Imaẑina es sena: Tinu kebra vidru di karu oca i na juga bola ku si amigus.

Si bu seduba Tinu, ke ku bu na fasiba?

BU TENE TRIS OPSON:

1. Kuri.

2. Fala kuma i utru algin.

3. Konta kuma i abo, i oferesi pa paga ke ku bu dana.

Talves bu pudi sedu tentadu pa kuji opson A. Ma sempri i ten bon motivus pa bu rukuñisi bu erus, i ka mporta si vidru di karu ku kebradu o i utru kusa.

1. I kusa bon di fasi.

   Biblia fala sin: “No misti fasi sempri kil ki diritu.” — Ebreus 13:18.

2. Jintis ta sta mas nklinadu pa purda kilis ku ta rukuñisi se erus.

   Biblia fala sin: “Kil ku sukundi si pekadus nunka i ka na bai dianti, ma kil ku konfesa, i disa, i ta yangasa miserikordia.” — Ditus 28:13.

3. Mas importanti, i ta kontenta Deus.

   Biblia fala asin aserka di Jeova: “Bu ta kontenti ku bardadi na korson”. — Salmu 51:6.

Un bajuda di 20 anu comadu Karina multadu pabia di kurinti karu ku vulusidadi. I sugundi si pape kila. Ma i ka pudiba kontinua sugundil. Karina fala, “un anu dipus ña pape sibi di ki multa. I kila tisin mas purblema!”

Kal ki lison? Karina fala: “Si bu sugundi bu erus bu na piora so kusas. Mas tardi, bu na pagal!”

Biblia fala sin: “Anos tudu no ta yara ciu”. (Tiagu 3:2) Suma ku no ojaba ja, i sinal di umildadi i madureza rukuñusi logu-logu no erus.

Prosimu pasu i tira lison di bu erus. Un bajuda comadu Vera fala sin: “Kada bias ku N yara N ta aproveita aprindi i tira lison ku na judan pa N sedu algin minjor i aẑi di manera diferenti ora ku mesmu kusa akontisi.” No jubi kuma ku bu pudi fasi kila.

Bu dana bisikleta di bu pape. Ke ku bu na fasi?

• Bu ka na kontal, tambi bu na spera pa ka i ojal.

• Bu na kontal ke ku akontisi.

• Bu na kontal ke ku akontisi ma bu na da utru algin kulpa.

Bu ka paña bon nota na prova pabia bu ka studa. Ke ku bu na fasi?

• Bu na fala prova difisil dimas.

• Bu na rukuñisi kuma i abo ku ka studa.

• Bu na fala kuma pursor marka ku bo.

 Gosi jubi es senas ku faladu del riba, imaẑina kuma bu sta na lugar di bu pape o di bu pursor. Ke ku bu pape ku bu pursor na pensa di bo si bu rukuñisi bu erus? Ke ke na pensa di bo si bu sugundi bu erus?

Gosi pensa na eru ku bu fasi anu pasadu i ruspundi es purguntas ku sta bas.

Kal ki eraba eru? Kuma ku bu lida ku ki eru?

• N sugundil.

• N da algin kulpa.

• N rukuñisi ña eru.

Si bu ka rukuñisiba bu eru, kuma ku bu sinti dipus?

• N sinti ben — Pelu menus N kapli di kastigu!

• N sinti kulpadu — N dibi di kontaba bardadi.

Kuma ku bu pudiba lida ku es situason di minjor manera?

Ke ku bu aprindi di bu eru?

Pabia ku sertus jintis ka ta misti rukuñisi se erus?

Ke ku jintis na pensa di bo si bu ta sugundi bu erus, i ke ke na pensa di bo si bu ta rukuñisi bu erus? — Lukas 16:10.