• “N sinti suma si ña omi ta fasi pekadu seksual sempri.”

• “N sinti rebaŝadu, suma algin ku ka atraenti i ku ka bali nada.”

• “N ka pudi konta ningin nada. N ta sufri dentru di mi.”

• “N sinti suma si Jeova ka ta preokupa ku mi.”

Es palabras ta mostra kuma ku un minjer ta sufri ciu, ora ku si omi ta jubi pornografia. Tambi si omi ta fasil sukundidu, i pudi sedu pa misis o pa anus, minjer pudi sinti di kuma i ka pudi konfia mas nel. Un minjer fala sin: “N sinti suma si N ka kunsi ña omi diritu. Sera ki i ten utrus kusas ki sta na sukundin?”

Es artigu purparadu pa minjer ku si omi ta jubi pornografia. a I na fala di prinsipius di Biblia ku pudi konsolal i dal garantia di kuma Jeova amal i misti judal. Tambi i na judal tene mas kalma i pertusi mas di Jeova. b

Bu ka pudi kontrola tudu ke ku bu omi na fasi, ma i ten kusas ku bu pudi fasi pa rapati dur i tene mas kalma. No jubi es kusas.

Ka bu kulpa bu kabesa. Un minjer pudi sinti di kuma si si omi ta jubi pornografia, i pabia i fasi algun kusa di mal. Alice c sintiba di kuma algun kusa staba na faltal suma minjer. I punta si kabesa: ‘Pabia ku ña omi pirfiri jubi utrus minjeris, en ves di jubi pa mi?’ Alguns minjeris ta kulpa se kabesa pa ke ke na sinti, pabia e ta pensa di kuma e sta na piora se situason. Danielle fala sin: “N sinti suma si N ka sedu un bon minjer. N pensa kuma N staba na dana no kasamenti pabia di ña raiba.”

Si bu ta sinti di mesmu manera, sibi di kuma Jeova ka kulpau pa ke ku bu omi ta fasi. Tiagu 1:14 fala sin: “Kada un i tentadu ora ku si propi diseẑu mau na jundal, i na ngodal.” (Anos ku pui letras karegadu ku  italiku; Rom 14:12; Fil 2:12) En ves di kulpau, Jeova da balur pa fidelidadi ku bu ta mostra pa rel. — 2 Kron 16:9.

Tambi i bon ntindi di kuma si bu omi ta jubi pornografia, kila ka misti fala di kuma, algun kusa sta na faltau suma minjer. Spesialistas nes asuntu fala di kuma, pornografia ta pui un algin tene diseẑu seksual forti ku nin un minjer ka pudi satisfasi.

Ka bu preokupa ciu. Catherine fala di kuma i ta pensa tudu ora di kuma, si omi na jubi pornografia. Frances fala sin: “N ta preokupa dimas ora ku N ka sibi nunde ku ña omi sta. N ta sta ku kudadi tudu dia.” Utrus minjeris fala di kuma, e ta burguñu ora ke sta juntu ku ermons ku irmas ku talves sibi di purblema di se omi. Utrus ta fala di kuma e ta sinti dingidu, pabia e ta pensa di kuma ningin ka ta ntindi se situason.

I normal sinti des manera. Ma, si bu ta pensa so nes kusas, bu kudadi mas na aumenta. En ves di kila, tenta konsentra na bu amisadi ku Jeova. Fasi es na judau pa bu pudi nguenta. — Sal 62:2; Ef 6:10.

Talves i na sedu di ajuda lei i pensa fundu na minjeris ku Biblia fala del ku pasa kasabi, i e oca konsolu, oca ke buska ajuda di Jeova na orason. Manga di bias Jeova ka ta kaba ku se kasabi, ma i ta da elis pas. Pur isemplu, Ana staba ku “kasabi na si korson” pabia di si situason. Ma, dipus ki “kontinua na ora dianti di SIÑOR” i sinti pas, mesmu pa manera ki ka sibi ke ku na bin pasa. — 1 Sam 1:10, 12, 18; 2 Kor 1:3, 4.

Buska ajuda di ansions. E pudi sedu suma “abrigu kontra bentu, ku kau di sukundi kontra turbada”. (Isa 32:2) Te mesmu e pudi sinalau un irma ku bu na pudi konta kuma ku bu na sinti i ku pudi animau. — Dit 17:17. 

Sera ki bu na konsigi juda bu omi pa i kaba ku si visiu di jubi pornografia? I pudi sedu. Biblia fala di kuma, pa kaba ku un purblema o luta kontra un inimigu ku tene puder, “i minjor bo sedu dus di ki un son”. (Ekl 4:9-12) Studus ku fasidu mostra di kuma, manga di bias, i ta ten bon rusultadu  ora ku kilis ku kasa tarbaja juntu pa kaba ku visiu di jubi pornografia. Tambi minjer ta torna tene mas konfiansa na si omi.

Na bardadi, i dipindi ciu si bu parseru misti sforsa ciu, tambi si sta disididu pa para jubi pornografia. Sera ki i pidi Jeova pa i dal forsa i buska ajuda di ansions? (2 Kor 4:7; Tiagu 5:14, 15) Sera ki i fasi planus ku na judal pa i ka kai na tentason? Pur isemplu, sera ki i pui regras na manera di usa si aparelius eletroniku i ivita situasons ku pudi tental? (Dit 27:12) Sera ki i sta dispostu pa seta bu ajuda i sedu onestu ku bo na tudu? Si respostas i sin, talves bu pudi judal.

Kuma ku bu pudi judal? Jubi un isemplu. Felicia kasa ku Ethan. Ethan tene visiu di jubi pornografia desdi ocal pikininu. Felicia fasi pa si omi sta avontadi pa papia ku el, ora ki tene diseẑu di jubi pornografia. Ethan fala sin: “N ka ta sukundi ña minjer nada. N ta kontal tudu kusa. Ku amor, i judan ivita tentasons i sempri i ta puntan ke ku N na fasi. Tambi ña minjer judan pa N kuida ciu na manera ku N na usa internet i nunde ku N na usal.” Na bardadi, Felicia ta sinti mal manera ku Ethan ta jubi pornografia. Felicia fala sin: “Ña raiba ku ña dur ka judal kaba ku si visiu. Dipus di no papia di si purblema i sta mas disididu pa para jubi pornografia, i kila judan kaba ku ña propi dur.”

Es tipu di kombersas ka ta juda so omi para jubi pornografia, ma tambi i ta juda si minjer torna tene mas konfiansa nel. Mas importanti inda, ora ku omi konta si minjer si frakesas, nunde ki na bai o ke ki i na fasi, i ta sedu mas fasil pa si minjer konfia mas nel, pabia i ka sta na sukundil nada.

Sera ki bu fia di kuma, bu pudi juda bu omi des manera? Si resposta i sin, pabia ku bo ka na lei juntu es artigu i papia del? Objetivu des artigu i pa juda bu omi para jubi pornografia, i pa dau motivu di konfia mas nel. En ves di bu omi fika mal ku ke ku ta preokupau, i dibi di tenta ntindi kuma ku es purblema ta fasiu sinti. Bu objetivu i pa judal na sforsu ki sta na fasi di para jubi pornografia i dal oportunidadi pa bu pudi konfia mas nel. Abos tudu bo pirsisa di sibi ke ku ta pui jintis misti jubi pornografia, i kuma ku bo pudi kaba kes purblema. d

 Si minjer tene medu di kuma si omi ka na manti kalmu, ora ke na papia, i pudi pidi un ansion ke ta sinti avontadi ku el pa i mati se kombersa pa un tempu. Sibi di kuma, mesmu si bu parseru kaba ku visiu di jubi pornografia, i pudi leba manga di tempu pa bu torna konfia mas nel. Ka bu disisti. Jubi pa mudansas pikininu ki sta na fasi na bo tratu ku n̈utru. Tene speransa di kuma, ku tempu i ku pasensa, bo kasamenti na torna mas forti. — Ekl 7:8; 1 Kor 13:4.

Si bu omi ta dati i jubi pornografia, sera ki kila signifika di kuma i ka ripindi o situason ka na minjoria? I ka tudu ora ki sin. Si sedu un visiu, i pudi sedu un luta ki na tene duranti tudu si vida. I pudi jubi mas pornografia mesmu si i ka fasil pa manga di anus. Pa ivita kai mas, i pirsisa di sforsa ciu, talves i pirsisa di kontinua sigi planus ki fasiba ja di ivita kai na tentason, mesmu dipus ku purblema parsi di kuma i rosolvidu. (Dit 28:14; Mat 5:29; 1 Kor 10:12) I pirsisa di ‘arnoba si pensamentu ku spiritu’ i aprindi “nuju mal”. Es nklui pornografia ku tudu pratikas susu suma karisia o palpa-palpa si macundadi. (Anos ku pui letras karegadu ku italiku; Ef 4:23; Sal 97:10; Rom 12:9) Sera ki i misti fasi es sforsu? Si misti, i pudi kaba ku es visiu. e

Ma ke gora, si bu parseru ka misti kaba ku si visiu di jubi pornografia? I pudi sedu kuma bu na sinti mal, ku raiba i traidu. Konta Jeova bu kudadi. I es na judau pa bu tene pas. (1 Ped 5:7) Kontinua pertusi di Jeova atraves di studa, ora i pensa fundu. Konformi bu na fasil, tene sertesa di kuma Jeova na pertusi mas di bo tambi. Jeova “sta pertu di kilis ku tene korson kebrantadu”. (Anos ku pui letras karegadu ku italiku; Sal 34:18). Tambi i misti juda elis pa e torna tene mas alegria. Sforsa pa kontinua sedu fiel pa Jeova. Buska ajuda di ansions. Tambi kontinua tene speransa di kuma na futuru, bu omi pudi fasi mudansa di bardadi. — Rom 2:4; 2 Ped 3:9.