PA KASADUS
3: Rispitu
KE KI SIGNIFIKA
Kasadus ku rispita n̈utru, ta preokupa ku n̈utru, mesmu ora ke ka sta di akordu ku n̈utru. Un livru fala: “Es kasadus ka ta nsisti kada kin na si opinion, en ves di kila e ta papia ku n̈utru aserka di se purblemas. E ta sukuta n̈utru ku rispitu i e ta buska un suluson ku na da pa tudu dus”. — Ten Lessons to Transform Your Marriage (Des lisons pa muda bu kasamenti).
PRINSIPIU DI BIBLIA: “Amor . . . i ka intereseru”. — 1 Koríntius 13:4, 5.
“Rispita ña minjer signifika, apresial, dal balur i ka fasi nada ku na fasil sinti mal, o dana no kasamenti.” — Micah.
PABIA KI IMPORTANTI
Si rispitu ka ten, kombersa entri omi ku minjer, pudi mancadu ku kritika, palabras duru, te mesmu ku disprezu, mañas ku piskizaduris fala kuma, i pudi leba na kaba kasamenti.
“Palabras ku ta firi, bota ditu, i goza bu minjer, na fasil sinti kuma i ka tene balur, i na pirdi konfiansa na bo, i kila na dana bo kasamenti.” — Brian.
KE KU BU PUDI FASI
FASI ES TESTI
Presta atenson na bu palabras i na bu asons duranti un semana. I dipus punta bu kabesa:
-
‘Kantu bias ku N kritika ña parseru, i kantu bias ku N gabal?’
-
‘Di kal manera spesifiku, ku N mostra rispitu pa ña parseru?’
KOMBERSA KU BU PARSERU
-
Kal asons o palabras ku na juda kada un di bos sinti di kuma i rispitadu?
-
Kal asons o palabras ku na fasi kada un di bos sinti di kuma i ka rispitadu?
SUẐESTONS
-
Skirbi di kal tris manera, ku bu misti pa algin mostra rispitu pa bo. Fala bu parseru pa i fasi mesmu kusa. Bo torkia lista, i bo sforsa na mostra rispitu na arias ku bo mensiona.
-
Fasi un lista di kualidadis ku bu ta adimira na bu parseru. Dipus konta bu parseru di kuma bu ta apresia ciu es kualidadis.
“Rispita ña omi signifika, mostra pa ña asons di kuma N valorizal, i N misti pa i sedu filis. Manga di bias atraves di kusasiñus ku N ta fasi o fala, N pudi mostra kuma na bardadi N rispita ña omi.” — Megan.
Ke ki mportanti, i ka pa bu pensa kuma bu ta mostra rispitu, ma sera ki bu parseru ta sinti kuma bu rispital.
PRINSIPIU DI BIBLIA: “Bo ten ku bisti un korson di miserikordia, ku bondadi, ku umildadi, ku mansesa, ku pasensa.” — Kolosensis 3:12.
