Gosi no na aprindi aserka di un joven ku salva vida di si tiu. Tiu des joven i apostulu Paulu. No ka kunsi nomi des joven, ma no sibi kuma i fasi un kusa ki pirsisba koraẑen. Bu misti sibi ke ki fasi? —

Paulu staba na prison na Jerusalen. I prindiduba pabia di konta utrus jintis palabra di Deus aserka di Jesus. I tenba omis mau ku odiaba Paulu, asin e fasi un planu pa fasil mal. E fala: ‘Bo pidi kumandanti pa i tisi Paulu pa konseliu. Anos no na sugundi na strada, ora ku Paulu na pasa, no na matal!’

Subriñu di Paulu sibi des planu ke fasi. Ke ki na fasi? I bai pa prison i konta Paulu aserka di ki planu. Paulu logu falal pa i bai konta kumandanti. Bu pensa kuma i seduba fasil pa subriñu di Paulu papia ku kumandanti? — Nau, pabia kumandanti seduba algin importanti. Ma subriñu di Paulu seduba korajoẑu i papia ku kumandanti.

Kumandanti sibi logu ke ki dibi di fasi. I toma serka di 500 tropas pa skolta Paulu! I fala elis pa e leba Paulu pa Sesareia di noiti. Sera ki vida di Paulu sedu salvu? — Sin, ki omis malvadu ka pudiba fasil mal! Se mau planu ka sai elis sertu.

Ke ku bu pudi aprindi des storia? — Bu pudi sedu korajoẑu tambi suma subriñu di Paulu. No pirsisa di sedu korajoẑu ora ku no na papia ku utrus aserka di Jeova. Bu na sedu korajoẑu i kontinua papia ku utrus aserka di Jeova? — Si bu fasi kila, talves bu pudi salva vida di algin.