistiba kontal, kusa ku pudi judal ntindi diritu purblema di Leia. Asin opson C, na benefisia tantu Leia suma si pape. I ka mporta, si kontra i papia ku si pape kara-a-kara o i skirbil karta, es opson ta bai di akordu ku konsiju di Biblia ku fala pa “ba ta sigi kusa ku ta tisi pas”. — Romanus 14:19.
Kal utru opsons ku Leia pudi tene?
Jubi si bu pudi pensa na un son. Dipus pensa nunde ku talves es opson pudi lebau.
TOMA KUIDADU KU BU PALABRAS
Lembra kuma, ke ku bu ta fala ku kuma ku bu papes na ntindil pudi sedu diferenti.
PUR IZEMPLU:
Bu papes puntau ke ku manda bu sta tristi. Bu fala elis: “N ka misti papia des.”
Ma bu papes ntindi kuma bu sta na fala: “N ka konfia na bos pa konta bos ña sigridu. N na papia ku ña amigus aserka di ña purblema, i ka ku bos.”
Imaẑina kuma bu sta na pasa un purblema difisil i bu papes misti judau. Ma bu fala: “Ka bo preokupa N pudi rosolvil.”
-
Kuma ku bu papes pudi ntindil?
-
Kal ku pudi sedu bu minjor resposta?
No pensa kuma bu na gosta des tambi
JOVENS TA PUNTA
Kuma ku N pudi da ben ku ña pape i ku ña mame?
Diskubri sinku kusas ku pudi judau kaba ku alguns purblemas i sibi lida ku utrus ku bu ka pudi kaba kel.
JOVENS TA PUNTA
Sera ki ami, i un algin responsavel?
Alguns jovens ta dadu mas liberdadi di ki utrus. Pabia ki sedu asin?
