1. Ke ku pudi judanu gosta di studa profesias di Biblia?

 UN ERMON joven comadu Ben fala sin: “N gosta di studa profesias di Biblia”. Bu konkorda ku el? O bu ta medi studa profesias? Talves bu pudi te mesmu pensa di kuma studa profesias i ŝatu. Ma, ora ku bu aprindi mas aserka di pabia ku Jeova skirbi profesias na si Palabra, bu pudi kumsa ku gosta delis tambi.

2. Ke ku no na fala del nes studu?

² Nes studu no ka na fala so pabia ku no dibi di studa profesias di Biblia, ma tambi kuma ku no pudi studa elis. Dipus no na bin jubi dus profesias di livru di Daniel, i jubi kuma ku ntindi elis pudi judanu gosi.

3. Ke ku no pirsisa di fasi si no misti ntindi profesias di Biblia?

³ No pirsisa di pidi ajuda si no misti ntindi profesias di Biblia. No jubi es komparason. Imaẑina kuma bu sta na visita un kau ku bu ka kunsi, ma un amigu ku sta na viaẑa ku bo kunsi es kau diritu. I sibi diritu nunde ku bu sta, tambi i sibi diritu nunde ku kada kamiñu ta bai. Sin duvida, bu na kontenti manera ku bu amigu seta bai ku bo! Di mesmu manera, Jeova sibi na kal mumentu ku no sta nel, tambi ke ku sta no dianti. Pa kila, pa ntindi profesias di Biblia, no dibi di pidi ajuda di Jeova ku umildadi. — Dan 2:28; 2 Ped 1:19, 20.

4. Pabia ku Jeova pui pa profesias skirbidu na si Palabra? (Jeremias 29:11) (Jubi tambi foto.)

⁴ Suma un bon pape, Jeova misti pa si fijus tene un futuru filis. (Lei Jeremias 29:11.) Ma diferenti di un  pape, Jeova pudi kontanu ke ku na kontisi na futuru sin falia. I fasi pa profesias skirbidu na si Palabra, pa no pudi sibi di kusas importanti antis de kontisi. (Isa 46:10) Profesias di Biblia i prendas ku no Pape ku sta na seu danu ku amor. Ma kuma ku bu pudi tene sertesa di kuma, ke ku Biblia fala na bin kumpri?

5. Ke ku un joven pudi aprindi di isemplu di Max?

⁵ Na skola, manga di bias no jovens ta sta ku jintis ku tene puku o nin rispitu pa Biblia. Se komentarius ku komportamentu ta leba jovens Tustumuñas di Jeova tene duvida aserka di ke ke ta fia nel. Jubi isemplu di un ermon comadu Max. I fala sin: “Ocanba joven, N kumsa ku duvida si kontra ña papes ta nsinanba riliẑion di bardadi, i si Biblia bin di Deus.” Ke ku si papes fasi? I fala sin: “N sibiba di kuma e staba preokupadu, ma mesmu asin e manti kalmu.” Papes di Max usa Biblia pa ruspundi si purguntas. Max fasi tambi utru kusa. I fala sin: “N studa profesias di Biblia, tambi N papia ku utrus jovens na kongregason aserka di ke ku N aprindi.” Kal ku sedu rusultadu? Max fala sin: “Dipus di kila, N sta konvensidu di kuma Biblia bin di Deus!”

6. Ke ku bu pirsisa di fasi si bu tene duvidas, i pabia di ke?

⁶ Suma Max, si bu kumsa ku duvida di kuma Biblia tene bardadi, bu ka pirsisa di burguñu. Ma bu pirsisa di fasi algun kusa. Duvida i suma feruẑen. Si bu disal, puku-puku i pudi dana un kusa ku tene balur. Pa kaba ku duvidas ku pudi dana bu fe, bu pirsisa di fasi bu kabesa es purgunta: ‘Sera ki N fia na ke ku Biblia fala aserka di futuru?’ Si bu ka tene sertesa, bu pirsisa di studa profesias di Biblia ku kumpriba ja. Kuma ku bu pudi fasil?

7. Kal isemplu ku Daniel da di kuma ku no dibi di studa profesia? (Daniel 12:10) (Jubi tambi foto.)

⁷ Daniel da un bon isemplu pa nos tudu, na kuma ku no dibi di studa profesia. Daniel ta studaba profesias ku bon motivason. I mistiba kunsi bardadi. Daniel seduba tambi algin ku ta baŝa si kabesa, i rikuñisi kuma Jeova na da ntindimentu pa kilis ku kunsil i ku ta obdisil. (Dan 2:27, 28; lei Daniel 12:10.) Daniel mostra di kuma i sedu algin ku ta baŝa si kabesa, manera ki konfia na ajuda di Jeova. (Dan 2:18) Daniel ta fasiba tambi piskisa. I fasiba piskisa na livrus di Biblia ku tenba na si tempu. (Jer 25:11, 12; Dan 9:2) Kuma ku no pudi kopia isemplu di Daniel?

8. Ke ku ta leba alguns jintis nega di kuma profesias di Biblia kumpri, ma ke ku no dibi di fasi?

⁸ Jubi diritu bu motivasons. Sera ki bu na studa profesias di Biblia, pabia bu tene diseẑu garandi di kunsi bardadi? Si  i kila, Jeova na judau. (Jon 4:23, 24; 14:16, 17) Ke mas ku pudi leba un algin na studa profesias di Biblia? Alguns talves pudi fasil, pabia e pensa kuma e pudi oja un kusa ku na mostra di kuma Biblia ka bin di Deus. E pensa di kuma si Biblia ka bin di Deus, nton e pudi disidi pa se kabesa ke ki bon ku ke ki i mau. Ma, no pirsisa di studa ku bon motivason. Alen di tene bon motivason, no pirsisa di utru kusa importanti dimas pa ntindi profesias di Biblia.

9. Ke ku no pirsisa di fasi pa ntindi profesias di Biblia? Bu pudi splika.

⁹ Baŝa bu kabesa. Jeova purmiti juda kilis ku ta baŝa se kabesa. (Tiagu 4:6) Pa kila, no pirsisa di pidi si ajuda na orason pa ntindi profesias di Biblia. No dibi di rikuñisi tambi kuma, no pirsisa di ajuda di kanal ki ta usa pa danu kumida spiritual na ora. (Luk 12:42) Jeova i Deus di ordi, pa kila, i ta fasi sintidu manera ki ta usa so un kanal, pa judanu ntindi bardadis ku sta na si Palabra. — 1 Kor 14:33; Ef 4:4-6.

10. Ke ku bu pudi aprindi di isemplu di Esther?

¹⁰ Fasi piskisa. Kuji un profesia ku bu gosta del, i fasi piskisa aserka del. I es ku un irma comadu Esther fasi. I mistiba sibi mas aserka di profesias ku na fala di tempu ku Mesias na ciga. I fala sin: “Ocanba ku 15 anu, N kumsa ku fasi piskisa, pa buska prova ku na mostra di kuma, es profesias skirbidu antis di tempu di Jesus.” Ke ki lei aserka di Rolus di Mar Mortu konvensil. Esther ciga es konkluson: “Alguns delis skirbidu antis di tempu di Kristu, pa kila, profesias ki tene dibi di bin di Deus. N lei ki kusas manga di bias pa pudi ntindi elis.” Ma i kontenti pa sforsu ki fasi. Dipus di piskisa manga di profesias di Biblia, i fala sin: “Gosi N oja klaru di kuma, ke ku Biblia fala i bardadi!”

11. Kal ki benefisiu di sta konvensidu di kuma Biblia tene bardadi?

¹¹ Ora ku no oja kuma ku alguns profesias di Palabra di Deus kumpri ja, no ta konfia ciu na Jeova, i na manera ki ta orientanu. Tambi, profesias di Biblia ta judanu tene speransa pa futuru, i ka mporta purblemas ku no sta na pasa. No na fala un bokadu di dus profesias ku sta na livru di Daniel, i ku sta na kumpri na no tempu. Si no ntindi es profesias no na pudi toma bon disisons.   

12. Ke ku pes di “feru jagasidu ku lama” ta representa? (Daniel 2:41-43)

¹² Lei Daniel 2:41-43. Na suñu ku Daniel splika rei Nebukodonozor, pes di statua ku rei oja seduba “feru jagasidu ku lama.” Si no kompara es profesia ku utrus profesias na livru di Daniel  ku di Apokalipsi, no pudi ciga konkluson di kuma, pes ta representa Putensia Mundial ku sta na manda aos, ku sedu Gran-Bretaña ku America. Daniel fala sin aserka des Putensia Mundial: “Renu na ten si forsa, i na ten tambi si frakesa.” Pabia ki na ten si frakesa? Pabia di povu ku representadu pa lama, si kapasidadi di aẑi ku forsa suma feru torna fraku. b

13. Kal bardadi importanti ku no aprindi manera ku no ntindi es profesia?

¹³ No ta aprindi manga di bardadis importanti di splikason ku Daniel da aserka di statua. No ta aprindi ciu di pes di statua. Purmeru, Putensia Mundial Anglo Amerikanu mostra di kuma i tene forsa. Pur isemplu, e fasi parti di teras ku ngaña Purmeru ku Sugundu Gera Mundial. Ma, es Putensia Mundial sta na tornadu kada bias mas fraku, pabia di junda-junda entri si sidadons ku guvernu. Sugundu, es Putensia Mundial na sedu ultimu putensia ku na manda antis di Renu di Deus kaba ku tudu guvernus di pekadur. Mesmu ku utrora utrus nasons ta sta kontra Putensia Mundial Anglo Amerikanu, e ka na toma si lugar. No sibi kila pabia “pedra” ku ta representa Renu di Deus na kebra pe, ku sedu, parti di statua ku ta representa Putensia Mundial Anglo Amerikanu. — Dan 2:34, 35, 44, 45.

14. Kuma ku ntindi profesia di feru jagasidu ku lama pudi judanu toma bon disisons?

¹⁴ Sera ki bu sta konvensidu di kuma profesia di Daniel aserka di pes di feru jagasidu ku lama i bardadi? Si bu sta konvensidu, i na afeta kuma ku bu na leba vida. Bu ka na buska suguransa material nes mundu ku na kabadu ku el, nin i ka na tarda. (Luk 12:16-21; 1 Jon 2:15-17) Ntindi es profesia na judau ntindi di kuma prega ku nsina i importanti dimas. (Mat 6:33; 28:18-20) Dipus di studa es profesia, pabia ku bu ka na fasi bu kabesa es purgunta: ‘Sera ki ña disisons ta mostra di kuma N sta konvensidu di kuma, i ka na tarda, Renu di Deus na bin kaba ku tudu guvernus di pekadur?’

15. Ba kin ki “rei di norti” ku “rei di sul” aos? (Daniel 11:40)

¹⁵ Lei Daniel 11:40. Daniel kapitulu 11 fala di dus reis o dus guvernus ku sta na kompiti ku n̈utru pa domina mundu. Si no kompara es profesia ku utrus profesias ku sta na Biblia, no pudi fala di kuma “rei di norti” i Rusia ku kilis ku sta na si ladu, i “rei di sul” i Putensia Mundial Anglo Amerikanu. c

16. Kuma ku “rei di norti” sta na trata povu di Deus?

¹⁶ Povu di Deus ku sta na vivi bas di guvernu di “rei di norti” sta na pirsigidu. Alguns Tustumuñas di Jeova sutadu i pudu na prison pabia di se fe. En ves di ke ku “rei di norti” sta na fasi pantanda no ermons, kila pui pa se fe torna mas forti. Pabia? Pabia no ermons sibi di kuma, pirsigison ku povu di Deus sta na pasa, kumpri profesia  ku faladu del na livru di Daniel. d (Dan 11:41) Sibi es pudi judanu manti no speransa forti i kontinua sedu fiel pa Jeova.

17. Kal purblemas ku povu di Deus ku sta bas di guvernu di “rei di sul” pasa?

¹⁷ Na pasadu, “rei di sul” pirsigi tambi povu di Jeova. Pur isemplu, es kontisi na purmeru ku sugundu gera mundial oca manga di ermons prindidu, pabia e nega bai gera i alguns fijus di Tustumuñas di Jeova serkadu di skola, pabia e nega sauda bandera. Ma na anus ku pasa, servus di Jeova, ku sta na vivi bas di guvernu des rei testadu di utru manera. Pur isemplu, duranti kampaña di eleison, un kriston pudi tentadu pa apoia un partidu o un kanditadu pulitiku. I pudi ka bai vota, ma dentru del talves i misti pa un partidu ngaña. I importanti pa no kontinua neutru na  asuntu pulitiku, i ka so na no asons, ma tambi na no pensamentus ku sentimentus! — Jon 15:18, 19; 18:36.

18. Kuma ku no dibi di reaẑi dianti di junda-junda ku ten entri “rei di norti” ku “rei di sul”? (Jubi tambi fotos ku diseñus.)

¹⁸ Kilis ku ka tene fe na profesia di Biblia pudi preokupa dimas, ora ke oja “rei di sul” “na geria” ku “rei di norti”. (Dan 11:40) Tudu es dus reis tene bumbas nukliar ku pudi kaba ku tudu vida na Tera. Ma no sibi di kuma Jeova ka na disa pa kila kontisi. (Isa 45:18) En ves di junda-junda ku ten entri “rei di norti” ku “rei di sul” punu fika preokupadu, i ta aumenta nan no fe. I ta mostra di kuma fin des mundu pertu.

19. Ke ku no dibi di rikuñisi aserka di profesia di Biblia?

¹⁹ No ka sibi kuma ku alguns profesias di Biblia na bin kumpri. Nin profeta Daniel ka ntindi signifikadu di tudu ke ki skirbi. (Dan 12:8, 9) Ma, so pabia di kuma no ka ntindi diritu kuma ku un profesia na kumpri, ka signifika di kuma i ka na kumpri. Sin duvida, no pudi tene sertesa di kuma Jeova na kontanu ke ku no pirsisa di sibi na tempu sertu, suma ki fasi na pasadu. — Am 3:7.

20. Kal profesias interesanti di Biblia ku na bin kumpri nin i ka na tardi, i ke ku no dibi di kontinua fasi?

²⁰ Anunsiu di kuma “tudu sta susegadu, suguru” na bin fasidu. (1 Tes 5:3) Dipus, guvernus pulitiku na ataka riliẑions falsu i kaba ku elis. (Apok 17:16, 17) Dipus e na ataka povu di Deus. (Eze 38:18, 19) Es kusas na leba pa Armajedon, ku sedu ultimu gera. (Apok 16:14, 16) No pudi tene sertesa di kuma i ka na tarda es kusas na ojadu. Nkuantu ki dia ka ciga inda, no kontinua gardisi no Pape ku sta na seu ku amanu, i no presta atenson pa profesias di Biblia i juda utrus fasi mesmu kusa.