LISON 21

Kuma ku bon noba sta na pregadu?

TOKA

I ka na tarda, Jeova na bin kaba ku tudu no purblemas atraves di si Renu. Es i un bon noba ku tudu jintis pirsisa di obi. Jesus misti pa si sigiduris konta es bon noba pa tudu jintis! (Mateus 28:19, 20) Suma Jesus da es ordi, ke ku Tustumuñas di Jeova sta na fasi?

1. Kuma ku Mateus 24:14 sta na kumpri aos?

Jesus fala: “E Bon Noba di renu i na kontadu na tudu mundu”. (Mateus 24:14) Tustumuñas di Jeova sta kontenti di fasi es tarbaju importanti. No sta na prega es bon noba na tudu parti di mundu na mas di 1.000 lingua! Pa fasi es tarbaju garandi i pirsis manga di sforsu ku un bon organizason. I ka pudi fasidu sin ajuda di Jeova.

2. Kal sforsu ku no ta fasi pa prega jintis?

No ta prega na kualker kau ku no pudi oja jintis. Suma kristons di purmeru sekulu, no ta prega na “kada kasa”. (Atus 5:42) Es manera di prega ta pirmitinu papia ku milyons di jintis kada anu. Suma manga di bias jintis ka ta sta na kasa, no ta prega tambi na diferentis lugaris publiku. Sempri no ta buska opurtunidadi pa papia ku utrus aserka di Jeova ku ke ki misti pa nos.

3. Kin ku tene responsabilidadi di prega bon noba?

Tudu kriston di bardadi tene responsabilidadi di konta bon noba pa utrus. No ta kumpri no responsabilidadi ku seredadi. No ta fasi no masimu ku no pudi pa prega, pabia no sibi di kuma no pudi salba vida di jintis. (Lei 1 Timótiu 4:16.) No ka ta pagadu pa fasi es tarbaju, pabia Biblia fala: “Di grasa ku bo risibi; di grasa ku bo na da.” (Mateus 10:7, 8) I ka tudu jintis ku ta seta no mensaẑen. Ma, no ta kontinua prega pabia i fasi parti di no adorason, i ta pui Jeova fika kontenti.

APRINDI MAS

Aprindi mas aserka di sforsu ku Tustumuñas di Jeova sta na fasi pa prega na tudu mundu, i jubi kuma ku Jeova ta judanu.

Pregason na mundu ntidu: (A) Kosta Rika, (B) Stadus Unidu, (C) Benin, (D) Tailandia, (E) Yap, (F) Suesia

4. No ta sforsa ciu pa prega tudu jintis

Tustumuñas di Jeova ta fasi sforsu garandi pa prega bon noba pa jintis na tudu lugar. Mostra VIDEO, dipus bo kombersa aserka des purgunta:

VIDEO: Pregason na “Lugar Mas Lunju di Mundu” (7:33)

Ke ku adimirau na sforsu ku Tustumuñas di Jeova fasi pa prega?

Lei Mateus 22:39 ku Romanus 10:13-15, dipus bo kombersa aserka des purguntas:

Kuma ku no pregason ta mostra di kuma no ama no kumpañeris?
Kuma ku Jeova ta oja kilis ku ta prega bon noba? — Jubi versikulu 15.

5. No sedu kumpañeris pa tarbaja juntu ku Deus

Manga di spiriensia ta mostra di kuma Jeova ta orienta no tarbaju. Pur izemplu, na Nova Zelandia i ten un ermon comadu Paul, i kontra ku un minjer oca i na prega di kasa pa kasa di tardi. Na ki mesmu dia parmaña, minjer ora Deus, i usa nomi di Deus, Jeova, i pidi pa algin bin visital. Paulu fala: “Tris ora dipus, N ciga na si kau.”

Lei 1 Koríntius 3:9, dipus bo kombersa aserka des purgunta:

Kuma ku spiriensia suma es di Nova Zelandia, mostra di kuma Jeova sta na orienta tarbaju di pregason?

Lei Atus 1:8, dipus bo kombersa aserka des purgunta:

Ke ku manda no pirsisa di ajuda di Jeova pa fasi no tarbaju di pregason?

Sera ki bu sibiba kuma?

Kada semana na no runion na metadi di semana, no ta risibi trenamentu ku ta judanu prega. Si bu ciga ja di mati un des runions, ke ku bu pensa di trenamentu ku ta dadu?

6. No ta obdisi ordi di Deus pa prega

Na purmeru sekulu, kilis ku staba kontra sigiduris di Jesus tenta para elis prega. Kristons di purmeru sekulu difindi se diritu di prega pa manera ke “firmanta bardadi di Bon Noba.” (Filipensis 1:7) Tustumuñas di Jeova ta fasi mesmu kusa aos. a

Mostra VIDEO.