LISON 06
Kuma ku vida kumsa?
“Fonti di vida sta na [Deus]”. (Salmu 36:9) Sera ki bu fia nes? Alguns jintis ta pensa kuma vida dati i surẑi so asin, i ka ten kin ku kumpul. Si kila i bardadi, nton no dati no izisti so asin. Ma si Jeova ku kumpunu, i pabia i ten ke ku pui i fasi kila. a Jubi relatu di Biblia aserka di oriẑen di vida, tambi pabia ki normal fia nel.
1. Kin ku kumpu seu ku Tera?
Biblia fala: “Na kumsada Deus kumpu seu ku tera.” (Kumsada 1:1) Manga di sientistas konkorda di kuma seu ku Tera tene kumsada. Kuma ku Deus kumpu seu ku Tera? I usa si spiritu santu pa kumpu tudu kusa na seu ku Tera, nkluindu grupus di strela, strelas ku planetas. — Kumsada 1:2.
2. Pabia ku Deus kumpu Tera?
Jeova “ka kumpul pa i limpu, sin nada, ma i formal pa i tene moraduris.” (Isaias 45:18) I kumpu Tera pa i sedu un bon kau, nunde ku pekaduris na mora nel pa sempri. (Lei Isaias 40:28 ku 42:5.) Siensia mostra di kuma Tera i un planeta spesial. I uniku planeta ku pekaduris pudi vivi nel.
3. Ke ku pui pekaduris sedu diferenti di limarias?
Dipus ku Jeova kumpu Tera, i pui pa i ten kusas bibu nel. Purmeru, i kumpu manga di plantas ku limarias. Dipus, “Deus kumpu jintis suma el propi; i pui pa e parsil.” (Lei Kumsada 1:27.) Ke ku pui pekaduris sedu diferenti? Suma Deus kumpunu pa no parsil, no pudi tambi mostra amor ku justisa suma el. I kumpunu tambi ku kapasidadi di aprindi linguas, di gosta di kusas bonitu, i di gosta di musika. I diferenti di limarias, no pudi adora no Kriadur.
APRINDI MAS
Jubi provas ku ta mostra di kuma i ten kin ku kumpu vida, i di kuma no pudi fia na ke ku Biblia fala aserka di kriason. Aprindi ke ku bon manera di sedu di pekaduris ta sinanu aserka di Deus.
4. I ten kin ku kumpu vida
Pekaduris ta ngabadu pa kusa ke kopia di natureza. Kin gora ku dibi di ngabadu pa ki oriẑinal? Mostra VIDEO, dipus bo kombersa aserka des purgunta:
-
Kal kusas na natureza ku pekaduris kopia?
Kada kasa ten kin ku kumpul. Ma kin ku kumpu tudu kusa na natureza? Lei Ebreus 3:4, dipus bo kombersa aserka des purguntas:
-
Kal kusas na natureza ku ta adimirau?
-
Sera ki i normal fia di kuma seu ku Tera ku tudu kusas ku sta nel kumpudu pa un algin? Pabia?
Sera ki bu sibiba kuma?
Bu pudi oja artigus ku videos aserka des asuntus na jw.org na serie “Será Que Houve Um Projeto?” tambi “Pontos de Vista Sobre a Origem da Vida.”
“Kada kasa ten kin ku kumpul, ma kin ku kumpu tudu kusa i Deus.”
5. I ten bon rason pa fia di kuma ke ku Biblia fala aserka di kriason i bardadi
Na Kumsada kapitulu 1, Biblia splika oriẑen di Tera ku vida ku sta nel. Sera ki bu pudi fia na ke ki fala o i so un storia falsu? Mostra VIDEO, dipus bo kombersa aserka des purguntas:
-
Sera ki Biblia ta sina di kuma Tera ku vida ku sta nel, kumpudu na seis dia di 24 ora?
-
Sera ki bu pensa di kuma ke ku Biblia fala aserka di kriason i bardadi, i ta fasi sintidu? Pabia ku bu pensa kuma i bardadi o pabia ku bu pensa kuma i ka bardadi?
Lei Kumsada 1:1, dipus bo kombersa aserka des purguntas:
-
Sientistas fala di kuma seu ku Tera tene kumsada. Kuma ku ke ke fala, sta di akordu ku ke ku bu kaba di lei na Biblia?
Alguns jintis ta pensa kuma, Deus usa evuluson pa kumpu vida. Lei Kumsada 1:21, 25, 27, dipus bo kombersa aserka des purguntas:
-
Sera ki Biblia ta sina di kuma Deus kumpu un vida simplis, i dipus i transforma na pis, limarias ku pekaduris? O i kumpu elis tudu kada un ku si “koldadi”? b
6. Pekaduris i diferenti di utrus kriaturas di Deus
Anos i diferenti di limarias ku Jeova kumpu. Lei Kumsada 1:26, dipus bo kombersa aserka des purgunta:
-
Suma Deus kumpunu pa no parsil, no tene kapasidadi di mostra amor i sinti pena, ke ku es ta sinanu aserka di manera di sedu di Deus?
ALGUNS JINTIS TA FALA: “Ke ku Biblia fala aserka di kriason i un storia falsu.”
-
Ke ku bu pensa? I pabia ku bu pensa sin?
RUSUMU
Jeova kumpu seu ku Tera ku tudu kriaturas bibu.
Rekapitulason
-
Ke ku Biblia sina aserka di oriẑen di seu ku Tera?
-
Sera ki Deus usa un vida simplis i dipus i transforma na tudu koldadi di vida o i kumpu elis tudu?
-
Ke ku manda pekaduris i diferenti di utrus kriatura?
TENE MAS INFORMASON
Jubi izemplu di kusas na natureza ku ta mostra kuma i ten kin ku kumpu elis.
“Ke ku kusas ku sta na natureza ta sinanu?” (No Korda!, setembru di 2006)
Jubi kuma ku un pape pudi splika si fiju ke ku Biblia fala aserka di kusas ku Deus kumpu.
Jubi si kontra osis antigu o spiriensia sientifiku ta mostra di kuma vida kumpudu o i surẑi so asin.
Kumsada di Vida — Sinku Purgunta ku Bali Pena Sibi se Resposta (Broŝura)
