LISON 19

Sera ki Tustumuñas di Jeova i kristons di bardadi?

TOKA

Suma Tustumuñas di Jeova, no fia di kuma no sedu kristons di bardadi. Pabia? Nunde ku no basia ke ku no fia nel? Pabia ku no coma no kabesa di Tustumuñas di Jeova? I kuma ku no ta mostra kuma no ama n̈utru?

1. Nunde ku Tustumuñas di Jeova basia ke ke fia nel?

Jesus fala: “Palabra [di Deus] i bardadi.” (Jon 17:17) Suma Jesus, ke ku Tustumuñas di Jeova ta fia nel sempri ta basia na Palabra di Deus. Pur izemplu, jubi storia di Tustumuñas di Jeova ku kunsiduba suma Studantis di Biblia. Na volta di 1870, es Studantis di Biblia kumsa ku jubi ku kuidadu ke ku Biblia na bardadi ta sina. E basia ke ke fia nel na ke ku Biblia fala, mesmu si ke ke fia nel diferenti ku ke ku igreẑas ta sina. Dipus e kumsa ku konta utrus ke ke aprindi. a

2. Pabia ku no coma no kabesa di Tustumuñas di Jeova?

Jeova coma si servus di si tustumuñus pabia e ta konta bardadi aserka del. (Ebreus 11:4–12:1) Pur izemplu, na tempu antigu, Deus fala si povu: “Abos bo sedu ña tustumuñas”. (Lei Isaias 43:10.) Jesus comadu di “fiel tustumuña”. (Apokalipsi 1:5) Asin, na 1931 no pasa comadu Tustumuñas di Jeova. No kontenti di tene es nomi.

3. Kuma ku Tustumuñas di Jeova ta kopia amor di Jesus?

Jesus ama si disipulus ciu dimas, i e seduba suma si familia. (Markus 3:35) Di mesmu manera, na tudu parti di mundu, Tustumuñas di Jeova i un familia unidu. E ku manda no ta coma n̈utru di ermon ku irma. (Filemon 1, 2) No ta obdisi tambi mandamentu ku fala: “Bo ama ermons” na tudu parti di mundu. (1 Pedru 2:17) Tustumuñas di Jeova ta mostra es amor di manga di manera, suma juda no ermons ku irmas na mundu ntidu ora ke pirsisa di ajuda.

APRINDI MAS

Aprindi mas aserka di storia di Tustumuñas di Jeova, i jubi utru prova ku ta mostra di kuma, no sedu kristons di bardadi.

Kristons di bardadi ta basia ke ke ta fia nel na Biblia i e ta konta utrus el.

4. No ta basia ke ku no ta fia nel na Biblia

Jeova falaba ja di kuma no ntindimentu di Biblia na torna mas klaru. Lei Daniel 12:4, dipus bo kombersa aserka des purgunta:

Ke ku na aumenta na metadi di povu di Deus ora ke “na kuri di un ladu pa utru”, ku sedu, ora ke kontinua na studa Biblia?

Jubi kuma ku un grupu di studantis di Biblia, un delis comadu Charles Russell, studa Palabra di Deus? Mostra VIDEO, dipus bo kombersa aserka des purgunta:

VIDEO: E Diskubri Mas Bardadi ku Sta na Biblia (7:45)

Na video, kuma ku Charles Russell ku si kumpañeris Studantis di Biblia ta studa Biblia?

Sera ki bu sibiba kuma?

Utrora no ta muda alguns kusas ku no fia nel. Pabia ku no ta fasi kila? Suma ku sol ta aumenta klaridadi di un kau puku-puku, asin tambi ku Deus ta da ntindimentu di si Palabra puku-puku. (Lei Ditus 4:18.) Biblia ka ta muda, ma ora ku no ntindil minjor no ta muda ke ku no ta sina.

5. No ta vivi di akordu ku no nomi

Ke ku manda no pasa comadu Tustumuñas di Jeova? Mostra VIDEO, dipus bo kombersa aserka des purgunta:

VIDEO: Un Nomi ku ta Mostra Ba Kin ku No Sedu (2:40)

Ke ku manda nomi Tustumuñas di Jeova da ku nos?

Ke ku manda Jeova kuji jintis pa sedu si tustumuñas? Pabia e na pudi konta kuma el ki Deus di bardadi, suma i kontadu manga di mintida na si nomi. Jubi so dus des mintidas ku kontadu na si nomi.

Alguns riliẑions ta sina se membrus di kuma Deus misti pa e usa imaẑens na adorason. Ma, lei Sirmonias 26:1, dipus bo kombersa aserka des purguntas:

Kal ki bardadi? Kuma ku Jeova ta sinti aserka di adora idulus?

Alguns ŝefis riliẑiosu ta sina kuma Jesus i Deus. Ma, lei Jon 20:17, dipus bo kombersa aserka des purguntas:

Kal ki bardadi? Sera ki Deus ku Jesus i mesmu algin?
Kuma ku bu ta sinti manera ku bu sibi kuma Jeova manda si Tustumuñas pa konta bardadi aserka del i di si Fiju?

6. No ama n̈utru

Biblia kompara kristons suma diferenti partis di kurpu. Lei 1 Koríntius 12:25, 26, dipus bo kombersa aserka des purguntas:

Ke ku kristons di bardadi dibi di fasi ora ku se ermons na fe na sufri?
Sera ki bu nota es amor na metadi di Tustumuñas di Jeova?

Ora ku Tustumuñas di Jeova na sufri na un parti di mundu, utrus Tustumuñas di Jeova ku sta na tudu parti di mundu ta tenta juda elis logu-logu. Pa oja un izemplu di kila, mostra VIDEO. Dipus bo kombersa aserka des pungunta:

VIDEO: Aiti Sufri di Turbada Garandi Comadu Mateus (5:29)

Kuma ku sforsu ku Tustumuñas di Jeova fasi na da ajuda umanitariu ta mostra amor?

Kristons di bardadi ta mostra amor pa kilis ku pirsisa di ajuda.

ALGUNS JINTIS TA FALA: “Tustumuñas di Jeova i un riliẑion nobu.”

Disna di kal tempu ku Jeova coma si servus di tustumuñas?

RUSUMU

Tustumuñas di Jeova i kristons di bardadi. Anos i un familia ku ta adora Deus na mundu ntidu. Kusas ku no ta fia nel basia na Biblia i no ta fasi utrus kunsi bardadi aserka di Jeova.