1. Ke ki paraísu spiritual, i ke ku no dibi di sta disididu pa fasi?

 AOS i ten un paraísu na Tera ku tene manga di jintis ku sta okupadu na fasi bon kusas. I tene manga di jintis ku tene pas di bardadi. Kilis ku sta ja nes paraísu sta disididu di nunka sai di la. E misti tambi pa manga di jintis sta nes kondison spesial. Kal kondison? Paraísu spiritual! a

2. Ke ku ten di interesanti na paraísu spiritual?

² Interesanti i di kuma, Jeova kumpu un kau simboliku nunde ku jintis tene pas ku union, mesmu manera ke na vivi na un mundu mau i pirigosu di Satanas, nunde ku jintis odia n̈utru. (1 Jon 5:19; Apok 12:12) No Deus di amor ta oja kuma kes mundu ta dana jintis, ma i ta fasi pa si servus sinti suguru pa e pudi kontinua sirbil ku kontentamentu. Si Palabra fala di paraísu spiritual suma un “kau di sukundi”, i “jardin ku ta reguadu diritu”. (Isa 4:6; 58:11) Ku benson di Jeova, kilis ku mora nes paraísu ta sinti filis i suguru, nes ultimu tempu difisil. — Isa 54:14; 2 Tim 3:1.

3. Kuma ku profesia ku sta na Isaias kapitulu 65 kumpri na antigu Israel?

³ Jeova usa profeta Isaias pa fala di kuma ku vida di kilis ku sta na paraísu spiritual na sedu. Bu pudi oja es profesia  na Isaias kapitulu 65. I kumpri na antigu Israel na 537 AEK. Na ki anu, judeus ku ripindi libertadu di katiberasku na Babilonia i e riba pa se tera. Jeova bensua si povu i juda elis pa e kumpu Jerusalen ku danabuba pa i sedu mas un sidadi bonitu, i e torna kumpu templu pa i sedu un lugar nunde ke na adoral. — Isa 51:11; Zak 8:3.

4. Kuma ku profesia ku sta na Isaias kapitulu 65 sta na kumpri na no tempu?

⁴ Sugundu kumprimentu di profesia di Isaias kumsa na 1919 EK, oca adoraduris di Jeova di no tempu libertadu di katiberasku di Garandi Babilonia. Dipus, paraísu spiritual kumsa ku aumenta puku-puku na mundu ntidu. Publikaduris di Renu ku ta tarbaja di tudu korson forma manga di kongregasons i e ta mostra maneras di sedu di un kriston. Omis ku minjeris ku seduba violentu i ku teneba mau komportamentu, “bisti nobu naturesa ku Deus kumpu”. (Ef 4:24) Na bardadi, manga di bensons ku Isaias fala del, na kumpri na nobu mundu ku na bin. Ma desdi gosi, no sta na benefisia ciu, manera ku no sta nes paraísu spiritual. No na fala di kuma kes paraísu spiritual ta punu sinti i pabia ku no ka dibi di sai di la.

KUMA KU KILIS KU STA NA PARAÍSU SPIRITUAL TA SINTI

5. Suma ki faladu na Isaias 65:​13, ke ku no tene na paraísu spiritual?

⁵ No ta kume diritu i no ta sinti ben. Profesia di Isaias mostra diferensa garandi ku ten entri vida di kilis ku sta dentru di paraísu spiritual ku di kilis ku sta fora del. (Lei Isaias 65:13.) Jeova ta da si adoraduris tudu ke ke pirsisa del pa e kontinua pertusi del. No tene si spiritu santu, Biblia ku manga di kumida spiritual ku no pudi ‘kume, bibi, i kontenti.’ (Komparal ku Apokalipsi 22:17.) Ma situason diferenti ciu di kilis ku sta fora di paraísu spiritual. E ta ‘sufri fomi, tene sedi i pasa borgoña.’ E ka tene amisadi ku Deus. — Amos 8:11.

6. Kuma ku Joel 2:​21-24 fala di kusas spiritual ku Jeova ta danu, i kuma ke ta judanu?

⁶ Na si profesia, Joel usa kusas ku no pirsisa del na vida, suma trigu, biñu ku azeiti olivera pa mostra di kuma, Jeova ta da si povu tudu ke ke pirsisa del, nkluindu kumida spiritual. (Joel 2:​21-24) I ta fasil atraves di Biblia, no publikasons basiadu na Biblia, no runions, asembleias ku kongresus. No pudi apruveita des kumidas spiritual kada dia, asin no na kume diritu i sinti ben.

7. Ke ku ta danu “kontentamentu di korson”? (Isaias 65:14)

⁷ Kontentamentu. Povu di Deus pudi “kanta ku kontentamentu” pabia se korson inci di gardisimentu. (Lei Isaias 65:14.) Bardadis nkoraẑanti ku purmesas ku ta anima ku sta na Palabra di Deus ku speransa forti ku no tene, pabia di sakrifisiu di resgati di Kristu, ta danu “kontentamentu di korson”. Papia des kusas ku no ermons ku irmas spiritual, ta danu kontentamentu di bardadi! — Sal 34:8; 133:​1-3.

8. Kal dus kusas importanti ku ten na paraísu spiritual?

⁸ Amor ku union ku ten entri povu di Jeova i dus kusas importanti ku ten na paraísu spiritual. Es “unidadi kompletu”  ta judanu imaẑina kuma ku vida na sedu na nobu mundu, nunde ku servus di Jeova na tene amor ku union mas di ki aos. (Kol 3:14) Un irma fala di ke ki i nota na povu di Jeova oca i oja elis pa purmeru bias. I fala sin: “N ka sibiba kuma ku N pudi sedu filis, mesmu na ña familia. Purmeru bias ku N oja jintis na mostra amor di bardadi i oca N oja Tustumuñas di Jeova.” Kualker algin ku misti tene kontentamentu di bardadi, pirsisa di sta na no paraísu spiritual. I ka mporta ke ku es mundu ta pensa di servus di Jeova, e tene bon nomi dianti di Jeova i dianti di kilis ku ta adoral. — Isa 65:15.

9. Ke ku Isaias 65:​16, 17 purmiti aserka di kusas ku ta punu sinti dur i sufri?

⁹ No ta sta avontadi i sta kalmu. Isaias 65:14 fala di kuma, kilis ku disidi sta fora di paraísu spiritual ‘na grita ku tristesa di korson, i e na pupa, kebrantadu na spiritu.’ Ma ke ku no pudi fala di tudu kusas ku ta pui povu di Deus sinti dur i sufri? Ku tempu, es kusas na ‘diskisidu i sukundidu di uju di Deus.’ (Lei Isaias 65:​16, 17.) Jeova na kaba ku no purblemas, i ku tempu no ka na lembra mas di dur ku ki purblemas punu sinti.

10. Pabia ku bu pudi sinti di kuma i un benson sta juntu ku ermons ku irmas? (Jubi tambi foto.)

¹⁰ Mesmu gosi, no ta sinti mas kalmu ora ku no sta na no runions nunde ku no pudi sta avontadi i livri di preokupason des mundu mau. No ta juda tambi no ermons ku irmas pa e sinti kalmu, ora ku no mostra amor, alegria, pas, bondadi ku mansesa ku fasi parti di frutu di spiritu di Deus. (Gal 5:​22, 23) I un benson garandi fasi parti di organizason di Deus! Kilis ku kontinua na paraísu spiritual na bin oja ora ku Deus na kumpri tudu purmesa di kumpu “nobu seu ku nobu tera”.

11. Di akordu ku Isaias 65:​18, 19, ke ku paraísu spiritual ku Jeova kumpu dibi di lebanu fasi?

¹¹ No ta gardisi i sta animadu. Isaias splika pabia ku no dibi di ‘kontenti i kanta ku alegria’ na paraísu spiritual. Jeova ku kumpu es ambienti. (Lei Isaias 65:​18, 19.) I ka di dimira manera ku Jeova sta na usanu pa juda jintis disa organizasons di mundu, ku ka ta nsina elis bardadi aserka del, i juda elis fasi parti des ambienti spiritual bonitu! No kontenti  dimas pabia di bensons ku no tene di sta na bardadi, i no ta tene diseẑu forti di konta utrus aserka des bensons. — Jer 31:12.

12. Kuma ku purmesas ku faladu del na Isaias 65:​20-24 ta fasiu sinti i pabia di ke?

¹² Tambi no ta gardisi i sta animadu pa speransa ku no tene, pabia no mora na paraísu spiritual. Pensa so na tudu kusas ku no na bin oja i fasi na nobu mundu di Deus! Biblia fasi es purmesa: “I ka na ten nel mininu ku na muri ku puku dias, nin beju ku ka ciga na si tempu”. No ‘na kumpu kasas, i mora nel; no na paranta ortas di uva, i kume se fruta.’ No “ka na tarbaja amonton” pabia no na sedu ‘bensuadu pa Jeova.’ I purmiti danu suguransa, vida filis ku tene sintidu. “Antis de coma,” i na sibi ke ku kada algin pirsisa del, i na “fartanda diseẑu di tudu ku tene vida.” — Isa 65:​20-24; Sal 145:16.

13. Kal mudansas ku Isaias 65:25 fala jintis na fasi na se vida ora ke kumsa sirbi Jeova?

¹³ Pas ku suguransa. Ku ajuda di spiritu di Deus, manga di jintis ku kustumaba sedu violentu, gosta di geria i fasi malandrisa, fasi mudansas garandi na se vida. (Lei Isaias 65:25.) E sforsa ciu pa kaba ku mau komportamentu ke teneba. (Rom 12:2; Ef 4:​22-24) Ma, povu di Deus sedu inda imperfeitu, pa kila, no kontinua fasi erus. Mesmu asin, Jeova uni “tudu jinti” na amor ku pas di bardadi. (Titu 2:11) Es i un milagri ku so Deus ku tene tudu puder pudi fasi!

14. Kuma ku Isaias 65:25 kumpri na un ermon?

¹⁴ Sera ki jintis pudi muda se manera di sedu? Jubi es isemplu. Un joven ku prindiduba manga di bias oca ki teneba 20 anu, teneba mau komportamentu i seduba tambi violentu. I prindidu pabia di furta karu, furta na kaus di jintis i fasi utrus krimis gravi. I ta staba sempri pruntu pa geria ku kualker algin. Oca ki obi pa purmeru bias bardadi ku sta na Biblia, i kumsa ku mati runions di Tustumuñas di Jeova. I staba konvensidu di kuma si vida tene sintidu, ku sedu, adora Jeova na paraísu spiritual. Dipus ki batisa, manga di bias i ta pensa na kuma ku Isaias 65:25 ta aplika nel. I muda komportamentu ku parsi ku lion, ku sedu, algin violentu i pasa sedu suma karnel, ku sedu, algin di pas.

15. Pabia ku no misti kumbida utrus pa e sta juntu ku nos na paraísu spiritual, i kuma ku no pudi fasil?

¹⁵ Isaias 65 mostra di kuma i Jeova ku sta na papia. Si purmesas sempri ta kumpri. (Isa 55:​10, 11) Paraísu spiritual sta ja na izisti. Jeova pui pa i ten un familia di adoraduris ku ka ten kumpañer. Dentru di si povu, no pudi tene pas ku suguransa nes mundu violentu. (Sal 72:7) Pabia des, no misti juda manga di jintis ku no pudi pa e sta juntu ku nos nes familia spiritual. No pudi fasi es, ora ku no konsentra na fasi disipulus. — Mat 28:​19, 20.

KUMA KU NO PUDI JUDA UTRUS PA E MISTI YENTRA NA PARAÍSU SPIRITUAL

16. Ke ku pudi juda utrus pa e misti yentra na paraísu spiritual?

¹⁶ Kada un di nos pudi fasi un kusa ku na pui pa utrus misti yentra na paraísu spiritual. Pa fasi kila, no dibi di kopia  Jeova. I ka ta forsija jintis pa e fasi parti di si organizason. En ves di kila, i ta ‘tisi’ jintis pa rel ku bondadi. (Jon 6:44; Jer 31:3) Jintis di bon korson ku aprindi aserka di amor di Jeova ku si bon maneras di sedu, ta bai pa rel di manera natural. Kuma ku no bon maneras di sedu ku bon komportamentu, pudi pui pa jintis misti yentra na paraísu spiritual?

17. Kuma ku no pudi pui pa utrus misti yentra na paraísu spiritual?

¹⁷ Un di maneras ku no pudi pui pa utrus misti yentra na paraísu spiritual, i ora ku no ta trata no ermons ku irmas ku amor i ku bondadi. Ora ku jintis mati no runions, no misti pa e sinti di mesmu manera ku kilis ku mati runion pa purmeru bias na antigu Korintu. E falaba sin: “Na bardadi, Deus sta na bo metadi!” (1 Kor 14:​24, 25; Zak 8:23) Pa kila, no dibi di kontinua sigi konsiju di ‘vivi susegadu anti di nos.’ — 1 Tes 5:13.

18. Ke ku pudi pui pa utrus misti bin pa no organizason?

¹⁸ No dibi di sforsa sempri pa oja no ermons ku irmas suma ku Jeova ta oja elis. No ta fasil ora ku no konsentra na se bon maneras di sedu, i ka na se erus ku na bin disparsi ku tempu. No pudi risolvi kualker purblema ku no tene ku n̈utru ku amor, ora ku no ‘sedu bon, no sinti pena di n̈utru, no purda n̈utru.’ (Ef 4:32) Asin, jintis ku misti tratadu des manera, na misti fasi parti di paraísu spiritual. b

 KONTINUA DENTRU DI PARAÍSU SPIRITUAL

19. (a) Suma ki mostradu na kuadru “ E saiba dipus e riba,” ke ku alguns fala dipus ke riba pa paraísu spiritual? (b) Ke ku no dibi di sta disididu pa fasi? (Jubi tambi diseñu.)

¹⁹ No da balur garandi pa no paraísu spiritual! I mas bonitu di ki antis, tambi i tene mas adoraduris di Jeova di ki antis. No misti kontinua da balur pa paraísu ku Jeova fasi pa nos. Kualker algin ku misti sta animadu, sta kontenti, sta kalmu i sta suguru, dibi di bin pa paraísu spiritual i nunka sai di la! Ma, no pirsisa di toma manga di kuidadu, pabia Satanas sta na fasi tudu ki pudi pa ngananu, pa no pudi sai di la. (1 Ped 5:8; Apok 12:9) No ka dibi di disa pa i konsigi. No sforsa ciu pa proteẑi bonitasku, puresa ku pas di paraísu spiritual.