1. Ke ku Jeova misti pa no fasi?

 UN DI mumentus mas filis di un omi ku minjer i ora ku se fiju padidu. Ma mesmu si papes gosta ciu di se fiju, e ka ta misti pa i kontinua sedu bebe. Na bardadi, e na preokupa ciu si i ka kirsi. Di mesmu manera, Jeova ta kontenti ora ku no kumsa aprindi aserka del, ma i ka misti pa no para la. (1 Kor 3:1) En ves di kila, i falanu pa no sedu kristons “maduru”. — 1 Kor 14:20.

2. Ke ku no na bin fala del nes studu?

² Ke ku signifika sedu un kriston maduru? Ke ku no pirsisa di fasi pa sedu un kriston maduru? Kuma ku studa bardadis fundu di Biblia ta juda pa no amisadi ku Jeova torna mas forti? Ke ku manda no dibi di ivita konfia ciu na no kabesa? Nes studu, no na oja respostas des purguntas.

KE KU SIGNIFIKA SEDU UN KRISTON MADURU?

3. Ke ku signifika sedu un kriston maduru?

³ Na Biblia, palabra gregu ku traduzidu pa “maduru” pudi tambi signifika “perfeitu” i “kompletu”. (1 Kor 2:6) Suma ku un bebe ta kontinua kirsi tok i torna algin garandi, anos tambi no dibi di kontinua torna no amisadi ku Jeova mas forti. Asin no ta torna kristons maduru. Mesmu si no sedu maduru, no ka dibi di para kirsi na sintidu spiritual. (1 Tim 4:15) Anos tudu, te mesmu jovens, pudi sedu kristons maduru. Ma kuma ku no pudi sibi si no sedu un kriston maduru?

4. Kuma ku un kriston maduru ta sedu?

⁴ Un kriston maduru ta fasi tudu ke ku Jeova falal pa  i fasi. I ka ta fasi so kusas ki misti fasi. Suma i sedu imperfeitu, i pudi fasi erus. Ma kada dia i ta fasi si minjor pa pensa i aẑi di un manera ku ta kontenta Jeova. I tene nobu manera di sedu, tambi i ta sforsa pa kontinua pensa suma Jeova. (Ef 4:​22-24) I aprindi toma bon disisons basiadu na leis ku prinsipius di Jeova. Pa kila, i ka pirsisa di manga di regras ku na kontal ke ki i dibi di fasi. Ora ki toma un disison, i ta sforsa ciu pa fasi ke ki i disidi. — 1 Kor 9:​26, 27.

5. Ke ku pudi kontisi ku un kriston ku ka maduru? (Efésius 4:​14, 15)

⁵ Pa utru ladu, un kriston ku ka maduru pudi ku fasilidadi disviadu pa ‘nganu’ ku “tarpasa”. I pudi fia na kilis ku ta spalia nobas ku ta ngana, ku ka tene basi, i fia na storias falsu ku ta kontadu na meius di kumunikason. O i pudi nganadu pa apostatas. a (Lei Efésius 4:​14, 15.) I pudi nveẑa utrus, tene purblemas ku elis, o i ta lestu ku paña raiba. Tambi i pudi fasi ke ki mau ora ki tentadu. — 1 Kor 3:3.

6. Kuma ku sedu maduru pudi komparadu ku un mininu ku sta na kirsi? (Jubi tambi fotos ku diseñus.)

⁶ Suma ki faladu na kumsada, Biblia kompara sedu maduru na sintidu spiritual ku un mininu ku sta na kirsi pa sedu algin garandi. Un mininu ka tene jiresa, pa kila i pirsisa pa un algin garandi proteẑil i gial. Pur isemplu, un mame pudi fala si fiju pa i pegal mon ora ke na kamba strada. Ora ku si fiju na kirsi, mame pudi disal pa i kamba strada el son, ma i na kontinua lembrantal pa i jubi tudu dus ladu antis di kamba. Ora ku mininu garandi, i na sibi ivita es tipu di pirigus. Suma ku mininus pirsisa di ajuda di jintis garandi pa ivita pirigus, asin tambi ku kristons ku ka sedu maduru, ta pirsisa di ajuda di kristons maduru pa ivita pirigus spiritual i toma bon disisons. Ma, ora ku kristons maduru tene un disison pa toma, e ta pensa na prinsipius di Biblia pa sibi ke ku Jeova ta pensa aserka di ki asuntu. Dipus e ta aplika ke ke aprindi.

7. Sera ki kristons maduru pirsisa di ajuda di utrus?

 ⁷ Sera ki es signifika di kuma un kriston maduru ka pirsisa nunka di ajuda di utrus? Nau. Utrora kristons maduru pirsisa tambi di pidi ajuda di utrus. Ma algin ku ka maduru ta misti pa utrus kontal ke ki dibi di fasi, o toma un disison ku el propi i dibi di toma. Pa utru ladu, un kriston maduru ta apruveita di jiresa ku spiriensia di utrus. I sibi di kuma i el ku na toma si propi disisons i “karga si propi kargu.” — Gal 6:5.

8. Di kal maneras ku kristons maduru diferenti di n̈utru?

⁸ Suma ku jintis garandi ka ta parsi ku n̈utru, asin tambi ku kristons maduru ta tene maneras di sedu diferenti. Pur isemplu, i ten kilis ku sedu mas jiru, ku sedu koraẑosu dimas, ku ta pati i ku ta pui se kabesa na lugar di utrus. Tambi ora ku dus kristons maduru sta na mesmu situason, e pudi toma disisons diferenti di n̈utru ma ku ka sta kontra Biblia. Es ta kontisi ora ke toma un disison basiadu na se konsiensia. Pa kila, e ka ta julga utrus ku toma disisons ku sedu diferenti delis. En ves di kila, e ta kontinua unidu. — Rom 14:10; 1 Kor 1:10.

KE KU NO PIRSISA DI FASI PA SEDU UN KRISTON MADURU?

9. Sera ki no ta dati so no sedu kristons maduru? Bu pudi splika.

⁹ Konformi tempu na bai, un mininu ta kirsi, ma i ta sedu diferenti na sintidu spiritual. No ka pudi dati so no sedu kristons maduru. Pur isemplu, ermons ku irmas di Korintu seta bon noba, e batisadu, e risibi spiritu santu, tambi e aprindi ciu di nsinamentu di apostolu Paulu. (At 18:​8-11) Ma, alguns anus dipus di se batismu, manga delis kontinua sedu mininus na sintidu spiritual. (1 Kor 3:2) Kuma ku no pudi ivita pa es ka kontisi ku nos?

10. Ke ku no dibi di fasi pa sedu maduru? (Judas 20)

¹⁰ Pa sedu maduru, purmeru no dibi di misti sedu maduru. Kilis ku “ama tulesa” ta misti kontinua sedu mininus na sintidu spiritual i nunka sedu kristons maduru. (Dit 1:22) No ka misti parsi ku kilis ku sedu garandi, ma ku kontinua dipindi di se papes pa toma disisons pa relis. En ves di kila, no misti asumi no reponsabilidadi i tene sertesa di kuma no amisadi ku Jeova kontinua torna mas forti. (Lei Judas 20.) Si bu kontinua sforsa pa sedu maduru, ora Jeova pa i dau “diseẑu ku puder pa kumpri si bon vontadi.” — Fil 2:13.

11. Ke ku Jeova danu pa judanu sedu maduru? (Efésius 4:​11-13)

¹¹ Jeova ka misti pa no sedu maduru ku no propi forsa. I danu ansions ku kilis ku ta nsina na kongregason pa judanu sedu “maduru” na sintidu spiritual i “kirsi tok no yangasa altura kompletu di Kristu”. (Lei Efésius 4:​11-13.) Jeova tambi danu si spiritu santu pa judanu tene “pensamentu di Kristu.” (1 Kor 2:​14-16) Alen di kila, Jeova danu kuatru ivanjelius ku mostranu kuma ku Jesus ta pensa, papia i aẑi kontra i staba na Tera. Ora ku bu kopia manera di pensa i aẑi di Jesus, bu pudi yangasa bu objetivu di sedu kriston maduru.

BARDADIS FUNDU DI BIBLIA TA JUDA

12. Ke ki “kumsada di nsinamentu aserka di Kristu”?

¹² Pa pudi sedu maduru, no dibi di  tambi “disa kumsada di nsinamentu aserka di Kristu,” ku sedu, purmeru nsinus ku un kriston ta aprindi. Alguns des purmeru kusas ku no aprindi i aserka di ripindimentu, fe, batismu ku resureison. (Eb 6:​1, 2) Es i alguns di purmeru nsinamentus ku tudu kristons ta fia nel. I pabia di kila ku apostolu Pedru papia delis, oca ki prega manga di jintis na Pentekostis. (At 2:​32-35, 38) No dibi di seta es purmeru nsinamentus pa sedu disipulus di Kristu. Pur isemplu, Paulu mostra di kuma si no ka fia na resureison, no ka pudi fala di kuma no sedu kristons di bardadi. (1 Kor 15:​12-14) Ma, no dibi di aprindi mas di ki so es purmeru nsinamentus pa pudi sedu kristons maduru.

13. Suma ki faladu na Ebreus 5:​14, ke ku no dibi di fasi pa apruveita di bardadis fundu di Biblia? (Jubi tambi foto.)

¹³ Diferenti di purmeru nsinamentus, bardadis fundu di Biblia ka tene so leis di Jeova, ma tambi i tene si prinsipius ku ta judanu ntindi si pensamentu. Pa apruveita des bardadis, no dibi di studa, pensa fundu na ke ku no studa i fasi no minjor pa aplika ke ku no aprindi. Ora ku no fasil, no ta aprindi toma disisons ku na kontenta Jeova. b — Lei Ebreus 5:14.

14. Kuma ku Paulu juda kristons di Korintu pa e sedu maduru?

¹⁴ I ta sedu difisil pa un kriston ku ka sedu maduru toma un disison ora ki ka ten un lei na Biblia. Ora ki ka ten lei na Biblia, alguns pudi pensa di kuma e pudi fasi ke ke misti. Utrus ta pidi un regra ora ki ka pirsis un regra. Pur isemplu, i parsi di kuma kristons na Korintu pidi Paulu un regra si kontra e dibi di kume kumida ku sakrifikadu pa un idulu. En ves di konta elis ke ke dibi di fasi, Paulu mostra elis di kuma, kada kin tene “liberdadi” di kuji, basiadu na ke ku si konsiensia pirmitil fasi. I fala di alguns prinsipius di Biblia ku pudi juda elis toma bon disison ku na disa elis ku konsiensia  limpu i ku ka na pui utrus disvia di fe. (1 Kor 8:​4, 7-9) Asin Paulu juda kristons di Korintu kirsi na sintidu spiritual, pa e pudi usa se propi kapasidadi di ntindimentu, en ves di dipindi di utru algin o buska so regras.

15. Kuma ku Paulu juda kristons Ebreus kirsi na sintidu spiritual?

¹⁵ No aprindi utru lison importanti di ke ku Paulu skirbi pa kristons Ebreus. Alguns ka kontinua kirsi na sintidu spiritual. Na bardadi, e “pirsisa di dadu liti, te pa bianda risu.” (Anos ku pui letras karegadu ku italiku; Eb 5:12) E ka aprindi i seta nobu kusas ku Jeova nsina elis na kongregason. (Dit 4:18) Pur isemplu, manga di judeus kontinua pui utrus sigi Lei di Moisés, mesmu pa manera ku 30 anu atras sakrifisiu di Jesus kaba ku Lei. (Rom 10:4; Titu 1:10) Es 30 anu daba kristons tempu sufisienti pa ntindi di kuma e ka pirsisa mas di sigi ki Lei! Kualker algin ku lei karta nspiradu di Paulu pa Ebreus, pudi tene sertesa di kuma es livru tene bardadis fundu. Es karta judaba elis oja di kuma, nobu manera di adora Jeova ku kumsadu pa Jesus i mas minjor. Tambi i daba elis koraẑen di kontinua prega mesmu ku pirsigison di judeus. — Eb 10:​19-23.

NO IVITA KONFIA CIU NA NO KABESA

16. Alen di sedu maduru, ke ku no dibi di fasi?

¹⁶ No dibi di sforsa ciu i ka so pa sedu maduru, ma tambi pa kontinua sedu maduru. Es ta iziẑi pa no kontinua ivita konfia ciu na no kabesa. (1 Kor 10:12) No dibi di ‘jubi no kabesa’ pa tene sertesa di kuma no kontinua bai pa dianti. — 2 Kor 13:5.

17. Kuma ku karta di Paulu pa Kolosensis mostra di kuma, no pirsisa di kontinua sedu maduru?

¹⁷ Na si karta pa Kolosensis Paulu mostra di kuma, no pirsisa di kontinua sedu maduru. Kristons di Kolosus seduba maduru, ma mesmu asin, Paulu fala elis di kuma e pirsisa di kuida ciu, pa ka disviadu pa manera di pensa di jintis di mundu. (Kol 2:​6-10) Tambi Epafras, ku talves kunsi diritu kilis ku sta na kongregason,  ora sempri pa e pudi sedu “maduru na fe”. (Kol 4:12) Ke ku no pudi aprindi des? Paulu ku Epafras ntindiba di kuma pa kontinua sedu maduru i pirsis sforsa ciu i tene ajuda di Deus. E mistiba pa kristons na Kolosus kontinua sedu maduru, mesmu ku purblemas ke staba na pasa.

18. Ke ku pudi kontisi ku un kriston maduru? (Jubi tambi foto.)

¹⁸ Paulu avisa kristons Ebreus di kuma, un kriston maduru pudi pirdi fabur di Deus pa tudu tempu. Si i nega sukuta Jeova i pudi lunjusi del, asin i ka na konsigi ripindi i risibi purdon di Jeova. Filismenti, kristons Ebreus ka staba na ki situason. (Eb 6:​4-9) Ke gora di kilis ku torna inativus o disasosiadu, ma dipus e bin ripindi? Se ripindi di bardadi, e na mostra di kuma e ka sedu suma kilis ku Paulu fala del ku pudi pirdi fabur di Deus pa tudu tempu. Ma, ora ke riba pa Jeova, e pirsisa di ajuda ku Jeova ta da. (Eze 34:​15, 16) Ansions pudi pidi un ermon o irma maduru pa e juda elis tene mas amisadi ku Jeova.

19. Kal objetivu ku no dibi di tene?

¹⁹ Si bu na sforsa pa sedu un kriston maduru, bu pudi yangasa bu objetivu! Kontinua aprindi bardadis fundu ku sta na Biblia i sforsa pa pensa suma Jeova. Si bu sedu ja kriston maduru, fasi tudu ku bu pudi pa kontinua asin gosi i pa tudu tempu.