PURGUNTA 9
Sera ki N dibi di fia na evuluson?
KE KU BU NA FASIBA?
Imaẑina es sena: Aleksi sta konfusu. Desdi sempri i fia na Deus i na kriason. Ma aos si pursor di bioloẑia fala ku tudu firmesa di kuma ideia di evuluson i bardadi, i fala kuma i basia na piskisas sientifiku di konfiansa. Aleksi ka misti parsi tulu. Ma tambi i punta si kabesa: ‘Si sientistas tene prova di kuma evuluson i bardadi kin ki ami pa disafia elis?’
Si bu staba na lugar di Aleksi, bu na seta evuluson so pabia di kuma bu livrus di skola fala kuma i bardadi?
PENSA UN BOKADU!
Jintis na tudu dus ladu di dibati ta lestu ku splika ke ke fia nel sin sibi propi pabia di ke ke fia nel.
-
Alguns jintis ta fia na kriason so pabia di kuma kila ke sinadu na igreẑa.
-
Alguns jintis ta fia na evuluson so pabia di kuma kila ke sinadu na skola.
SEIS PURGUNTA PA PENSA NEL
Biblia fala: “Kada kasa ten kin ku kumpul, ma kin ku kumpu tudu kusa i Deus.” (Ebreus 3:4) Sera ki razuavel fia nes?
AFIRMASON: Tudu kusa ku izisti na universu i rusultadu di un spluson garandi.
1. Kin ku kausa ki garandi spluson o ke ku kausal?
2.Ke ku mas ta fasi sintidu — tudu kusas bin di nada o i kumpudu pa un algin?
AFIRMASON: Omis bin di limaria.
3. Si omis bin di limaria — suma pur izemplu makaku — pabia ki ten un diferensa garandi na kapasidadi intelektual di omis ku makakus?
4. Pabia ki difisil ntindi te mesmu kuma ku un “simplis” forma di vida fasidu?
AFIRMASON: I provadu kuma evuluson i bardadi.
5. Sera ki algin ku fasi es afirmason piskisa pa el propi i oja provas?
6. Ke ku manda manga di jintis fia na evuluson so pabia di kuma e faladu kuma jintis jiru fia nel?
“Si bu sta na yanda na un matu i bu diskubri un kasa bonitu, bu na falaba: ‘I bonitu! Arvuris ku kai na mumentu sertu i e forma es kasa bonitu.’ Klaru ki nau! I ka razuavel pensa sin. Ma pabia gora ku no dibi di fia di kuma tudu kusas na universu dati so i izisti?” — Julia.
“Imaẑina si algin falau kuma i akontisi un spluson na un fabrika di livrus i tinta spalia na paredi ku tetu i forma un disionariu kompletu. Bu na fiaba?” — Gwen.
PABIA KU BU FIA NA DEUS?
Biblia nsentivanu pa no “proba tudu”. (1 Tesalonisensis 5:21) Es signifika kuma bu ka dibi di fia na Deus basiadu so na:
-
EMOSONS (N ta sinti kuma Deus ten)
-
NFLUENSIA DI UTRUS (N mora na un zona riliẑiosu)
-
PRESON (Ña papes sinan di kuma Deus ten — i ka ami ku kuji)
En ves di kila, bu dibi di tene forti motivus pa fia na un kusa.
“Oca ku N sta na turma N na obi splikason di no pursor aserka di kuma ku no kurpu ta funsiona, N ka tene duvida di kuma Deus izisti. Kada parti di kurpu tene si propi funson, te mesmu ki partis pikininu, i manga di bias e ta funsiona sin no nota. Na bardadi kurpu umanu bonitu dimas!” — Teresa.
“Ora ku N oja un prediu garandi, un barku, o un karu, N ta punta ña kabesa: ‘Kin ku kumpu es?’ I pirsis jintis jiru pa kumpu un karu, pur izemplu, tudu pesas pikininu dibi di pudu diritu pa i pudi funsiona. I si karu tene algin ku kumpul, pekaduris tambi tene.” — Richard.
Anthony fala: “Mas ku N studa siensia, i mas ta sedu difisil pa N fia na evuluson.” I fala tambi kuma i mas difisil fia na evuluson di ki fia na Kriadur.
PENSA NES
Apesar di manga anus di piskisa, sientistas ka konsigi inda oja un splikason pa evuluson ku elis tudu e na konkorda kel. Si sientistas, ku ta konsideradu kuma e sibi ciu ka konsigi ciga un akordu aserka di evuluson, sera ki eradu pa bu kistiona se teoria?