PA JOVENS
11: Sedu algin ku osa tarbaju
KE KI SIGNIFIKA
Jintis ku osa tarbaju ka ta kuri di tarbaju. Pa kontrariu, e gosta di tarbaja duru pa sustenta se kabesa i pa juda utrus — mesmu si un tarbaju ku jintis ta dispreza.
PABIA KI IMPORTANTI
No misti o no ka misti, vida tene manga di responsabilidadi. Nes mundu ku manga di jintis ka gosta di tarbaja duru, sedu algin ku osa tarbaju ta dau manga di vantaẑens. — Eklesiastis 3:13.
“N diskubri kuma ora ku bu tarbaja duru, bu ta kontenti, i bu ta sinti ben dentru di bo. Es kontentamentu judan aprindi gosta di tarbaju. Bu bon manera di fasi tarbaju na judau tene un bon reputason.” — Reyon.
PRINSIPIU DI BIBLIA: “Si algin ta tarbaja, i ten purbitu”. — Ditus 14:23.
KE KU BU PUDI FASI
Es pasus asigir na judau tene un bon pontu di vista aserka di tarbaju.
Tene kontentamentu di aprindi fasi kusas diritu. I ka mporta si tarbaju di kasa ku bu na fasi, o kabanta tpc, o bu na tarbaja pa algin, fasil di tudu bu korson. Nin si bu ta fasi tarbaju diritu, buska manera di minjoria — di fasil mas rapidu o mas minjor. Si bu tene mas abilidadi na bu tarbaju, bu mas na gosta del.
PRINSIPIU DI BIBLIA: “Bu oja un omi ku ta tarbaja diritu? I na bin kolokadu na tarbaju di rei; i ka na tarbaja pa kalker algin.” — Ditus 22:29.
Pensa na kuma ku bu tarbaju pudi juda utrus. Na manga di kasus, ora ku bu kuida ben di bu responsabilidadis, bu ta benefisia utrus. Pur izemplu, ora ku bu sedu algin ku osa tarbaju, bu ta fasi tarbajus di kasa, bu na alivia utrus na familia.
PRINSIPIU DI BIBLIA: “I mas minjor da di ki bo risibi.” — Atus 20:35.
Fasi mas di ki kil ke pidiu. En ves di fasi so kil ke pudiu, tenta fasi mas di ki kil ke pidiu. Asin bu na mostra di kuma bu ka forsijadu fasi un kusa, ma bu fasil pabia bu misti. — Mateus 5:41.
PRINSIPIU DI BIBLIA: “N misti pa bu fasil na bu libri vontadi. Asin N ka na fasi nada si bu ka konkorda.” — Filemon 14.
Sedu ekilibradu. Jintis ku osa tarbaju e ka amonton, nin e ka ta tarbaja tambi pur dimas. E ta sedu ekilibradu, e ta kontenti di tarbaja ciu, tambi e ta diskansa.
PRINSIPIU DI BIBLIA: “Minjor bu tene son un mon incidu, bu ten pas, te pa bu tene dus mon incidu, bu na tarbaja suma bu na serka bentu.” — Eklesiastis 4:6.
