1-2. (a) Kuma ku Jeova ta sinti aserka di kilis ku fasi pekadu gravi i ku nega ripindi? (b) Ke ku Jeova misti pa kilis ku fasi pekadu fasi?

 JEOVA ka ta seta tudu tipu di komportamentu. I odeia pekadu. (Sal 5:​4-6) Jeova misti pa no obdisi si mandamentus ku sta na si Palabra. Ma Jeova sibi di kuma no sedu imperfeitu, i no ka pudi obdisil di manera perfeitu. (Sal 130:​3, 4) Na mesmu tempu, i ka ta seta ‘jintis ku nega Deus i ku tursi palabra ku konta aserka di fabur di Deus, pa i sedu diskulpa di se mau vida.’ (Jud 4) Na bardadi, Biblia fala di kuma “jinti ku nega Deus na kabadu ku el” na gera di Armajedon. — 2 Ped 3:7; Apok 16:16.

² Ma, Jeova ka misti pa ningin kabadu ku el. Suma ku no oja na studus ku pasa, Biblia kontanu di manera klaru di kuma, Jeova ‘misti pa tudu pudi ripindi.’ (2 Ped 3:9) Suma Jeova, ansions ta sedu pasienti ora ke na tenta juda un algin ku fasi pekadu, pa i ripindi i tene mas fabur di Jeova. Ma, i ka tudu kilis ku fasi pekadus gravi ku ta seta ripindi. (Isa 6:9) Alguns ta kontinua fasi pekadu, mesmu si ansions sforsa pa juda elis manga di bias. Ke ku ansions dibi di fasi nes situason?

“BO TIRA KI OMI MAU”

3. (a) Ke ku Biblia fala i dibi di fasidu ku kilis ku fasi pekadu i ku nega ripindi? (b) Ora ku un algin nega ripindi, pabia ku no pudi fala di kuma, i el ku disidi tira si kabesa di kongregason?

³ Ora ku un algin ku fasi pekadu nega ripindi, ansions  dibi di sigi orientason ku sta na 1 Koríntius 5:​13, ku fala sin: “Bo tira ki omi mau na bo metadi.” Algin ku fasi pekadu sibi di kuma, si ka ripindi i na tiradu di kongregason. Pa kila, i suma si disidi tira si propi kabesa di kongregason. I sta na kebra ke ki i sumia. (Gal 6:7) Pabia ku no pudi fala kila? Pabia algin ku fasi pekadu, nega muda mesmu dipus ku ansions tenta judal manga di bias. (2 Re 17:​12-15) Si asons mostra di kuma, i ka misti obdisi mandamentus di Jeova. — Lei 30:​19, 20.

4. Pabia ki ta fasidu un anunsiu, ora ku un algin ku nega ripindi tiradu di kongregason?

⁴ Ora ku un algin ku nega ripindi tiradu di kongregason, i ta fasidu un anunsiu pa konta kongregason di kuma i ka sedu mas Tustumuña di Jeova. a Objetivu des anunsiu i ka pa pasanta ki algin borgoña. Ma, es anunsiu ta fasidu pa ermons ku irmas pudi obdisi ordi di Biblia ku fala, pa para “junta” ku kil algin, i ‘nin pa ka kume ku el.’ (1 Kor 5:​9-11) I ten bon motivu ku pui Jeova da es ordi. Apostolu Paulu fala sin: “Un bokadu di fermentu ta orfa masa tudu”. (1 Kor 5:6) Si un algin ku ka ripindi di si pekadu ka tiradu di kongregason, utrus pudi pensa di kuma e ka pirsisa di obdisi ke ku Jeova fala. — Dit 13:20; 1 Kor 15:33.

5. Kuma ku no dibi di oja un algin ku tiradu di kongregason, i pabia di ke?

⁵ Ma, kuma ku no dibi di oja un ermon o irma ku tiradu di kongregason? Mesmu manera ku no ka ta pasa tempu ku el, no dibi di lembra di kuma, situason di ki algin i ka sin speransa. En ves di kila, no dibi di ojal suma un karnel ku pirdi. Ora ku un karnel sai di koral i pudi riba mas. Lembra di kuma, es karnel ku pirdi dedika si vida pa Jeova. Infilismenti, i ka sta na vivi di akordu ku si dedikason nes mumentu, pa kila i pudi pirdi speransa di vivi pa sempri. (Eze 18:31) Ma suma i ten inda tempu, i Jeova sta pruntu pa purda, no tene speransa di kuma kil algin na muda. Kuma ku ansions pudi juda algin ku fasi pekadu gravi i ku tiradu di kongregason?

KUMA KU ANSIONS TA JUDA KILIS KU TIRADU DI KONGREGASON

6. Ke ku ansions na fasi pa juda kin ku tiradu di kongregason?

⁶ Ora ku un algin tiradu di kongregason, sera ki ansions ta para judal pa i riba pa Jeova? Nau, e ka ta para! Ora ku kumison di ansions konta algin ku fasi pekadu ku ka ripindi di kuma i na tiradu di kongregason, e ta kontal tambi ke ki i dibi di fasi pa riba pa kongregason. Ma ansions na fasi mas di ki es. Na manga di situasons, e na konta ki algin ku fasi pekadu gravi di kuma, e misti ojal mas dipus di puku misis, pa jubi si i muda si manera di pensa. Si dipus di puku misis i seta oja ku ansions, e na nkoraẑal pa i ripindi i riba pa Jeova. Mesmu si i ka ripindi na ki mumentu, ansions na tenta ojal mas na futuru, i nkoraẑal pa i ripindi.

7. Kuma ku ansions ta kopia pena ku Jeova ta sinti, ora ku un algin tiradu di kongregason? (Jeremias 3:12)

 ⁷ Ansions ta kopia Jeova ku ta sinti pena di kilis ku tiradu di kongregason. Pur isemplu, na pasadu Jeova ka ta speraba pa si povu Israel ripindi antis di tenta juda elis. Ma, i ta manda si profetas pa relis, mesmu antis de ripindi. Na sugundu studu des Sintinela, no oja kuma Jeova falaba Oseias pa i purda si minjer, i ribantal kasa mesmu manera ki staba na fasi pekadu gravi. Des manera, Jeova nsina si povu di kuma, i ta sinti pena garandi. (Ose 3:1; Mal 3:7) Ansions ku ta kopia Jeova, ta misti pa kin ku fasi pekadu ripindi i riba pa kongregason, tambi e ka ta pui pa i difisil pa ki algin riba. — Lei Jeremias 3:12.

8. Kuma ku komparason ku Jesus fasi aserka di fiju ku pirdi, ta judanu ntindi pena garandi ku Jeova ta sinti pa kilis ku bandonal? (Lukas 15:7)

⁸ Lembra kuma ku pape reaẑi, na komparason ku Jesus fasi di fiju ku pirdi. Oca ku pape oja logu si fiju i “kuri, i barsal, i dal beẑu.” (Luk 15:20) Nota di kuma, pape ka pera pa si fiju pidil purdon. En ves di kila pape kuri pa si fiju, pabia i amal. Ansions ta sforsa pa fasi mesmu kusa pa kilis ku bandona Jeova. E misti pa kilis ku disa Jeova pa e riba pa rel. (Luk 15:​22-24, 32) Ora ku un algin ku fasi pekadu riba, Jeova, Jesus, anjus ku tudu kongregason ta kontenti dimas! — Lei Lukas 15:7.

9. Ke ku Jeova misti pa kilis ku fasi pekadu fasi?

⁹ Te li no aprindi di kuma, Jeova ka ta disa kilis ku ka misti ripindi di se pekadus kontinua na kongregason. Ma, i ta kontinua juda elis. I misti pa e riba. Sentimentu di Jeova pa kilis ku ripindi, mostradu na Oseias 14:​4, ku fala sin: “N na kura se kurupson, N na ama elis di korson, pabia N ka ten mas raiba kontra elis.” Sibi kuma ku Jeova ta sinti, ta nkoraẑa ansions pa e sta atentu pa kualker mudansa ku mostra di kuma, kil algin kumsa ku ripindi. Tambi es palabras ta nkoraẑa ciu kilis ku disa Jeova pa e riba mas rapidu.

10-11. Kuma ku ansions ta tenta juda kilis ku tiraduba di kongregason?

¹⁰ Kuma ku ansions ta tenta juda kilis ku tiraduba di kongregason, talves manga di anus atras? I pudi sedu di kuma e para fasi kusas ku pui pa e tiradu di kongregason. Alguns pudi te ka lembra di ke ku pui e tiradu di kongregason. I ka mporta kantu tempu ku un algin sta fora di kongregason, ansions na tenta buska nunde ki sta i visital. Duranti es visitas, te mesmu ansions na ora ku el i nkoraẑal pa i riba pa kongregason. Na bardadi, si un algin afasta di kongregason pa manga di anus, i na sta fraku dimas na sintidu spiritual. Asin, si kil algin fala di kuma i misti riba pa kongregason, ansions pudi pidi un algin pa i diriẑi un studu di Biblia ku el, mesmu antis di i ribantadu pa kongregason. Na tudu es situasons, i so ansions ku na fasi aranẑu pa es tipu di studu di Biblia.

¹¹ Ansions ta tenta kopia pena ku Jeova ta tene pa jintis. Asin e ta buska tudu kilis ku disa Jeova i nkoraẑa elis pa e riba pa rel. Ora ku un algin ku fasi  pekadu ripindi i disa si mau komportamentu, i pudi ribantadu pa kongregason sin tarda. — 2 Kor 2:​6-8.

12. (a) Na kal situasons ku ansions dibi di toma manga di kuidadu? (b) Pabia ku no ka dibi di pensa di kuma, Jeova nunka ka na purda sertu tipu di pekadu? (Jubi tambi nota bas di paẑina.)

¹² Na sertu situasons, ansions pirsisa di toma manga di kuidadu antis di ribanta un algin na kongregason. Pur isemplu, si un algin seduba kulpadu di abusa na mininu, o i seduba apostata, o i fasiba planu pa kai cai, pa pudi kaba ku si kasamenti, ansions pirsisa di tene sertesa di kuma i ripindi di bardadi. (Mal 2:14; 2 Tim 3:6)  Ansions dibi di proteẑi ermons ku irmas na kongregason. Na mesmu tempu, no pirsisa di nota di kuma, Jeova na seta kualker algin ku fasi pekadu i ku na bardadi ripindi i para fasi mau kusas. Pa kila, mesmu si ansions misti tene sertesa di kuma, un algin ku ku fasi mal ku diskarna ripindi di bardadi, e ka dibi di pensa di kuma kil algin nunka ka na pudi risibi purdon di Jeova. b — 1 Ped 2:10.

KE KU KONGREGASON PUDI FASI

13. Kal ki diferensa ku ten entri manera ku no ta trata un algin ku reprendidu pa ansions, ku manera ku no ta trata un algin ku tiradu di kongregason?

¹³ Suma ku no oja na studu ku pasa, utrora i ta fasidu un anunsiu di kuma un algin reprendidu. Nes situason, no pudi kontinua sta ku el, pabia i muda si komportamentu ku si manera di pensa. (1 Tim 5:20) I kontinua fasi parti di kongregason, tambi i pirsisa di nkoraẑamentu di ermons ku irmas. (Eb 10:​24, 25) Ma situason ta sedu diferenti ora ku un algin tiradu di kongregason. No ta para “junta” ku kil algin, ‘nin no ka ta kume ku el.’ — 1 Kor 5:11.

14. Kal disison ku un kriston pudi toma, ora ki na trata ku kilis ku tiradu di kongregason? (Jubi tambi foto.)

¹⁴ Sera ki ke ku no oja te li signifika di kuma, no ka pudi kumbida un algin ku tiradu di kongregason pa mati runion o ka falal manteña ora ki mati runion? Nau. Sin duvida, no ka na pasa tempu ku el. Ma kristons pudi disidi si e na kumbida un algin ku tiradu di kongregason, talves un parenti o un amigu intimu, pa mati runion di kongregason. Ke gora si bin mati runion? Na pasadu, no ka ta falaba ki algin manteña. Mas un bias, kada kriston pirsisa di usa ke ki aprindi na Biblia, pa disidi ke ki na  fasi. Alguns pudi sta avontadi pa falal manteña, o risibil diritu ora ki bin runion. Ma, no ka dibi di tene kombersa kumpridu ku el, o pasa tempu na fasi utru kusas ku el.

15. Kal tipu di jintis ku ta fasi pekadu ku faladu del na 2 Jon 9-11? (Jubi tambi kuadru “ Sera ki Jon ku Paulu staba na fala di mesmu tipu di pekadu?”)

¹⁵ Ma alguns pudi punta: ‘Sera ki Biblia ka fala di kuma, un kriston ku fala manteña pa es algin, ta toma parti na kusas mau ki na fasi?’ (Lei 2 Jon 9-11.) Kontestu di 2 Jon 9-11 mostra di kuma, es algin i apostata o kualker algin ku sta na tenta pui pa utrus fasi ke ku Biblia fala i ka bali. (Apok 2:20) Pa kila, si un algin kontinua nsina utrus nsinus di apostatas o pui pa utrus fasi ke ku Biblia fala i ka bali, ansions ka na visital. Sin duvida, es algin pudi ripindi. Ma, antis des kontisi, no ka dibi di falal manteña o kumbidal pa mati runion.

KOPIA PENA GARANDI KU JEOVA TA SINTI

16-17. (a) Ke ku Jeova misti pa kilis ku fasi pekadu fasi? (Ezekiel 18:32) (b) Kuma ku ansions pudi tarbaja juntu ku Jeova, ora ke na juda kilis ku fasi pekadu?

¹⁶ Ke ku no aprindi nes Sintinela? Jeova ka misti pa ningin kabadu ku el! (Lei Ezekiel 18:32.) Jeova misti pa kilis ku fasi pekadu, fasi pas ku el. (2 Kor 5:20) E ku manda Jeova sempri ta nkoraẑa si servus ku disal, pa e ripindi i riba pa rel. Ansions di kongregason tene privileẑiu di tarbaja juntu ku Jeova, pa juda kilis ku fasi pekadus gravi pa e ripindi. — Rom 2:4; 1 Kor 3:9.

¹⁷ Imaẑina kontentamentu ku ta ten na seu, ora ku kilis ku fasi pekadu ripindi! No Pape ku sta na seu, Jeova, ta tene es kontentamentu kada bias ku un di si karnelis ku pirdi, riba pa kongregason. No amor pa Jeova ta kontinua aumenta, ora ku no pensa fundu na pena ki ta sinti pa jintis, i pensa fundu na si bondadi ku no ka mersi. — Luk 1:78.