Na ki studu, no aprindiba di kuma i ten so un asuntu importanti dimas ku na afeta tudu pekaduris ku anjus: Santifikason di nomi garandi di Jeova. Si kontra manera di manda di Jeova i minjor o nau, sta ligadu ku santifikason di si nomi. Di mesmu manera, fidelidadi di pekaduris sta tambi ligadu ku es asuntu importanti dimas ku sedu santifikason di nomi di Jeova.

Pabia ku no mas ta fala gosi di kuma, es asuntu i aserka di nomi di Jeova ku si santifikason? No jubi tris motivus.

Purmeru, Satanas ataka nomi di Jeova, na jardin di Eden. Purgunta ku Satanas fasi Eva ta mostraba di kuma Jeova ka sedu bon, tambi ke ku i fala Adon ku Eva pa fasi ka seduba bon. Dipus Satanas kontraria palabras di Jeova, na bardadi i coma Deus di munturus. Asin i difama nomi di Jeova. I pasa sedu “diabu”, ku signifika “difamadur.” (Jon 8:44) Suma Eva fia na mintida di Satanas, i disobdisi Deus, i rebela kontra diritu di Jeova manda. (Kum 3:1-6) Te aos, Satanas kontinua difama nomi di Deus, i spalia mintida aserka di kal tipu di algin ku Jeova sedu. Kilis ku fia nes mintidas, mas tene pusibilidadi di disobdisi Jeova. Ma pa povu di Deus, difamason kontra nomi santu di Jeova i un injustisa garandi. I kila ku pui i ten manga di sufrimentu ku maldadi na mundu.

Sugundu, pa ben di tudu anjus ku pekaduris, Jeova sta disididu pa difindi si nomi i limpusal di tudu manca. Es i un kusa mas importanti pa Jeova. E ku manda i fala sin: “N na mostra puresa di ña garandi nomi”. (Eze 36:23) Tambi Jesus mostra di manera klaru, kal ku dibi di sedu asuntu mas importanti na orasons di tudu servus di Jeova oca ki fala sin: “No misti pa bu nomi rispitadu” o santifikadu. (Mat 6:9) Manga di bias, Biblia mostra importansia di glorifika nomi di Jeova. No jubi so alguns isemplus: “Bo ngaba gloria di Nomi di SIÑOR”. (1 Kron 16:29; Sal 96:8) “Bo kanta pa gloria di si nomi”. (Sal 66:2) “N na glorifika bu nomi pa sempri.” (Sal 86:12) Un bias oca Jesus sta na templu di Jerusalen, i fala sin: “Pape, glorifika bu nomi.” Propi Jeova ruspundi disna di seu, i falal asin: “N glorifikal ja. N na glorifikal mas.” — Jon 12:28. a

Terseru, Jeova misti pa si nomi sagradu kontinua ngabadu pa sempri. Pensa so nes: Dipus di ultimu testi ku na bin dipus di Renansa di Mil Anu di Kristu, ke ku na bin kontisi? Sera ki tudu anjus ku pekaduris na kontinua sta divididu na asuntu importanti dimas, ku sedu, santifikason di nomi di  Jeova? Pa judanu ruspundi es purgunta, no lembra di dus kusas ku sta ligadu ku n̈utru, ku sedu, fidelidadi di pekaduris ku diritu ku Jeova tene di manda na seu ku Tera. Sera ki kilis ku mostra sedu fiel na kontinua tene difikuldadi di manti se fidelidadi? Nau. E na sedu perfeitu i testadu di manera kompletu. E na tene vida ku ka ta kaba. Sera ki diritu di Deus manda na kontinua sedu un asuntu ku na papiadu del, te mesmu tisi divison entri anjus ku pekaduris? Nau. Na ki tempu, tudu jintis na seu ku Tera na sta unidu, i e na seta manera di Jeova manda. Ma, ke gora ku no pudi fala di nomi di Jeova?

Na ki mesmu tempu, nomi di Jeova na santifikadu di manera kompletu, i na limpadu di tudu mintida. Ma nomi di Jeova na kontinua sedu un kusa mas importanti pa tudu si servus fiel na seu ku Tera. Pabia? Pabia e na oja Jeova na kontinua fasi kusas ku ta dimira. Pensa nes: Ku umildadi, Jesus na ribanta Renu pa Jeova, asin, Deus na “rena kompletamenti riba di tudu.” (1 Kor 15:28) Dipus di kila, pekaduris na Tera na tene “liberdadi gloriosu di fijus di Deus.” (Rom 8:21) Tambi Jeova na bin kumpri tudu ke ki mistiba na kumsada, di uni tudu jintis na seu ku Tera na un familia garandi. — Ef 1:10.

Kuma ku es na afeta familia di Jeova na seu ku Tera? Na bardadi, no na tene diseẑu forti di ngaba nomi di Jeova. Salmista Davi nspiradu pa skirbi sin: ‘Jeova Deus, Deus di Israel, i mersi ngabadu . . . Si nomi gloriosu pa i ngabadu pa sempri’. (Sal 72:18, 19) No na kontinua diskubri nobu motivus interesanti di ngaba nomi di Jeova pa sempri.    

Nomi di Jeova ta representa tudu ke ku el propi i sedu. Ora ku no na pensa na nomi di Jeova no ta pensa na si amor. (1 Jon 4:8) No na lembra sempri di kuma Jeova kumpunu pabia di amor, i da resgati pabia di amor, tambi si manera di manda i justu i ta fasil ku amor. Ma, no na kontinua sinti amor ku Jeova tene pa nos pa sempri. No na pertusi mas del suma no Pape i ngaba si nomi gloriosu pa sempri. — Sal 73:28.