PA PAPE KU MAME
6: Disiplina
KE KI SIGNIFIKA
Palabra disiplina pudi signifika orienta o sina. Utru ora i pudi nklui kuriẑi eru di un mininu. Ma manga di bias, i ta nvolvi da mininu un trenamentu moral ku na judal aprindi toma bon disisons, en ves di bin ba ta kuriẑil.
PABIA KI IMPORTANTI
Na dekadas resenti, kuas disiplina ka ta ojadu na alguns familias, papes ku mames medi di kuma kuriẑi mininus pudi bin pui elis sinti di kuma e ka bali nada. Ma papes ku mames jiru ta fiksa regras razuavel, i e ta trena se fijus pa e obdisi elis.
“Mininus pirsisa di pudu limitis ku na juda elis kirsi i sedu adultus responsavel. Sin disiplina, mininus na sedu suma un barku ku pudi pirdi rumu kualker mumentu o rabida.” — Pamela.
KE KU BU PUDI FASI
Kumpri ke ku bu fala. Si bu fiju ka kumpri regras ku bu pui, pui kastigu. Pa utru ladu, sedu prontu pa ngaba bu fiju si kumpri ku regra ku bu pui.
“N ta ngaba sempri ña fijus manera ke sedu obdienti, na un mundu nunde ku manga delis ka ta sedu obdienti. Ora ke ngabadu i ta sedu mas fasil e seta koreson ora ki pirsis.” — Christine.
PRINSIPIU DI BIBLIA: “Kil ku omi sumia, i el ki na kebra tambi.” — Gálatas 6:7.
Sedu razuavel. Ora ku bu na disiplina bu fijus leba en konta se idadi, se kapasidadi ku gravidadi di eru. Manga di bias kastigu mas ta funsiona ora ki sta ligadu ku eru — pur izemplu, se ka usa telefoni diritu, kastigu pudi sedu tuji elis telefoni pa un tempu. Na mesmu tempu, ivita paña raiba pabia di erusiñus ke fasi.
“N ta buska sibi si ña fiju fasi kusa ku diskarna o i yara nan son. I ten diferensa entri un maña ku dibi di kabadu ku el, ku un eru ku dibi di kuriẑidu so.” — Wendell.
PRINSIPIU DI BIBLIA: “Ka bo irita bo fijus, pa ka e fika disanimadu.” — Kolosensis 3:21.
Mostra amor. I mas fasil pa mininus seta i aplika disiplina ora ke sibi kuma pape ku mame fasil pabia e ama elis.
“Ora ku no fiju yara no ta fasil sinti kuma no kontenti ku bon kusas ki fasi ba ja. No ta splikal kuma ki eru ka na dana si reputason, desdi ki fasi ke ki pirsis pa kuriẑi ki eru, i tambi no sta la pa judal.” — Daniel.
PRINSIPIU DI BIBLIA: “Amor i sufridur, i bon.” — 1 Koríntius 13:4.
