LISON 15
Kin ki Jesus?
Jesus i un di algin ku mas kunsidu na storia. Manga di jintis kunsi nomi di Jesus, ma e sibi puku kusa aserka del, i manga delis tene ideia diferenti aserka di kin na bardadi ki sedu. Ke ku Biblia fala aserka del?
1. Kin ki Jesus?
Jesus i un anju puderosu ku sta na vivi na seu. Jeova Deus kumpul antis di i kumpu tudu utrus kusas. Pabia des ku manda i comadu di “purmeru Fiju ku sta riba di tudu kriason.” (Kolosensis 1:15) Biblia coma Jesus di “uniku Fiju” di Deus pabia Jeova kumpul el so, sin ajuda di ningin. (Jon 3:16) Jesus tarbaja juntu ku si Pape Jeova, i judal na kumpu tudu utrus kusas. (Lei Ditus 8:30.) Jesus kontinua na tene un bon relason ku Jeova. I sirbi ku fidelidadi suma porta-vos di Deus, ku sedu “palabra”, i transmiti si mensaẑens ku si instrusons. — Jon 1:14.
2. Pabia ku Jesus bin pa Tera?
Serka di 2.000 anu atras, Jeova fasi un milagri i usa si spiritu santu, pa transfiri vida di Jesus di seu pa bariga di un virẑen comadu Maria. I asin, Jesus padidu suma un omi na Tera. (Lei Lukas 1:34, 35.) Jesus bin pa Tera suma Mesias purmitidu o Kristu, pa salva tudu jintis. a Tudu profesias na Biblia aserka di Mesias kumpri nel, i kila pirmiti jintis identifika Jesus suma “Mesias, Fiju di Deus bibu.” — Mateus 16:16.
3. Nunde ku Jesus sta gosi?
Dipus di Jesus muri, i lantandadu suma un anju i riba pa seu. I la na seu, “Deus yalsal te lugar mas altu”. (Filipensis 2:9) Gosi, Jesus i un anju ku tene manga di puder, i so Jeova ku mas el puder.
APRINDI MAS
Diskubri kin ku Jesus na bardadi i sedu, i ke ku manda i importanti kunsil.
4. Jesus i ka Deus ku ten tudu puder
Biblia sina kuma Jesus i un anju puderosu na seu, ma mesmu asin, i sta bas di otridadi di si Deus i Pape, Jeova. Pabia ku no pudi fala kila? Mostra VIDEO pa oja ke ku Biblia sina aserka di kuma ku Jesus i diferenti di Deus ku ten tudu puder.
Testus di Biblia ku no na bin lei, na judanu ntindi kal relason ku ten entri Jeova ku Jesus. Bo lei kada testu, i bo kombersa aserka des purguntas:
Lei Lukas 1:30-32.
-
Kuma ku anju mostra relason ku ten entri Jesus ku Jeova Deus “ku sta riba di tudu”?
Lei Mateus 3:16, 17.
-
Oca ku Jesus na batisadu, ke ku un vos ku sai di seu fala?
-
Ke ku bu pensa, kila i vos di kin?
Lei Jon 14:28.
-
Kin ki mas garandi i ku tene mas puder? Pape o fiju?
-
Ke ku Jesus misti fala oca ki coma Jeova di si Pape?
Lei Jon 12:49.
-
Sera ki Jesus ta pensa kuma el ku si Pape e sedu mesmu algin? Ke ku bu pensa?
5. Ke ku ta prova di kuma Jesus i Mesias?
Biblia tene manga di profesias ku ta juda jintis sibi kin ki Mesias, algin ku Deus kuji pa salva tudu jintis. Mostra VIDEO pa jubi alguns profesias ku Jesus kumpri oca ki bin na Tera.
Lei es profesias ku sta na Biblia, dipus bo kombersa aserka des purguntas:
Lei Mikeias 5:2 pa sibi nunde ku Mesias dibi di padidu. b
-
Sera ki nasimentu di Jesus kumpri es profesia? — Mateus 2:1.
Lei Salmu 34:20 ku Zakarias 12:10 pa aprindi ke ku Biblia fala aserka di mortu di Mesias.
-
Kuma ku es profesias kumpri? — Jon 19:33-37.
-
Sera ki bu pensa kuma Jesus fasi algun kusa pa pui es profesias kumpri?
-
Kal prova ku es ta dau aserka di Jesus?
6. No ta benefisia di aprindi aserka di Jesus
Biblia fala i importanti dimas aprindi aserka di Jesus ku ke ku Deus misti pa i fasi. Lei Jon 14:6 ku 17:3, dipus bo kombersa aserka des purgunta:
-
Pabia ki importanti kunsi Jesus?
Jesus yabri kamiñu pa no sedu amigu di Deus. I sina bardadi aserka di Jeova, i atraves del, no pudi tene vida ku ka ta kaba.
ALGUNS JINTIS TA FALA: “Tustumuñas di Jeova ka ta fia na Jesus.”
-
Kuma ku bu na ruspundi?
RUSUMU
Jesus i un anju puderosu. I Fiju di Deus tambi el i Mesias.
Rekapitulason
-
Ke ku manda Jesus comadu di “purmeru Fiju ku sta riba di tudu kriason”?
-
Ke ku Jesus ta fasiba antis di bin pa Tera?
-
Kuma ku no sibi di kuma Jesus i Mesias?
TENE MAS INFORMASON
Aprindi mas kuma ku no sibi di kuma Jesus i Mesias.
“Sera ki Profesias ku Fala di Mesias Prova di Kuma Jesus i Mesias?” (Artigu na internet)
Diskubri na kal sintidu ku Biblia fala Deus i Pape di Jesus.
“Pabia ku Jesus comadu di Fiju di Deus?” (Artigu na internet)
Jubi pabia ku Trindadi i ka un nsinu di Biblia.
