Sera ki i fasil sempri obdisi bu papes? — Utru ora i ta difisil. Sera ki bu sibiba kuma Jesus seduba obdienti pa Jeova ku si papes? — Si isemplu pudi judau tambi obdisi bu papes mesmu ora ki ka fasil. Gosi no na aprindi mas aserka des.

Antis di Jesus bin pa Tera, i staba na seu ku si Pape, Jeova. Ma tambi Jesus teneba pape ku mame li na Tera. Se nomi i José ku Maria. Bu sibi kuma ke yanda e sedu si padiduris? —

Jeova toma vida di Jesus na seu i pui dentru di bariga di Maria e ku manda Jesus bin padidu i vivi na Tera. Es i un milagri! Jesus kirsi dentru di bariga di Maria suma ku utrus mininus ta kirsi dentru di bariga di se mame. Serka di novi mis dipus, Jesus padidu. Asin ku Maria ku si omi, José, bin sedu mame i pape di Jesus li na Tera.

Oca Jesus tene 12 anu, i fasi un kusa ku mostra amor garandi ki tene pa si Pape, Jeova. Es akontisi oca Jesus ku si familia fasi un bias lunju pa Jerusalen pa bai mati Paskua. Es seduba un festa pa lembra di saida di israelitas na Ejitu. Na kamiñu di riba pa kasa José ku Maria buska Jesus ma e ka ojal. Bu sibi nunde ki staba nel? —

José ku Maria riba rapidu pa Jerusalen, i e buska Jesus pa tudu ladu. E staba preokupadu dimas pabia e ka ojal. Ma dipus di tris dia, e ojal na templu! Bu sibi pabia di ke ku Jesus staba na templu? — Pabia la ki pudi aprindi aserka di si Pape, Jeova. I ama Jeova i misti aprindi kuma ki na kontental. Mesmu oca ki kirsi i bin torna omi, Jesus sempri ta obdisi Jeova. Jesus obdisi mesmu na mumentu ku obdiensia na seduba difisil pa rel o signifika sufrimentu pa rel. Sera ki Jesus tambi obdisiba José ku Maria? — Sin, Biblia fala i obdisi.

Ke ku bu pudi aprindi di isemplu di Jesus? — Bu dibi di obdisi bu pape ku mame, mesmu ora ki sedu difisil. Bu na fasi kila? —