LISON 53

Kuji divirtimentu ku na kontenta Jeova

TOKA

Jeova i “Deus filis.” (1 Timótiu 1:11, TNM) I misti pa no sta kontenti i pa no tene un vida filis. I ta fika kontenti ora ku no tira tempu di no tarbaju pa diskansa. Nes lison, no na oja kuma ku no pudi usa no tempu di diskansu di un manera ku na danu kontentamentu, sinti ben, i ku na kontenta tambi Jeova.

1. Ke ku no dibi di lembra del ora ku no na kuji no divirtimentu?

Ke ku bu gosta di fasi ora ku bu na diskansa? Alguns ta pirfiri pasa se tempu di diskansu na kasa na un ambienti kalmu, pa lei livru, obi musika, jubi un filmi, o navega na internet. Utrus ta misti sta mas ativu, sta juntu ku se amigus, pa nada, juga bola, o pasia. I ka mporta kal divirtimentu ku no kuji, no pirsisa di tene sertesa di kuma “Deus ta kontenti ku el.” (Efésius 5:10) I importanti pa no ntindi es pabia manga di divirtimentu ku ten aos tene kusas ku Jeova odia, suma violensia, pekadu seksual, o spiritismu. (Lei Salmu 11:5.) Ke ku pudi judanu kuji no divirtimentu ku jiresa?

Si no kuji amigus ku ama Jeova, e pudi tene bon influensia na nos i na divirtimentu ku no na kuji. Suma ku no aprindi na un di lison ku pasa, “si bu yanda ku jiru bu na sedu jiru.” Pa utru ladu, si no ta yanda sempri ku jintis ku ka ama normas di Jeova, no “na sufri danu.” — Ditus 13:20.

2. Ke ku manda i importanti kontrola tempu ku no ta pasa na divirtimentu?

Mesmu si divirtimentu ku no kuji ka na dana no relason ku Jeova, no pirsisa di kuida pa ka gasta manga di tempu nel. Si i ka kila, talves no ka na tene tempu sufisienti pa atividadis mas importanti. Biblia nkoraẑanu pa no “purbita” o usa ben no tempu. — Lei Efésius 5:15, 16.

APRINDI MAS

Aprindi kuma ku bu pudi toma bon disison aserka di divirtimentu.

3. Ivita divirtimentu ku ka bali

Pabia ku no dibi di kuji diritu no divirtimentu? Mostra VIDEO, dipus bo kombersa aserka des purguntas:

VIDEO: Kal Tipu di Divirtimentu ku N Dibi di Kuji? (4:39)

Kuma ku jugu di antigu Roma parsi ku alguns divirtimentu ku ten aos?
Na video, ke ku Dani aprindi aserka di divirtimentu?

Lei Romanus 12:9, dipus bo kombersa aserka des purgunta:

Kuma ku es versikulu pudi judau kuji bon tipu di divirtimentu?

Kal ki alguns kusas ku Jeova nuju? Lei Ditus 6:16, 17 ku Gálatas 5:19-21. Dipus di lei kada testu, bo kombersa aserka des purgunta:

Kal kusas ku faladu del nes versikulu ku ten na divirtimentu ku ta ojadu aos?

Kuma ku bu pudi kuji bu divirtimentu ku jiresa

Punta bu kabesa:

Ke ku N ta divirti ku el? Sera ki i nklui kualker kusa ku Jeova nuju?
Kal ora ku N ta divirti? Sera ki i ta toma tempu di ña atividadis mas importanti?
Ba kin ku N ta divirti ku el? Sera ki es divirtimentu ta pertusin ciu dimas di jintis ku ka ama Jeova o i ta fasin sta sempri ku elis?

I mas suguru fasi tudu ku no pudi pa sta lunju di pirigu. E ku manda no dibi di sta lunju di kualker divirtimentu ku no nota kuma i pudi ka sedu bon pa nos.

4. Usa bu tempu ku jiresa

Mostra VIDEO, dipus bo kombersa aserka des purgunta:

VIDEO: Ke ku ta Kontrola Bu Tempu? (2:45)

Apesar di kuma es ermon na video ka staba na jubi nada di mal, ma kal ku seduba si purblema?

Lei Filipensis 1:10, dipus bo kombersa aserka des purgunta:

Kuma ku es versikulu pudi judanu disidi kantu tempu ku no na pasa na divirtimentu?

5. Kuji divirtimentu ki bon pa bo

Alguns divirtimentus ka ta kontenta Jeova, ma i ten manga delis ki bon i ku ta kontental. Lei Eklesiastis 8:15 ku Filipensis 4:8, dipus bo kombersa aserka des purgunta: