Imaẑina es sena: Ora ku Julia na jubi na speliu, i ta oja kuma i gros. I ta fala na si sintidu, “N pirsisa di pirdi alguns kilus”, apesar di kuma si papes ku si amigus aŝa kuma i “magru.”

I ka tarda ku Julia sta na pensa toma mididas di mampasada pa pirdi “so sinku kilu.” Tudu ki pirsisaba di fasi i nega kume pa alguns dias . . .

Si bu staba na lugar di Julia, ke ku bu na fasiba?

I ka mal pa bu sta preokupadu ku bu aparensia. Na bardadi, Biblia fala ben di aparensia fisiku di manga di minjeris ku omis, suma Sara, Rakel, Abigail, José, ku Davi. Biblia fala kuma un minjer comadu Abisagi seduba “bonitu dimas”. — 1 Reis 1:4.

Ma, manga di jovens ta sta preokupadu dimas ku se aparensia. I kila pudi leba elis na purblemas gravi. Pensa so nes:

• Na un studu ku fasidu, 58 pursentu di bajudas fala kuma e gros, oca na bardadi, so 17 pursentu ku gros.

• Na utru studu ku fasidu, 45 pursentu di minjeris ku staba bas di pesu normal pensa kuma e teneba pesu dimas!

• Na se sforsu di pirdi kilus, alguns jovens kaba di kai na anoreksia — un duensa ku ta pañadu pabia di nega kume te na puntu di pui vida na pirigu.

 Si bu tene sintoma di anoreksia o kualker utru purblema ku sta ligadu ku kumida, buska ajuda. Konta bu pape o un algin garandi ku bu konfia nel. Biblia fala: “Amigu ta ama sempri. Na tempu di foronta algin ta ngaña ermon”. — Ditus 17:17.

Na bardadi, i kin ku no sedu pa dentru ku na fasi pa no sedu atraenti o nau. Jubi izemplu di Absalon, fiju di Rei Davi. Biblia fala:

“I ka tenba omi ku ta ngabadu pa si bonitasku suma Absalon. . . . I ka tenba nin un difeitu.” — 2 Samuel 14:25.

Ma, es joven seduba orgulyosu dimas, ambisiosu i traidur! Biblia ka fala ben di Absalon; i fala del suma un omi di kara sin borgaña, infiel i ŝeiu di odiu.

Pa un bon rason, Biblia danu es konsiju:

“Bo bisti ja naturesa nobu”. — Kolosensis 3:10.

“Bo fajamentu pa ka i sedu di fora . . . ma bo fajamentu i di dentru di korson”. — 1 Pedru 3:3, 4.

I bardadi kuma i ka mal misti tene bon aparensia, ma bu personalidadi i mas importanti di ki bu aparensia. Bon fisiku o bon forma di kurpu na fasiu sedu atraenti, ma ku tempu, bu bon kualidadis na fasiu sedu mas atraenti pa utrus. Un bajuda comadu Phylicia fala: “Jintis ta nota rapidu pa bonitasku, ma ke ke mas na lembra del i bu personalidadi ku bu bon kualidadis.”

Sera ki utru ora bu ta sinti mal ku bu aparensia?

Sera ki bu ciga ja di pensa usa pumada di peli pa muda aparensia o fasi dieta di mampasada pa kuriẑi un difeitu na bu kurpu?

Si bu pudiba, ke ku bu na muda na bu aparensia? (Kuji tudu si aplika.)

• ALTURA

• PESU

• KABELU

• FORMA DI KURPU

• KARA

• PELI

Si bu ruspundi sin pa dus purmeru purguntas i bu kuji tris o mas kusas na terseru purgunta, nta es signifika kuma bu ka ta nkara bu kabesa diritu suma ku utrus ta nkarau. I fasil toma mididas di mampasada i preokupa ciu dimas ku aparensia. — 1 Samuel 16:7.