1-2. (a) Ke ki pekadu, i kuma ku no pudi ngaña luta kontra pekadu? (Jubi tambi “Palabra ku Splikadu.”) (b)  Ke ku no na fala del nes studu i na utrus studu ku sta nes Sintinela? (Jubi tambi “Nota pa leitoris” nes Sintinela.)

 SERA ki bu misti sibi te kal puntu ku Jeova amau? Un bon manera di oja resposta des purgunta, i ora ku bu buska sibi ke ki i fasi, pa pudi salbau di pekadu ku mortu. Pekadu a i un inimigu garandi ku bu ka pudi vensi ku bu propi forsa. Kada dia no ta fasi pekadu, i no ta muri pabia di pekadu. (Rom 5:12) Ma i ten un bon noba. Jeova garantinu di kuma i na salbanu di pekadu ku mortu.

² I fasi ja kuas 6 mil anu ku Jeova sta na juda pekaduris luta kontra pekadu. Pabia? Pabia i amanu. I gosta di pekaduris disna ki kumpu elis, pa kila, i fasi manga di kusas pa juda elis ora ke peka. Deus sibi di kuma pekadu ta leba pa mortu, ma i ka misti pa no muri. I misti pa no vivi pa sempri. (Rom 6:23) Kila ki misti pa bo. Nes studu, no na ruspundi tris purguntas: (1) Kal speransa ku Jeova da pa pekaduris? (2) Kuma ku pekaduris na tempus bibliku ta kontenta Jeova? (3) Ke ku Jesus fasi pa salba pekaduris di pekadu ku mortu?

 KAL SPERANSA KU JEOVA DA PA PEKADURIS?

3. Ke ku pui Adon ku Eva peka?

³ Oca Jeova kumpu purmeru omi ku purmeru minjer, i mistiba pa e sedu filis. I da elis kau di mora bonitu, un bon kasamenti ku un tarbaju ku ta da elis kontentamentu. E dibi di inci Tera ku se fijus, i pui pa tudu Tera sedu paraísu suma jardin di Eden. I daba elis un ordi simplis. I avisa elis di kuma, si e disidi disobdisi si ordi e na muri. No sibi ke ku kontisi. Un anju mau ku ka ama Deus nin pekaduris, tenta elis pa e fasi pekadu. Adon ku Eva fasi ke ku ki anju mau mistiba. E ka konfia na se Pape ku gostaba ciu delis. En ves di obdisil e peka. Suma ku no sibi, ke ku Jeova fala kumpri. Pabia di se disobdiensia, Adon ku Eva sufri pa restu di se vida. E beju, i dipus e muri. — Kum 1:​28, 29; 2:​8, 9, 16-18; 3:​1-6, 17-19, 24; 5:5.

4. Pabia ku Jeova odia pekadu, i kuma ki ta judanu pertusi del? (Romanus 8:​20, 21)

⁴ Jeova pui pa skirbi es storia na Biblia, pa no pudi ntindi un kusa importanti. I judanu ntindi pabia ki odia pekadu. Pekadu ta lunjusinu di no Pape, tambi i ta tisi mortu. (Isa 59:2) Satanas odia Jeova ku pekaduris. E ku manda i tenta Adon ku Eva pa e peka, tambi i kontinua tentanu aos. Talves i pensaba di kuma i dana ke ku Jeova mistiba pa pekaduris. Ma i ka ntindiba te kal puntu ku Jeova i Deus di amor. Deus nunka muda intenson ki teneba pa fijus di Adon ku Eva. Deus ama pekaduris, pa kila, i da logu speransa pa relis tudu. (Lei Romanus 8:​20, 21.) Jeova sibiba di kuma alguns fijus di Adon na disidi amal i pertusi del. Suma i sedu se Pape i kin ku kumpu elis, i na da elis oportunidadi pa e libertadu di pekadu ku mortu i pertusi del. Ke ku Jeova fasi pa es sedu pusivel?

5. (a) Na kal mumentu ku Jeova da speransa pa pekaduris? (b) Ke ku profesia di Kumsada 3:15 fala?

⁵ Lei Kumsada 3:15. Atraves des profesia, Jeova da pekaduris speransa. I fala di ke ku na bin kontisi ku Satanas. Jeova fala di kuma un “jorson” o fiju na bin salba pekaduris. Es fiju na bin kaba ku Satanas i kaba ku tudu purblemas ki tisi na Eden. (1 Jon 3:8) Ma purmeru, Satanas na ‘murdi’ es fiju o i na matal. Es na pui pa Jeova fika tristi dimas. Jeova staba dispostu pa sufri, i disa pa si Fiju sufri pa pudi salba pekaduris di pekadu ku mortu.

KUMA KU PEKADURIS NA TEMPUS BIBLIKU TA KONTENTA JEOVA?

6. Ke ku omis fiel, suma Abel ku Noe fasi pa pudi pertusi di Jeova?

⁶ Pa manga di anus, Jeova splika puku puku kuma ku pekaduris pudi pertusi del. Dipus di rebelion na Eden, Abel, sugundu fiju di Adon ku Eva, seduba purmeru pekadur ku tene fe na Jeova. Abel amaba Jeova, i mistiba kontental i pertusi del, pa kila, i fasi sakrifisiu pa Jeova. Abel seduba bakiadur, i toma purmeru fijus di si karnel i mata i fasi oferta pa  Jeova. Kuma ku Jeova reaẑi? I “risibi Abel ku si oferta ku kontentamentu”. (Kum 4:4) Jeova setaba mesmu tipu di sakrifisiu di utru jintis ku amal i ku konfia nel, suma pur isemplu Noe. (Kum 8:​20, 21) Manera ku Jeova seta es sakrifisius, i mostra di kuma pekaduris pudi torna tene mas si fabur i pertusi del. b

7. Ke ku no pudi aprindi manera ku Abraon staba pruntu pa sakrifika si propi fiju?

⁷ Jeova fala Abraon, un omi di fe garandi, pa i fasi un kusa difisil dimas. I falal pa i da si propi fiju Isaki suma sakrifisiu. Es dibi di seduba difisil dimas pa Abraon. Ma i obdisi Jeova. Oca ku Abraon staba kuas pa mata si fiju, Deus paral. Jeova sibi di kuma Abraon na staba ku dur garandi si mata si propi fiju. Es isemplu ta nsinanu ke ku Jeova na bin fasi. Jeova na bin sta dispostu pa da si propi Fiju suma sakrifisiu. Jeova ama pekaduris ciu dimas. — Kum 22:​1-18.

8. Ke ku no pudi aprindi di sakrifisius di limaria ku Lei ta mandaba fasi? (Sirmonias 4:​27-29; 17:11)

⁸ Oca Jeova da Lei pa israelitas, i fala elis pa e sakrifika limarias pa se pekadus pudi purdadu. (Lei Sirmonias 4:​27-29; 17:11.) Es sakrifisius mostra di kuma, Jeova na bin da sakrifisiu mas minjor ku na bin kaba ku tudu pekadu di pekaduris. Deus fala si profetas pa e skirbi di kuma, fiju purmitidu ku bin sedu Fiju spesial di Deus, dibi di sufri i matadu. I na sedu suma karnel ku ta matadu pa sakrifisiu. (Isa 53:​1-12) Imaẑina so es: Jeova fasi pa si propi Fiju ki ama sakrifikadu, pa salba pekaduris di pekadu ku mortu, nkluindu abo!

KE KU JESUS FASI PA SALBA PEKADURIS DI PEKADU?

9. Ke ku Jon Batista fala aserka di Jesus? (Ebreus 9:22; 10:​1-4, 12)

⁹ Na anu 29 EK, Jon Batista oja Jesus di Nazaré, i fala sin: “Ali karnel di Deus ku ta tira pekadu na mundu.” (Jon 1:29) Es palabras mostra di kuma, Jesus i kil jorson ku Deus purmitiba. Jesus na bin sakrifika si vida. Pa fin, Fiju di Jeova bin pa salba pekaduris di pekadu di un bias. — Lei Ebreus 9:22; 10:​1-4, 12.

10. Kuma ku Jesus mostra di kuma i “bin coma” kilis ku ta fasi pekadu?

¹⁰ Jesus konsentra purmeru na juda jintis ku sinti mal pabia e ta fasi pekadu. I kumbida elis pa e sedu si sigiduris. I sibi di kuma pekadu i motivu prinsipal ku ta pui jintis sufri. Pa kila, i juda omis ku minjeris ku jintis kunsi suma kilis ku ta fasi pekadu. Na un komparason ki fasi i fala sin: “Kilis ku san e ka pirsisa di mediku, ma son kilis ku sta duenti.” Dipus i fala: “N bin coma kilis ku ta fasi pekadu.” (Mat 9:​12, 13) I es propi ku Jesus fasi. Ku bondadi, i purda un minjer ku laba si pe ku lagrimas. (Luk 7:​37-50) Jesus nsina bardadis importanti pa un minjer samaritanu, mesmu manera ki sibi di kuma i staba na vivi ku un omi ki ka di sil. (Jon 4:​7, 17-19, 25, 26) Jintis ta  muri pabia di pekadu. Ma Deus da Jesus puder di lantanda omis, minjeris i ku mininus ku muri. — Mat 11:5.

11. Pabia ki kilis ku ta fasi pekadu ta sinti ben ora ke pertu Jesus?

¹¹ Na bardadi, no pudi ntindi pabia ku jintis ku ta fasi mal ta sinti ben ora ke pertu Jesus. I ntindiba kuma ke ta sinti, tambi i ta trataba elis ku bondadi. E ta sinti ben ora ke pertu Jesus. (Luk 15:​1, 2) Jesus ngaba elis pa fe ke mostra nel, tambi i trata elis ku bondadi. (Luk 19:​1-10) Jesus mostra di kuma i sinti pena di jintis suma si Pape. (Jon 14:9) Manera ku Jesus ta papia ku jintis i trata elis, ta nsinanu kuma ku Jeova sedu. I ta nsinanu di kuma, Jeova ta mostra di kuma i ta sinti pena di kilis ku ta fasi pekadu, i ama elis, tambi i misti juda elis. Jesus juda kilis ku ta fasi pekadu pa e misti muda se manera di vivi i sigil. — Luk 5:​27, 28.

12. Ke ku Jesus nsinanu aserka di si mortu?

¹² Jesus sibiba di kuma i na bin da si vida suma sakrifisiu. Manga di bias, i fala si sigiduris di kuma i na traidu i matadu na un staka. (Mat 17:22; 20:​18, 19) I sibiba di kuma si sakrifisiu na tira tudu pekadu di mundu, suma ku Jon batista i ku utrus profetas falaba. Jesus fala tambi di kuma  dipus ki muri, i na “junda tudu jinti” pa rel. (Jon 12:32) Kilis ku ta mostra fe na Jesus i ku ta sforsa pa kopial, pudi kontenta Jeova. Si e fasi kila, e na “libradu di pekadu”. (Rom 6:​14, 18, 22; Jon 8:32) Pa kila, di livri vontadi i ku koraẑen Jesus seta sufri ciu tok i muri pa pudi salbanu. — Jon 10:​17, 18.

13. Kuma ku Jesus muri, i ke ku si mortu ta nsinanu aserka di Jeova Deus? (Jubi tambi diseñu.)

¹³ Jesus traidu, i prindidu, i akusadu, i kobadu i kondenadu, te mesmu i turturadu. Soldadus lebal na kau ki na matadu i e pregal na staka. Nkuantu i staba na nguenta tudu es dur ku fidelidadi, i tenba un Algin ku staba ku dur mas garandi. Ki Algin i Jeova Deus. I tene puder garandi pa tuji si Fiju sufri, ma i ka fasil. Jeova ama si Fiju ciu dimas. Pabia ki disal pa i sufri i muri? Pabia i amanu. Jesus fala sin: “Deus ama jinti di mundu dimas, tok i da si uniku Fiju, pa tudu kil ku setal ka ta pirdi, ma i ta tene vida ku ka ta kaba.” — Jon 3:16.

14. Ke ku sakrifisiu di Jesus ta nsinau?

¹⁴ Sakrifisiu di Jesus i prova garandi di kuma Jeova ama fijus di Adon ku Eva. I ta mostra di kuma Jeova amau dimas. I sakrifika si Fiju ki ama ciu, tambi i nguenta dur garandi ku no ka pudi imaẑina, pa pudi salbau di pekadu ku mortu. (1 Jon 4:​9, 10) I misti juda kada un di nos luta kontra pekadu, tambi i misti bin kaba ku el di manera kompletu na futuru.

15. Ke ku no dibi di fasi pa benefisia di sakrifisiu di resgati di Jesus?

¹⁵ Prenda di Deus, ku sedu, sakrifisiu di resgati di si uniku Fiju, pui pa no pekadu purdadu. Ma pa tene purdon di Deus, no dibi di fasi un kusa. Kila i ke? Jon Batista ku Jesus, da resposta pa es purgunta: “Bo ripindi di bo pekadu, pabia renu di seu sta pertu.” (Mat 3:​1, 2; 4:17) Suma anos i pekaduris, no pirsisa di ripindi pa pudi kontinua sirbi Jeova i pertusi del. Ma ke ki ripindi signifika i kuma ki pudi judanu kontenta Jeova mesmu si no ta peka? Studu ku na bin na ruspundi es purgunta.