LISON 20

Kuma ku kongregason sta organizadu

TOKA

Jeova i Deus di ordi. (1 Koríntius 14:33, 40) Pa kila, no na spera kuma si povu na sedu organizadu. Kuma ku kongregason kriston sta organizadu? Ke ku no pudi fasi pa apoia kongregason?

1. Kin ki kabesa di kongregason?

“Kristu i kabesa di igreẑa.” (Efésius 5:23) Desdi seu, Jesus sta na diriẑi atividadi di povu di Jeova na mundu ntidu. Jesus kuji “servu jiru, di fiansa”, un grupusiñu di ansions ku tene spiriensia ku kunsidu tambi pa Korpu Guvernanti. (Lei Mateus 24:45-47.) Suma apostulus ku ansions di purmeru sekulu na Jerusalen, Korpu Guvernanti ta da orientason pa kongregasons na mundu ntidu. (Atus 15:2) Ma e omis i ka ŝefis di no organizason. E ta lei Biblia pa sibi ke ku Jeova misti pa e fasi, i e ta seta sigi orientason di Jesus.

2. Ba kin ki ansions i ke ke ta fasi?

Ansions i omis ku sirbi suma kristons fiel pa manga di anus, e ta sina povu di Jeova atraves di Biblia, e ta juda elis i e ta nkoraẑa elis. E ka ta pagadu pa se tarbaju. En ves di kila, e ta sirbi di “libri vontadi, suma ku Deus misti; i ka ku spiritu intereseru, ma ku diseẑu di sirbi.” (1 Pedru 5:1, 2) Servus ministerial ta juda ansions, ku tempu, e pudi kualifika pa sirbi suma ansions.

Korpu Guvernanti ta kuji alguns ansions pa sirbi suma superintendentis di sirkuitu. E ta visita manga di kongregasons pa da orientasons ku nkoraẑamentu. Superintendentis di sirkuitu ta kuji ansions ku servus ministerial, basiadu na orientasons ku sta na Biblia. — 1 Timótiu 3:1-10, 12; Titu 1:5-9.

3. Kal ki responsabilidadi di kada Tustumuña di Jeova?

Tudu na kongregason ta “ngaba nomi di SIÑOR” i partisipa na runions di kongregason i prega di akordu ku se situason. — Lei Salmu 148:12, 13.

APRINDI MAS

Aprindi kal tipu di ŝef ku Jesus sedu, i kuma ku ansions ta tenta kopia si izemplu, i kuma ku no pudi obdisi Jesus i tarbaja juntu ku ansions.

4. Jesus i un bon ŝef

Jesus fasinu un konviti interesanti. Lei Mateus 11:28-30, dipus bo kombersa aserka des purgunta:

Kal tipu di ŝef ku Jesus sedu, i kuma ki misti pa no sinti?

Kuma ku ansions ta kopia izemplu di Jesus? Mostra VIDEO.

VIDEO: Ansions da Ajuda oca ki Ten Tirmidura di Con na Nepal (4:56)

Biblia sina di manera klaru kuma ku ansions dibi di fasi se tarbaju.

Lei Isaias 32:2 ku 1 Pedru 5:1-3, dipus bo kombersa aserka des purguntas:

Kuma ku bu ta sinti, manera ku ansions ta sforsa pa anima utrus suma ku Jesus ta fasi?
Di kal utru manera ku ansions ta kopia Jesus?

5. Ansions ta sina atraves di se izemplu

Kuma ku Jesus misti pa ansions oja se tarbaju? Mostra VIDEO.

VIDEO: Ansions ta Toma Diantera! (7:39)

Jesus da instrusons pa kilis ku ta toma diantera na kongregason. Lei Mateus 23:8-12, dipus bo kombersa aserka des purguntas:

Kal instrusons ku Biblia da pa ansions? Sera ki bu pensa kuma ŝefis riliẑiosu ta sigi ke ku Biblia fala?

Ansions ta manti se relason ku Jeova forti, e ta juda se familia pa e fasi mesmu kusa.
Ansions ta kuida di tudu jintis na kongregason.
Ansions ta prega sempri.
nsions ta sina. Tambi e ta juda na limpeza i ku utrus tarbajus.

6. Bu pudi tarbaja juntu ku ansions

Biblia danu un rason importanti ku manda no dibi di tarbaja juntu ku ansions. Lei Ebreus 13:17, dipus bo kombersa aserka des purguntas:

Ke ku manda Biblia fala no dibi di sta dispostu pa obdisi kilis ku ta toma diantera? Ke ku bu pensa aserka des?

Lei Lukas 16:10, dipus bo kombersa aserka des purgunta:

Ke ku manda no dibi di obdisi sempri ansions mesmu na kusas ku no pensa kuma i ka muitu importanti?

ALGUNS JINTIS TA FALA: “Bu ka pirsisa di adora Deus juntu ku utrus.”

Kal benefisiu ku bu pensa algin na tene si ta adora Deus juntu ku kongregason?

RUSUMU

Jesus i kabesa di kongregason. No ta kontenti tarbaja juntu ku ansions bas di orientason di Jesus pabia e ta animanu i e ta sinanu atraves di se izemplu.