“Ocanba na ensinu basiku, maioria di ña kolegas ka ta setaba asosia ku mi, i kila ta denba dimas. Pa kila, oca N bin entra na liseu N fasi mudansas na ña aparensia ku atitudi — i es mudansa i ka pa minjor. N staba disisperadu dimas pa tene amigus, N ka aguenta preson, N kaba pa fasi ke ke misti, so pa ña kolegas di skola pudi gosta di mi.” — Jennifer, 16 anu. *

Sera ki bu sta na nfrenta preson di kolegas? Si resposta i sin, es artigu na judau sibi lida kel.

Preson di kolegas pudi fasi bon jintis fasi mau kusas.

“Mau kumpañerasku ta dana bon manera di yanda di algin.” — 1 Koríntius 15:33.

“I suma si no sibi kuma un kusa i eradu, ma ora ku no sta dianti di ki situason, no ta kaba pa fasi ke ku na kontenta utrus!” — Dana

Preson ka ta bin so di bu kolegas.

“Nin ku N misti fasi ben, mal sta na mi.” — Romanus 7:21.

“Manga di bias preson ta bin di mi, ami propi ku ta misti kusas ku N obi ña kolegas na papia del di manera nteresanti.” — Diana.

Ka pirmiti pa utrus kontrola bu disison i un kusa di sinti orgulyu del.

Kontinua tene “bon sintidu”. — 1 Pedru 3:16.

“Na kumsada i seduba difisil dimas pa nfrenta preson di kolegas, ma gosi N ka tene medu di sedu diferenti, N sta firmi na ña disisons. I ka ten nada minjor di ki durmi di noti ku konsiensia limpu.” — Carla.

Ora ku bu kolegas na presionau pa fasi mal, tenta fasi es:

Pensa na konsikuensias. Punta bu kabesa: ‘Ke gora si N fasi ke ku ña kolegas misti, i dipus N bin diskubridu? Ke ku ña papes na pensa di mi? Ami propi, ke ku N na pensa di ña kabesa?’ — Prinsipiu di Biblia: Gálatas 6:7.

“Ña papes fasin es purgunta: ‘Si bu ka aguenta preson di kolegas, ke ku pudi akontisi ku bo?’ E judan oja kuma ku preson di kolegas pudi leban na mau kamiñu.” — Olivia.

Fortalisi bu konvikson. Punta bu kabesa: ‘Sera ki N sta konvensidu di kuma, es manera di fasi na sedu mal pa mi i pa utrus? — Prinsipiu di Biblia: Ebreus 5:14.

“Ocanba mas puku, N ta falaba so nau o N da un simplis resposta. Ma gosi N pudi da un bon splikason pabia ku N na fasi o N ka na fasi un kusa. N sta firmi na ke ku N fia nel aserka di ke ki sertu ku ke ki eradu, ña resposta ta bin di mi propi — i ka di utru algin.” — Anita

Pensa na kin ku bu sedu. Punta bu kabesa: ‘Kal tipu di algin ku N misti sedu?’ Dipus pensa na preson ku bu sta na pasa, i fasi es purgunta: ‘Ki algin ku N misti sedu, ke ki na fasiba nes situason?’ — Prinsipiu di Biblia: 2 Koríntius 13:5.

“N sta kontenti ku kin ku N sedu, N ka mporta ku ke ku utrus ta pensa aserka di mi. Alen di kila, manga di jintis gosta di ña manera.” — Alicia.

Pensa na futuru. Si bu sta na studa inda, lembra di kuma jintis ku bu sta na tenta impresiona, talves dentru di alguns anus o alguns misis, bu ka na lembra mas delis.

“Un dia N staba na jubi fotu di turma, nin mesmu N ka lembra nomi di alguns di ña kolegas. Oca ku no na studaba juntu, N ta ojaba se opinions mas importanti di ki ke ku N fia nel. I seduba tulesa dimas!” — Dawn, i tene gosi 22 anu.

Purpara. Biblia fala: “Bo sibi kuma ku bo dibi di ruspundi kada un.” — Kolosensis 4:6.

“Ña papes ta judan ami ku ña irma, pensa na ke ku pudi bin akontisi. Dipus no ta nsaia, asin ora ku no bin sta dianti di kil situason, no ta sibi ja ke ku no na fasi.” — Christine.