Kumunikason di bardadi, i ora ku abo ku bu fijus bo ta konta n̈utru bo pensamentus ku bo sintimentus.

Kumunikason pudi sedu difisil, prinsipalmenti ku adolesentis. Oca ku bu fijus seduba pikininu e ta kontauba tudu kusa, ma gosi ke sedu adolesenti e ta papia puku ku bo, i bu ka pudi sibi ke ke na pensa ku ke ke na sinti, i ta sta suma bu sta na un banda di riu i elis e sta na utru banda. Mesmu si parsi kuma bu fijus ka misti papia, kila i mumentu ku bu mas pirsisa di papia ku elis!

Sta dispostu pa papia ku bu fijus kualker ora ke misti. Fasi kila mesmu si sedu altas oras.

“Talves bu pudi misti fala: ‘Gosi ku bu misti papia, no pasa tudu dia li juntu!’ Ma kuma ku no pudi reklama si no fijus misti kontanu ke ku sta na se korson? I ka es ku tudu pape ku mame ta misti?” — Lisa.

“N gosta di durmi, ma minjoris kombersa ku N tene ku ña fijus adolesentis, i dipus di me-noiti.” — Herbert.

PRINSIPIU DI BIBLIA: “Ningin ka dibi di buska si interes propi, ma i dibi di buska interes di utru.” — 1 Koríntius 10:24.

Ivita ke ku pudi distraiu. Un pape fala sin: “Utru ora, ora ku ña fijus na papia ku mi, ña sintidu ta sta na utru ladu. I N ka pudi ngana elis, e ta nota kila!”

Si es ta akontisi ku bo, disliga televison, i finka tudu utrus apareliu. Konsentra na ke ku bu fiju na falau, i nkara si preokupason ku seredadi, nin si i parsi kuma i ka tene sintidu.

“No pirsisa di fasi no fijus sinti kuma se preokupason i importanti pa nos. Si e ka sinti kila e pudi kala ku se preokupason, o bai buska ajuda na utru ladu.” — Maranda.

“Ka bu reaẑi ku raiba, nin si kontra manera di pensa di bu fijus ka sta diritu.” — Anthony.

PRINSIPIU DI BIBLIA: “Bo toma sintidu na manera ku bo ta sukuta.” — Lukas 8:18.

Aproveita di mumentu ku bo na fasi utru kusas. Utru ora mininus ta sta mas avontadi pa kontau ke ku sta na se korson ora ku bu ka sinta bo filanta rostu.

“No ta aproveita di mumentu ku no sta na karu. Ora ku no sinta pertu di n̈utru, en ves di no filanta rostu, no ta tene bon kombersas.” — Nicole.

Ora di kume i un utru opurtunidadi di bo papia avontadi.

“Na ora di sia, kada un di nos ta konta mau kusa, o bon kusa ku akontisi ku el na ki dia. Es manera di fasi ta uninu, i kada un di nos ta sinti kuma i ka dibi di nfrenta purblema el son.” — Robin.

PRINSIPIU DI BIBLIA: “Sta pruntu pa obi, . . . i tarda pa papia”. — Tiagu 1:19.