1. Kuma ku povu di Jeova staba organizadu na purmeru sekulu?

 ORA ku Jeova da si povu tarbaju pa fasi, i ta misti pa e fasil di un manera organizadu. (1 Kor 14:33) Pur isemplu, Jeova misti pa bon noba pregadu na tudu mundu. (Mat 24:14) Jeova da Jesus responsabilidadi di orienta es tarbaju. Jesus fasi tudu pa es tarbaju fasidu di un manera organizadu. Na purmeru sekulu, oca kongregasons formadu na manga di lugaris, ansions kujidu pa da orientason i toma diantera. (At 14:23) Na Jerusalen i tenba un grupu di ansions ku formadu pa apostolus ku garandis, ku ta tomaba disisons ku tudu kongregasons dibi di sigi. (At 15:2; 16:4) Suma e sigi orientasons ke risibi, “igreẑas fika e na bida mas forti na fe; kada dia e na aumenta na numeru.” — At 16:5.

2. Disna di 1919, kuma ku Jeova gia si povu, i da elis kumida spiritual?

² Jeova kontinua organiza si povu te aos. Disna di 1919, bas di orientason di Jeova, Jesus usa un grupusiñu di unjidus pa organiza tarbaju di pregason, i da kumida spiritual pa si sigiduris. a (Luk 12:42) I seduba klaru di kuma, Jeova staba na bensua tarbaju di ki grupu. — Isa 60:22; 65:​13, 14.

3-4. (a) Da isemplu di kuma ku no ta benefisia pa manera ku no sedu organizadu. (b) Ke ku no na bin fala del nes studu?

 ³ Si no ka seduba organizadu, no ka na konsigi fasi tarbaju ku Jesus danu pa fasi. (Mat 28:​19, 20) Pur isemplu, si ermons ka organizanuba pa prega na tiritoriu di no kongregason, kada kin pudi prega nunde ki misti. Alguns tiritorius pudi pregadu manga di bias pa manga di publikaduris, nkuantu ki utrus tiritoriu pudi ka ciga nunka di pregadu. Sera ki bu pensa na utrus manera ku sedu organizadu ta benefisianu?

⁴ Jesus kontinua organiza povu di Deus aos, suma ki organizaba si sigiduris ocalba na Tera. Nes studu, no na fala di isemplu ku Jesus disa i kuma ku no organizason ta sigi es isemplu. No na fala tambi di kuma ku no pudi mostra konfiansa na organizason di Jeova.

NO ORGANIZASON TA SIGI ISEMPLU DI JESUS

5. Kal ki un di manera ku no organizason ta sigi isemplu di Jesus? (Jon 8:28)

⁵ Ke ku Jesus ta fasi i fala, i aprindil di si Pape ku sta na seu. Organizason di Jeova ta sigi isemplu di Jesus, ora ke na usa Palabra di Deus pa judanu sibi ke ki bon ku ke ki mau i danu orientason na no vida. (Lei Jon 8:28; 2 Tim 3:​16, 17) No ta lembrantadu sempri pa lei Palabra di Deus i pa aplika ke ku no aprindi. Kuma ku no ta benefisia di sigi es konsiju?

6. Kal ki un di maneras importanti ku no ta benefisia di studa Biblia?

⁶ No ta benefisia ciu ora ku no usa no publikasons pa studa Biblia. Pur isemplu, no ta konsigi kompara ke ku Biblia ta nsina ku orientason ku no ta risibi di organizason. Ora ku no nota di kuma orientason ku no risibi basia na Biblia, no konfiansa na organizason di Jeova ta aumenta. — Rom 12:2.

7. Kal mensaẑen ku Jesus ta pregaba i kuma ku organizason di Jeova ta sigi si isemplu?

⁷ Jesus ta pregaba “Bon Noba di renu di Deus.” (Luk 4:​43, 44) Tambi, Jesus manda si sigiduris pa e prega aserka di Renu. (Luk 9:​1, 2; 10:​8, 9) Aos tambi, tudu kilis ku junta ku organizason di Jeova ta prega mensaẑen di Renu, i ka mporta nunde ke mora o manga di kusas ke tene di fasi na organizason.

8. Kal privileẑiu ku no tene?

⁸ I un privileẑiu konta utrus bardadi aserka di Renu di Deus! I ka tudu jintis ku tene es privileẑiu. Pur isemplu, oca Jesus staba na Tera, i ka disa pa spiritus mau da tustumuñu aserka del. (Luk 4:41) Aos tambi, antis di un algin kumsa ku prega juntu ku povu di Jeova, i dibi di vivi di un manera ku ta kontenta Jeova. No ta mostra di kuma no da balur pa privileẑiu garandi di prega, ora ku no ta papia ku jintis aserka di Renu di Deus na kualker lugar, i kualker mumentu ku no pudi fasil. Suma Jesus, no objetivu i sumia i regua simentera di bardadi di Renu na korson di jintis. — Mat 13:​3, 23; 1 Kor 3:6.

9. Kuma ku organizason di Jeova fasi pa jintis kunsi nomi di Deus?

⁹ Jesus fasi pa nomi di Deus kunsidu. Na orason ki fasi pa si Pape ku sta na seu, Jesus fala sin: “Ami N pui elis kunsiu”. (Jon 17:26) Organizason di Jeova ta kopia isemplu di Jesus ora ke ta fasi tudu ke pudi, pa juda utrus kunsi nomi di Deus. Un di manera ku organizason di Jeova fasi es i atraves di Tradução do  Novo Mundo da Bíblia Sagrada. Es traduson torna nomi di Deus na tudu lugaris ki staba nel na kumsada na linguas ki skirbiduba nel. Es traduson di Biblia ten gosi kompletu o na un parti, na mas di 270 lingua. Na broŝura Ajuda pa Studa Palabra di Deus paẑina 1 te 13, bu pudi aprindi ciu aserka di motivu ku pui nomi di Deus ribantadu na Biblia. La, bu na oja tambi motivu ku pui nomi di Deus dibi di sta na Skrituras Gregu Kriston 237 bias.

10. Ke ku bu aprindi di ke ku un minjer ku mora na Myanmar fala?

¹⁰ Suma Jesus, no misti juda manga di jintis ku no pudi pa e kunsi nomi di Deus. Oca ku un minjer na Myanmar ku tene 67 anu obi di kuma Deus tene nomi, i kumsa ku cora. I fala sin: “Es i purmeru bias na ña vida ku N obi di kuma nomi di Deus i Jeova. . . . Bu nsinan kusa mas importanti ku nunka N ciga di sibi.” Suma ku es isemplu mostra, ora ku un algin kunsi nomi di Deus, kila pudi muda si vida.

KONTINUA MOSTRA BU KONFIANSA NA ORGANIZASON DI JEOVA

11. Kuma ku ansions pudi mostra se konfiansa na organizason di Jeova? (Jubi tambi foto.)

¹¹ Kal ki un di maneras ku ansions pudi mostra se konfiansa na organizason di Jeova? Ora ku organizason da elis orientason, e pirsisa di leil diritu i fasi tudu ke pudi pa aplikal. Pur isemplu, e risibi orientason i ka so na kuma ke dibi di apresenta se partis na runion i fasi orasons pa kongregason, ma tambi na kuma ke dibi di kuida di karnelis di Kristu. Ansions ku ta sigi orientason di organizason ta juda kilis ke ta kuida del, pa e sinti suguru i amadu.

12. (a) Pabia ku no dibi di kopera ku kilis ku ta toma diantera? (Ebreus 13:​7, 17) (b) Pabia ku no dibi di konsentra na bon maneras di sedu di kilis ku ta toma diantera?

¹² Ora ku no risibi orientason di ansions, no dibi di sta dispostu pa sigil. Ora ku no fasil, no na pui pa i sedu mas fasil pa kilis ku ta toma diantera fasi se tarbaju. Biblia falanu pa no sedu obdienti, i sta bas di kilis ku ta toma diantera. (Lei Ebreus 13:​7, 17.) Utrora, es pudi sedu difisil. Pabia di ke? Pabia es omis ta yara. Ma, si no konsentra na se mau maneras di sedu en ves di se bon maneras di sedu, no ta sta na juda no inimigus. Pabia ku no pudi fala kila? No pudi kumsa ku pirdi konfiansa na organizason di Jeova, kusa ku no inimigus misti pa no fasi. Ke ku no pudi fasi pa rapada i nega mintidas di no inimigus?

KA BU DISA PA UTRUS PUI PA BU PIRDI KONFIANSA NA ORGANIZASON DI JEOVA

13. Kuma ku inimigus di Deus ta tenta pui pa no oja organizason di Jeova di mau manera?

¹³ Inimigus di Deus ta tenta pui pa bon kusas di organizason di Jeova parsi sedu mau. Pur isemplu, Jeova misti pa no sedu jintis limpu, tene bon komportamentu i adoral di manera ki misti. I fala di kuma kualker algin ku kontinua fasi mau kusas i ku ka misti muda, pa i tiradu di kongregason. (1 Kor 5:​11-13; 6:​9, 10) No ta sigi es mandamentu ku sta na Biblia. Ma suma no ta sigi es mandamentu, no inimigus ta fala di kuma no ka gosta di jintis, no ta kondena elis i no ka ta seta ningin ku sedu diferenti.

14. Kin ku sta tras di mintidas kontra organizason di Jeova?

 ¹⁴ No pirsisa di sibi kin ku sta na ataka organizason di Jeova. Satanas Diabu ku sta tras des mintidas. El i “pape di mintida.” (Jon 8:44; Kum 3:​1-5) Pa kila, no dibi di spera pa Satanas usa no inimigus pa konta mintidas kontra organizason di Jeova. Kila ojaduba na purmeru sekulu.

15. Ke ku ŝefis riliẑiosu fasi kontra Jesus ku si sigiduris?

¹⁵ Jesus i Fiju di Deus tambi i seduba perfeitu, i fasi milagris garandi, ma Satanas usa inimigus pa spaja mintidas kontra el. Pur isemplu, ŝefis riliẑiosu fala di kuma, puder ku Jesus tene di serka dimonius binba di “ŝef di dimonius”. (Mar 3:22) Oca Jesus staba na julgadu, ŝefis riliẑiosu akusal di kuma i fala mal kontra Deus, i e pui pa jintis pidi pa i matadu. (Mat 27:20) Mas tardi, oca sigiduris di Kristu sta na prega bon noba, kilis ku staba kontra elis, “cuci jintius” pa e pirsigi elis. (At 14:​2, 19) Sintinela di 1 di Dizembru di 1998 fala sin aserka di Atus 14:2: “Kilis ku apoia Satanas nega mensaẑen ku kristons staba na prega, tambi e fala mau kusas kontra elis pa jintis ka sukuta elis i pa e odia elis.”

16. Ke ku no dibi di lembra del si no obi mintidas kontra organizason di Jeova?

¹⁶ Satanas kontinua konta mintida te aos. I kontinua “ngana tudu mundu.” (Apok 12:9) Si bu obi mintidas ku faladu kontra organizason di Jeova o kontra ermons ku sta na toma diantera, lembra di kuma ku inimigus di Deus trataba Jesus ku disipulus di purmeru sekulu. Aos, povu di Jeova sta na pirsigidu i jintis sta na konta mintida kontra elis suma ku  Biblia falaba ja. (Mat 5:​11, 12) No ka na fia na mintidas, si no lembra di kin ku sta tras delis, i si no fasi algun kusa pa proteẑi no kabesa logu-logu. Kuma ku no pudi proteẑi no kabesa?

17. Kuma ku no pudi ivita sedu nganadu pa mintidas? (2 Timótiu 1:13) (Jubi tambi kuadru “ Ke ku bu dibi di fasi ora ku bu obi mintidas.”)

¹⁷ Nega mintidas. Apostolu Paulu fala di manera klaru ke ku no dibi di fasi si no obi mintidas. I fala Timótiu “pa manda sertu jinti . . . pa ka e liga ku storias” i pa e “libra di storias di mundu”. (1 Tim 1:​3, 4; 4:7) Un mininu pudi toma un kusa susu ku kai na con i pul na boka, ma un algin garandi ka na ciga nunka di fasil, pabia i sibi di kuma kila pudi pul pa i sta duenti. No ta nega mintida pabia no sibi kin ku sta tras del. En ves di kila, no ta pega na “palabra di bardadi”. — Lei 2 Timótiu 1:13.

18. Kuma ku no pudi mostra di kuma no konfia na organizason di Jeova?

¹⁸ No fala so di tris maneras ku organizason di Deus ta kopia Jesus. Ora ku bu na studa Biblia, tenta diskubri utrus maneras ku organizason di Jeova ta kopia isemplu di Jesus. Juda utrus na bu kongregason pa e aumenta se konfiansa na organizason di Jeova. Tambi kontinua mostra bu konfiansa, ora ku bu na sirbi Jeova di manera fiel i kontinua pertusi di organizason ki sta na usa pa fasi si vontadi. (Sal 37:28) Pa no kontinua da balur pa privileẑiu ku no tene di fasi parti di povu di Jeova ku ta mostra amor i ku sedu fiel.