Rebeka seduba un minjer ku ama Jeova. Nomi di si omi i Isaki. El tambi i ama Jeova. Kuma ku Rebeka kunsi Isaki? Kuma ki mostra ki, i misti kontenta Jeova? Purmeru no na aprindi aserka di si omi.

Papes di Isaki seduba Abraon ku Sara. E moraba na tera nunde ku jintis ka ta adoraba Jeova comadu Kanaan. Ma Abraon mistiba pa si fiju kasa un minjer ku ta adora Jeova. E ku manda i manda si tarbajadur, talves Eliezer, pa i buska un minjer pa Isaki na un tera comadu Aran, nunde ku parentis di Abraon moraba nel.

Eliezer baiba ku utrus tarbajaduris di Abraon. I seduba un bias lunju. E leba 10 kamelus ku kargaba kumida ku prendas. Kuma ki Eliezer na sibiba kal minjer ki na kuji pa Isaki? Oca Eliezer ku utrus tarbajaduris ciga na Aran, e sinta pertu di un fonti pabia Eliezer sibiba kuma i ka na tarda jintis na bin buska yagu na fonti. I ora pa Jeova i fala: ‘Si N pidi un bajuda pa i patin yagu, si i dan yagu ku ña kamelu, N ta sibi kuma i es ku bu kuji pa bu servu Isaki.’

 Rebeka bin pa fonti. Biblia fala ki, i seduba un bajuda ­bonita dimas. Eliezer pidil yagu pa bibi, i Rebeka falal: ‘Bu pudi bibi, N na kata tambi pa bu kamelus.’ Pensa so nes! Kamelus ku tene sedi ta bibi yagu ciu, e ku manda Rebeka dibi di riba pa fonti manga di bias. Bu oja na foto kuma ki na tarbaja risu? — Eliezer fika adimiradu pa manera ki Jeova ruspundi si orason.

Eliezer da Rebeka manga di prenda bonitu. Rebeka kumbida Eliezer ku utrus tarbajuduris pa e bai se kau. Eliezer splika elis ke ku manda Abraon mandal i kuma ku Jeova ruspundi si orason. Familia di Rebeka staba kontenti pa disal kasa ku Isaki.

Ke ku bu pensa, Rebeka mistiba kasa ku Isaki? — Rebeka sibiba kuma Jeova ku manda Eliezer la. Oca si familia puntal si misti bai pa Kanaan pa kasa ku Isaki, i fala: ‘Sin N misti bai.’ I bai logu ku Eliezer. Oca i ciga Kanaan, i kasa ku Isaki.

Suma Rebeka fasi ke ku Jeova misti pa i fasi, Jeova kuida ben del. Dipus di manga di anus, Jesus padidu na si jorson! Si bu sedu suma Rebeka i bu fasi Jeova kontenti, Jeova na kuida tambi ben di bo.