LISON 13
Timótiu mistiba juda jintis
Timótiu seduba un joven ku staba kontenti pa juda jintis. I viaẑaba pa manga di teras pa juda utrus. Pabia des, i teneba filisidadi na vida. Bu misti sibi aserka des? —
Mame di Timótiu ku si dona sinalba aserka di Jeova
Timótiu kirsi na un sidadi comadu Listra. Ocal mininu, si dona Loida ku si mame Eunisi, kumsa sinal aserka di Jeova. Oca Timótiu na kirsi i mistiba juda utrus aprindi aserka di Jeova.
Oca Timótiu seduba inda joven, Paulu pidil pa e bai prega na utrus kaus. Timótiu fala: ‘Sta ben!’ I staba prontu pa bai juda utrus.
Timótiu viaẑa ku Paulu pa un sidadi na Masedonia comadu Tesalónika. Pa ciga la, e tenba di yanda ciu i paña barku. Oca e ciga e juda manga di jintis aprindi aserka di Jeova. Ma alguns jintis paña raiba i e tenta fasi elis mal. Asin, Paulu ku Timótiu tenba ku bai pa utru ladu pa bai prega.
Timótiu tene kontentamentu i filisidadi na vida
Alguns mis dipus, Paulu fala Timótiu pa i riba pa Tesalónika pa jubi kuma ermons sta la. I pirsisba manga di koraẑen pa riba pa ki sidadi pirigosu! Ma Timótiu riba pabia i staba preokupadu ku ermons di la. I riba ku bon nobas pa Paulu. Ermons na Tesalónika staba ben!
Timótiu tarbaja ku Paulu pa manga di anus. Un bias Paulu skirbi kuma, Timótiu i minjor algin ki pudiba manda pa juda kongregasons. Timótiu teneba amor pa Jeova i pa jintis.
Bu tene amor pa jintis i bu misti juda elis aprindi aserka di Jeova? — Si bu tene ki amor, bu na tene kontentamentu i filisidadi na vida suma Timótiu!
