LISON 8
Josias teneba bon amigus
Bu pensa kuma i difisil fasi ke ki sertu? — Manga di jintis ta pensa kuma i difisil. Biblia falanu kuma i seduba difisil pa joven di nomi Josias fasi ke ki sertu. Ma i teneba bon amigus ku judal. Gosi no na aprindi mas aserka di Josias ku si amigus.
Pape di Josias i Amon, rei di Judá. Amon seduba malvadu dimas i ta adoraba idulus. Oca pape di Josias muri, Josias pasa sedu rei di Judá. Ma i teneba so oitu anu! Bu pensa kuma i seduba mau suma si pape? — Nau, i ka sedu!
Sofonias avisaba jintis pa ka adora idulus
Mesmu ocal joven Josias mistiba obidisi Jeova. Asin, i kujiba sedu amigu so ku jintis ku ama Jeova. I e juda Josias fasi ke ki sertu. Ba kin ki alguns amigus di Josias?
Un di si amigus i Sofonias. I seduba un profeta ku avisa povu di Judá di kuma mau kusas pudi bin akontisi ku elis si e adora idulus. Josias sukuta Sofonias i adora Jeova, i ka adora idulus.
Utru amigu di Josias i Jeremias. Kuas i teneba mesmu anu ku Josias, e moraba pertu di n̈utru i e kirsi juntu. E seduba bon amigus, e ku manda oca Josias muri, Jeremias skirbi un kantiga di miskiñu pa mostra falta ki na sintiba di Josias. Jeremias ku Josias judaba n̈utru fasi ke ki sertu i pa obdisi Jeova.
Josias ku Jeremias judaba n̈utru fasi ke ki sertu
Ke ku bu pudi aprindi di isemplu di Josias? — Mesmu oca Josias pikininuba, i mistiba fasi ke ki sertu. I sibiba kuma i dibi di sedu amigu di jintis ku gosta di Jeova. Kuji bon amigus ku ama Jeova i ku na judau fasi ke ki sertu!
