1. Kuma ku alguns ta sinti aserka di papia ku utrus na pregason? (Jubi tambi foto.)

 SUMA povu di Jeova no ta prega pabia no ama no Pape ku sta na seu, i no misti juda utrus pa e kunsil. Manga di publikaduris gosta di prega. Ma utrus ta oja di kuma i difisil. Pabia? Alguns ta medi i e ta pensa di kuma e ka pudi nsina diritu. Utrus ka ta sta avontadi di bai na kau di jintis sin ki jintis ka sibi. Alguns ta tene medu di kuma e na serkadu. Utrus edukadu pa ivita pui utrus fika mal. Mesmu ke ama Jeova ciu, es ermons ku irmas pudi oja di kuma i difisil prega bon noba pa jintis ke ka kunsi. Ma e oja importansia des tarbajau i e ta prega sempri. Jeova ta kontenti dimas ku elis!

2. Si i difisil tene kontentamentu na pregason, pabia ku bu ka dibi di fika disanimadu?

² Sera ki utrora i ta difisil tene kontentamentu na pregason pabia des sentimentus? Si resposta i sin, ka bu fika disanimadu. Bu falta di konfiansa pudi mostra di kuma bu sedu umildi, i bu ka misti coma ciu atenson pa bu kabesa. Tambi i ta mostra di kuma bu ka misti tene purblema ku utrus. Ningin ka misti serkadu, prinsipalmenti ora ki sta na tenta fasi bon kusas pa utrus. Bu Pape ku sta na seu sibi diritu kuma ku bu ta sinti, i misti dau ajuda ku  bu pirsisa del. (Isa 41:13) Nes studu no na oja sinku kusas ku pudi judanu lida ku es sentimentus, i kuma ku no pudi tene kontentamentu na pregason.

DISA PA PALABRA DI DEUS DAU FORSA

3. Ke ku juda profeta Jeremias pa i prega utrus?

³ Mesmu na tempu pasadu, mensaẑen di Deus daba si servus forsa oca e teneba tarbaju difisil pa fasi. No jubi isemplu di profeta Jeremias. I staba ku medu oca Jeova falal pa i prega. I fala sin: “A SIÑOR Deus! Ami N ka sibi papia, pabia N sedu mininu inda.” (Jer 1:6) Ke ku judal pa i tene koraẑen di prega? Palabra di Deus dal forsa. I fala sin: “Si palabra sta na ña korson suma fugu ku na yardi, ficadu na ña os; N ta fasi forsa pa guardal”. (Jer 20:​8, 9) Jeremias teneba un tiritoriu difisil, ma mesmu asin mensaẑen ki dadu pa konta, dal forsa ki pirsisa del pa prega.

4. Ke ku ta kontisi ora ku no ta lei Palabra di Deus i pensa fundu nel? (Kolosensis 1:​9, 10)

⁴ Kristons ta tene forsa ora ke lei mensaẑen ku sta na Palabra di Deus. Oca apostolu Paulu skirbi pa kongregason na Kolosus, i fala kuma tene kunsimentu di bardadi na pui pa si ermons “yanda na manera dignu di Siñor” nkuantu e na kontinua ‘mostra tudu koldadi frutu na bon kusas ke ta fasi’. (Lei Kolosensis 1:​9, 10.) Prega bon noba fasi parti di bon kusas ke ta fasi. Pa kila, ora ku no lei Palabra di Deus i pensa fundu nel, no fe na Jeova na sedu mas forti, i no na ntindi pabia ki importanti prega mensaẑen di Renu.

5. Kuma ku no pudi benefisia di leitura ku studu di Biblia?

⁵ Pa pudi benefisia di Palabra di Deus, no dibi di ivita lei, studa i medita rapidu. Toma tempu pa fasil. Si bu ciga na un parti di Biblia ki difisil pa bu ntindi, ka bu kambal. En ves di kila, buska splikason des versikulu na Índice das Publicações da Torre de Vigia o na Gia di Piskisa pa Tustumuñas di Jeova. Si bu toma tempu ora ku bu na studa, bu na tene mas sertesa di kuma ke ku Biblia fala i bardadi. (1 Tes 5:21) Mas bu sta konvensidu, mas bu na tene kontentamentu di konta utrus ke ku bu aprindi.

 PURPARA DIRITU PA PREGASON

6. Pabia ku no dibi di purpara diritu pa pregason?

⁶ Si bu purpara diritu pa pregason, bu pudi sta mas avontadi pa papia ku utrus. Jesus juda si disipulus purpara diritu antis di manda elis pa pregason. (Luk 10:​1-11) Suma e fasi ke ku Jesus fala elis pa e fasi, e konsigi fasi manga di bon kusas, i kila pui pa e kontenti dimas. — Luk 10:17.

7. Kuma ku no pudi purpara pa pregason? (Jubi tambi foto.)

⁷ Kuma ku no pudi purpara pa pregason? No pirsisa di pensa aserka di ke ku no misti papia, papia di un manera natural i usa no propi palabras. I na sedu di ajuda pensa na dus o tris manera ku jintis ta reaẑi na no tiritoriu, i pensa na kuma ku no pudi ruspundi. Dipus, ora ku no na papia ku jintis, no pudi tenta sta avontadi, ri i sedu amigavel.

8. Di kal manera ku kristons parsi ku vasu di lama ku apostolu Paulu usa na si komparason?

⁸ Apostolu Paulu fala sin pa si ermons ku irmas kriston: “No tene e rikesa na vasu di lama”. (2 Kor 4:7) Es rikesa i ke? I tarbaju di prega mensaẑen di Renu ku ta salba vida di jintis. (2 Kor 4:1) Ke ki vasu di lama? I na representa servus di Deus ku ta konta bon noba pa utrus. Na tempu di Paulu, komersiantis ta usa jarus di lama pa leba kusas di balur, suma kusas di kume, biñu ku diñeru. Di mesmu manera, Jeova danu mensaẑen di bon noba ku tene balur. Ku ajuda di Jeova no pudi tene forsa ku no pirsisa del pa kontinua prega.

ORA PA TENE KORAẐEN

9. Kuma ku no pudi vensi medu di omi o medu di jintis ku ka misti sukutanu? (Jubi tambi foto.)

⁹ Utrora, no pudi tene medu di omi o medu di jintis ku ka misti sukutanu. Kuma ku no pudi vensi es medu? Jubi orason di apostolus oca ke mandadu pa para prega. En ves de medi i para prega, e pidi Jeova pa i juda elis kontinua ‘fala si palabra ku tudu koraẑen’. (At 4:​18, 29, 31) Si utrora medu di omi ta punu fika preokupadu dimas, no dibi di ora tambi pa pidi ajuda di Jeova. Pidi Jeova pa i judau aumenta bu amor pa jintis,  asin bu ka na tene medu di konta elis bon noba.

10. Kuma ku Jeova ta judanu pa no sedu si Tustumuñas? (Isaias 43:​10-12)

¹⁰ Jeova kujinu pa no sedu si Tustumuñas, i purmiti di kuma i na judanu sedu koraẑosu. (Lei Isaias 43:​10-12.) No jubi kuatru maneras ki ta fasi kila. Purmeru, Jesus na sta ku nos na kualker kau ku no na prega bon noba. (Mat 28:​18-20) Sugundu, Jeova manda anjus pa judanu. (Apok 14:6) Terseru, Jeova danu si spiritu santu pa judanu lembra di kusas ku no aprindi. (Jon 14:​25, 26) Kuartu, Jeova danu no ermons ku irmas pa no tarbaja juntu. Ku ajuda di Jeova i ku di no ermons ku irmas ku ta mostra amor, no tene tudu ku no pirsisa del pa sedu koraẑosu i kontinua prega.

SIBI ADAPTA ORA KI PIRSIS I SEDU PUSITIVU

11. Ora ku no na prega, kuma ku no pudi oja manga di jintis? (Jubi tambi foto.)

¹¹ Sera ki bu ta fika disanimadu ora ku bu oja puku jintis na kasa? Pabia ku bu ka na punta bu kabesa: ‘Nunde ku jintis di ña tiritoriu sta nes mumentu?’ (At 16:13) ‘Sera ke sta na kau di tarbaju o e bai fasi kompra i bindi na fera?’ Si sedu sin, sera ki bu na oja manga di jintis si bu da tustumuñu na rua? Un ermon comadu Joshua fala sin: “N tene oportunidadi di prega ora ku N na yanda na kaus ku jintis ta fasi kompra, ku kaus ku jintis ciu.” El ku si minjer Bridget, e ta oja tambi manga di jintis na kasa ora ke visita elis ditardiñu ku dumingu di tardi. — Ef 5:​15, 16.

12. Kuma ku no pudi sibi ke ku jintis ta fia nel o ke ku ta preokupa elis?

¹² Si na kumsada algin ku bu na papia ku el ka mostra interesi pa mensaẑen, tenta sibi ke ki ta fia nel o ke ku ta preokupal. Joshua ku Bridget ta usa purgunta ku sta na kumsada di tratadu, ora ke na papia ku jintis. Pur isemplu, se usa tratadu Kuma ku bu ta nkara Biblia? e ta fala sin: “Alguns ta fala di kuma Biblia i livru di Deus i utrus ka ta fia na kila. Abo gora, ke ku bu pensa?”  Manga di bias es ta leba na un bon kombersa.

13. Pabia ku no pudi sai ben na pregason mesmu si utrus ka sukutanu? (Ditus 27:11)

¹³ Sai ben na pregason ka dipindi di rusultadus ku no tene. Pabia di ke? Pabia no fasi ke ku Jeova ku si Fiju misti pa no fasi, ku sedu, da tustumuñu. (At 10:42) Mesmu si no ka oja ningin pa papia ku el, o jintis ka seta sukutanu, no pudi tene kontentamentu, pabia no sibi di kuma no sta na kontenta no Pape ku sta na seu. — Lei Ditus 27:11.

14. Pabia ku no dibi di kontenti ora ku utru publikadur oja un algin ku sta interesadu na tiritoriu?

¹⁴ No pudi tambi kontenti ora ku utru publikadur oja un algin ku sta interesadu na tiritoriu. Sintinela kompara no tarbaju ku tarbaju di buska un mininu ku pirdi. Manga delis ta juda na buskal, e ta bai na tudu ladu. Ora ku mininu ojadu tudu jintis ta kontenti, i ka so kin ku ojal. Di mesmu manera, no tarbaju di fasi disipulu i un tarbaju di ekipa. No pirsisa di kada algin na kongregason pa prega tudu jintis na tiritoriu, i anos tudu no ta kontenti ora ku un algin kumsa ku mati runions.

KONSENTRA NA BU AMOR PA JEOVA I PA JINTIS

15. Kuma ku aplika Mateus 22:​37-39 pudi judanu aumenta no kontentamentu na pregason? (Jubi tambi foto.)

¹⁵ No pudi aumenta no kontentamentu na pregason, ora ku no konsentra na no amor pa Jeova i pa jintis. (Lei Mateus 22:​37-39.) Imaẑina kuma ku Jeova ta kontenti ora ki ojanu na prega, i kuma ku jintis ta kontenti ora ke kumsa studa Biblia! Lembra tambi di kuma, kilis ku sukuta no mensaẑen i disidi sirbi Jeova, pudi tene vida ku ka ta kaba. — Jon 6:40; 1 Tim 4:16.

16. Kuma ku no pudi tene kontentamentu na pregason, ora ku no ka pudi sai di no kasa? Bu pudi da isemplus.

¹⁶ Sera ki bu ka pudi sai di bu kasa pa algun motivu? Si sedu asin, konsentra na ke ku bu pudi fasi pa mostra bu amor pa Jeova i pa jintis. Duranti duensa di COVID-19, Samuel ku Dania ka pudiba  sai di se kasa. Duranti ki tempu difisil e ta pregaba sempri pa telefoni, skirbi kartas i diriẑi studus di Biblia na Zoom. Samuel ta pregaba jintis ki oja na klinika nunde ki ta baiba risibi tratamentu di kankru. I fala sin: “No staba kansadu dimas na sintidu mental, fisiku i spiritual. No pirsisaba di tene kontentamentu na no sirvisu pa Jeova.” Na mesmu tempu, Dania kai i ka pudiba lanta di kama pa tris mis. Dipus i pirsisaba di kareta di roda pa seis mis. I fala sin: “N tenta fasi tudu ku N pudi. N konsigi prega nfurmera ku ta visitanba i N ta papiaba ku kilis ku ta tisi kusas pa kasa. Tambi N teneba bon kombersa na telefoni ku representanti di un impresa ku ta bindiba materialis pa ospital.” Situason di Samuel ku Dania ta tuji elis fasi tudu ke misti, ma e ta fasi ke ke pudi i e kontenti ku kila.

17. Kuma ku bu pudi apruveita mas di ke ku faladu nes studu?

¹⁷ Tenta aplika tudu sinku kusas ku faladu del nes studu. Kada un delis i suma un kusa ku ta usadu pa kusiña. Ora ku tudu kusas pudu juntu, i ta da bon gustu. Ora ku no aplika tudu ke ku faladu nes studu, no na sta ben purparadu pa lida ku sentimentus negativu, i tene mas kontentamentu na pregason.