LISON 3
Raabi fia na Jeova
Imaẑina kuma na ki tempu no staba na sidadi di Jeriko. Es sidadi staba na un tera comadu Kanaan. Jintis ku staba na ki tera ka fia na Jeova. I tenba un minjer ku moraba la di nomi Raabi.
Oca Raabi seduba inda bajuda, i obi storia di kuma ku Moises dividi Mar Burmeju i dipus i liberta israelitas di Ejitu. I obiba tambi aserka di kuma ku Jeova judaba elis gaña gera kontra se inimigus. Gosi i obi kuma israelitas sta pertu di Jeriko!
Raabi proteẑi spions pabia i fia na Jeova
Un dia di noti, dus israelitas bai jubi sidadi di Jeriko na sigridu. Ki jintis ta comadu spions. E bai pa kasa di Raabi. I kumbida elis yentra i fika la. Di noti rei di Jeriko diskubri kuma spions sta na sidadi, i e staba na kasa di Raabi. Asin, rei manda jintis pa bai paña elis. Raabi sugundi ki dus spions na tetu di si kasa, dipus i bin fala omis ku rei manda es: ‘I bardadi, omis bin pa mi, ma e bai ja. Si bo bai gosi bo pudi paña elis!’ Bu sibi pabia ku Raabi proteẑi ki spions? — Pabia i fia na Jeova, tambi i sibi ki, Jeova na da israelitas tera di Kanaan.
Antis di spions sai di kasa di Raabi, e purmitil di kuma el ku si familias e na sedu salvu ora ku Jeriko na distruidu. Bu sibi ke ku e falal pa i fasi? — E falal: ‘Toma es korda burmeju, maral na janela. Si kontra bu fasi ke ku no falau, tudu algin ku sta na bu kasa na sedu salvu.’ Raabi fasi suma ku spions falal pa i fasi. Bu sibi ke ku akontisi dipus? —
Jeova salva Raabi ku si familia
Puku dias dipus, israelitas da volta di sidadi kala-kaladu. Un bias kada dia e ta da volta di sidadi. E fasil duranti seis dias. Ma na dia di seti, e da volta di sidadi seti bias. Dipus e grita ku vos altu. Jeova fasi pa muras di sidadi kai. Ma kasa ki teneba korda burmeju maradu na janela ka kai! Bu sta na ojal na foto? — Raabi ku si familia sedu salvu!
Ke ku no pudi aprindi di Raabi? — Raabi fia na Jeova pabia di tudu kusas adimiradu ki Jeova fasi ki aprindi del. Bu sta tambi na aprindi manga di kusas bonitus aserka di Jeova. Bu fia nel suma ki Raabi fia? — No sibi kuma bu fia!
