1. Ke ku pudi kontisi dipus ku un algin fasi pekadu gravi?

 NA STUDU ku pasa, no oja ke ku apostolu Paulu fala kongregason di Korintu pa e fasi, oca ku un omi fasi un pekadu gravi. Suma omi ka ripindi i tenba di tiradu di kongregason. Ma suma ku no oja na testu nunde ku no studu basia nel, Deus pudi leba un algin ku fasi pekadu gravi pa i ripindi. (Rom 2:4) Kuma ki ta usa ansions pa juda un algin ripindi?

2-3. Ke ku no dibi di fasi si no sibi di kuma un ermon o irma fasi un pekadu gravi, i pabia di ke?

² Si ansions ka sibi di kuma un algin fasi un pekadu gravi, e ka na pudi judal. Pa kila, ke ku no dibi di fasi si no sibi di kuma un ermon o irma fasi un pekadu gravi, ku sedu un kusa ku pudi pui pa i tiradu di kongregason? No dibi di fala ki algin pa i pidi ajuda di ansions. — Isa 1:18; At 20:28; 1 Ped 5:2.

³ Ma si nega gora papia ku ansions? La ja, anos propi no pudi bai papia ku ansions, asin ki algin pudi risibi ajuda ki na pirsisa del. Si no fasi es, no na mostra amor pa no ermon o irma pabia no sibi di kuma ansions na judal. Si ki algin kontinua fasi pekadu, i na dana si amisadi ku Jeova. I pudi tambi dana nomi di kongregason. Pa kila, nin si na sedu difisil, no na konta ansions, pabia di amor pa Jeova i pa no ermon o irma ku fasi pekadu. — Sal 27:14.

 KUMA KU ANSIONS PUDI JUDA KILIS KU FASI PEKADU GRAVI

4. Kal ki objetivu di ansions, ora ke na runi ku algin ku fasi pekadu gravi?

⁴ Ora ku un algin na kongregason fasi un pekadu gravi, korpu di ansions ta kuji entri elis tris ansions kualifikadu pa forma un kumison. a Es omis pirsisa di sedu umildi i rikuñisi di kuma, e ka pudi forsa un algin pa i muda. Apesar di kuma e na sforsa pa juda un algin ku fasi pekadu pa i ripindi, e sibi di kuma e ka pudi pul pa i muda aforsa. (Lei 30:19) Ansions sibi di kuma, i ka tudu kilis ku fasi pekadu ku na ripindi, suma rei Davi. (2 Sam 12:13) Alguns ku fasi pekadu pudi disidi nega konsiju di Jeova. (Kum 4:​6-8) Nin ku sin, objetivu di ansions i fasi tudu ke pudi pa leba algin ku fasi pekadu pa ripindi. Ke ku ansions dibi di lembra del ora ke na runi ku un algin ku fasi pekadu?

5. Kal konsiju ku ansions dibi di lembra del, ora ke na runi ku un algin ku fasi pekadu? (2 Timótiu 2:​24-26) (Jubi tambi diseñu.)

⁵ Ansions ta oja kin ku fasi pekadu suma un karnel di balur ku pirdi. (Luk 15:​4, 6) Pa kila, ora ke runi ku ki algin, e ka na papia ku el di manera duru o tratal sin bondadi. Nin e ka dibi di pensa kuma e pirsisa so di fasi purguntas pa sibi ke ku pasa. Ma e dibi di mostra maneras di sedu ku faladu del na 2 Timótiu 2:​24-26. (Lei.) E dibi di sedu mansu i mostra bondadi, ora ke na sforsa pa toka korson di un algin ku fasi pekadu.

6. Kuma ku ansions ta purpara se korson antis di runi ku algin ku fasi pekadu? (Romanus 2:4)

⁶ Ansions ta purpara se korson. E ta lembra di palabras di Paulu ku fala sin: ‘Bondadi di Deus i pa lebau pa ripindimentu’. (Lei Romanus 2:4.) Asin, e ta fasi sforsu di kopia manera ku Jeova ta trata ku bondadi kilis ku fasi pekadu. Ansions i bakiaduris i e pirsisa di sigi orientason di Kristu i kopia si isemplu na manera ke ta kuida di kongregason. (Isa 11:​3, 4; Mat 18:​18-20) Antis di runi ku algin ku fasi pekadu, ansions ta pidi ajuda di Jeova na orason, pa pudi judal ripindi. E na fasi piskisa na Biblia i na no publikasons, e na pidi tambi Jeova na orason pa i juda elis ntindi ki algin, i  ntindi si situason. E na papia di ke ke sibiba ja di ki algin i de ke ke pirsisa di sibi del, ku talves lebal na pensa di ki manera o fasi pekadu. — Dit 20:5.

7-8. Kuma ku ansions ta kopia pasensa di Jeova, ora ke runi ku algin ku fasi pekadu?

⁷ Ansions ta kopia pasensa di Jeova. E ta lembra di kuma ku na pasadu Jeova tenta juda kilis ku fasi pekadu. Pur isemplu, Jeova mostra pasensa ku Kain. I kontal ke ku na kontisi si ka muda, i di kuma i na bensual si obdisil. (Kum 4:​6, 7) Jeova manda Profeta Natan pa bai konsija Davi. Natan usa un komparason ku juda Davi ripindi. (2 Sam 12:​1-7) Tambi Jeova kontinua “manda” si profetas manga di bias pa israelitas oca ke disobdisil. (Jer 7:​24, 25) I ka pera pa si povu ripindi pa i kumsa juda elis. Ma, oca ke na fasiba inda pekadu, i fala elis pa e ripindi.

⁸ Ansions ta kopia isemplu di Jeova, ora ke na juda kilis ku fasi pekadu gravi. E ta trata elis “ku tudu pasensa” suma ku 2 Timótiu 4:2 fala. Asin, un ansion dibi di sedu sempri kalmu i mostra pasensa pa juda algin ku fasi pekadu tene diseẑu di fasi ke ki sertu. Si ansion paña raiba o fika mal dimas, ki algin pudi ka sukuta konsiju o i pudi nega ripindi.

9-10. Kuma ku ansions pudi juda un algin pensa na ke ku lebal fasi pekadu?

⁹ Ansions ta tenta sibi kal kusas ku leba ki algin fasi pekadu. Pur isemplu, sera ki i torna fraku na sintidu spiritual, pabia i ka ta fasi sempri studu pesual o prega? Sera ki i ta dati nan i ora o i ta ora so pa ora? Sera ki i disa pa diseẑus mau toma konta del? Ba kin ki ta pasa tempu ku el? Kal kusas ki ta divirti ku el? Kuma ku es disison influensia si manera di pensa ku si diseẑus? Sera ki i ntindi kuma ku si Pape, Jeova, sinti ku ke ki fasi?

¹⁰ Ansions pudi fasi ki algin purguntas, ku na judal pensa na kusas ku pui si amisadi ku Jeova torna fraku i ku lebal na fasi pekadu. E ta fasi es ku bondadi, sin yentra na kusas ke ka pirsisa di sibi. (Dit 20:5) Alen di kila, e pudi usa komparason, suma ku Natan fasi ku Davi, pa juda ki algin ntindi di kuma ke ki fasi ka sta diritu. Talves purmeru bias ki na runi ku ansions, i pudi kumsa ku sinti tristesa pa ke ki fasi. I pudi te mesmu ripindi.

11. Kuma ku Jesus ta trataba kilis ku fasi pekadu?

¹¹ Ansions ta sforsa pa kopia isemplu di Jesus. Jesus juda Paulu, i fasil es purgunta interesanti: “Saulu, Saulu, ke ku manda bu na pirsigin?” Ku es purgunta, Jesus juda Paulu oja di kuma ke ki staba na fasi ka sta diritu. (At 9:​3-6) I na kasu di “ki minjer Jezabel” b Jesus fala: “N dal tempu pa i ripindi”. — Apok 2:​20, 21.

12-13. Kuma ku ansions ta da algin ku fasi pekadu tempu pa i ripindi? (Jubi tambi foto.)

¹² Suma Jesus, ansions ka na lestu ku pensa di kuma, ki algin ku fasi pekadu ka na ripindi. I bardadi di kuma alguns pudi ripindi na purmeru runion ke fasi ku ansions, ma utrus pudi pirsisa di mas tempu pa pudi ripindi. Pa kila, ansions  pudi programa runi ku algin ku fasi pekadu, mas di ki un bias. Talves dipus di purmeru runion, ermon o irma ku fasi pekadu pudi kumsa ku pensa fundu na ke ki faladu. I pudi mostra umildadi i pidi Jeova pa i purdal. (Sal 32:5; 38:18) Asin, na prosimu runion, ki algin ku fasi pekadu pudi mostra un atitudi diferenti di kil ki mostraba na purmeru runion.

¹³ Pa leba algin ku fasi pekadu pa ripindimentu, ansions ta pui se kabesa na si lugar i e ta mostra bondadi. E ta ora Jeova pa i bensua se sforsu i e ta tene speransa di kuma, ki ermon o irma na rekupera si juisu i ripindi. — 2 Tim 2:​25, 26.

14. Kin ku dibi di ngabadu ora ku un algin ku fasi pekadu ripindi, i pabia di ke?

¹⁴ Ora ku un algin ripindi, no ta kontenti dimas! (Luk 15:​7, 10) Kin ku dibi di ngabadu ora ku un algin ku fasi pekadu ripindi? Sera ki i ansions? Lembra di ke ku Paulu fala aserka di kilis ku fasi pekadu: ‘Talves Deus ta da elis ripindimentu’. (2 Tim 2:25) I Jeova ku juda ki ermon o irma muda si manera di pensa ku si komportamentu, i ka utru algin. Paulu splika bon kusas ku ta kontisi dipus ku un algin ripindi. Ki algin pudi kunsi bardadi diritu, rekupera si juisu i kapli di armadilia di Satanas. — 2 Tim 2:26.

15. Kuma ku ansions pudi kontinua juda algin ku fasi pekadu i ku ripindi?

¹⁵ Ora ku un algin ku fasi pekadu ripindi, ansions na kontinua fasil visitas di pastoreiu. Asin, i na pudi kontinua risibi ajuda ki pirsisa del, pa luta kontra armadilia di Satanas i fasi ke ki sertu. (Eb 12:​12, 13) I klaru kuma, korpu di ansions ka na konta ningin ke ku ki algin fasi. Ma ke ku kongregason pirsisa di sibi?

 “RAPRINDI ELIS DIANTI DI TUDU”

16. Di akordu ku 1 Timótiu 5:​20, ba kin ki “tudu” ku Paulu na falaba del?

¹⁶ Lei 1 Timótiu 5:20. Paulu fala Timótiu ku seduba tambi ansion, pa i raprindi kilis ku ta fasi pekadu “dianti di tudu”. Sera ki palabras “dianti di tudu” ta rifiri sempri tudu jintis na kongregason? Nau. Oca ku Paulu fala di “dianti di tudu”, i staba na rifiri tudu kilis ku sibi di ki pekadu. Utrora i pudi sedu kilis ku sedu tustumuñu di ki pekadu, o kilis ku kil algin ku fasi pekadu konta. Ansions na konta so e jintis di kuma asuntu tratadu i di kuma, ki algin ku fasi pekadu dadu konsiju forti.

17. Si un pekadu gravi sibidu pa manga di jintis na kongregason, o i pudi bin sibidu, kal anunsiu ku dibi di fasidu, i pabia di ke?

¹⁷ Pur isemplu, un pekadu pudi sibidu pa manga di jintis na kongregason, o manga di jintis pudi bin sibi del. Nes kasu, palabras “dianti di tudu” na nklui tudu jintis na kongregason. Pa kila, un ansion na fasi anunsiu pa kongregason di kuma ki ermon o irma raprendidu. Pabia di ke? Suma ku Paulu fala di manera klaru, asin utrus pudi aprindi di ke ku kontisi i pa e ka fasi pekadu gravi.

18. Si un algin ku ka ciga 18 anu fasi un pekadu gravi, ke ku ansions na fasi? (Jubi tambi foto.)

¹⁸ Ke ku ansions na fasi si un algin batisadu ku ka ciga 18 anu fasi un pekadu gravi? Korpu di ansions na fasi aranẑu pa dus ansions runi ku el juntu ku si papes ku sedu Tustumuñas di Jeova. c  Ansions na tenta sibi ke ku papes fasi ja pa juda se fiju ripindi. Si joven ku fasi pekadu sukuta konsiju di si papes i muda si manera di pensa ku si komportamentu, ki dus ansions pudi disidi di kuma i ka pirsis pa un kumison di ansions runi ku el juntu ku si papes. Ansions sibi di kuma Jeova da papes responsabilidadi di kuriẑi se fijus ku amor. (Lei 6:​6, 7; Dit 6:20; 22:6; Ef 6:​2-4) Ansions na ba ta dati e oja ku papes pa sibi si se fiju sta na risibi ajuda ki pirsisa del. Ma si joven ka ripindi i kontinua fasi mal, ke ku ansions na fasi? Nes kasu, un kumison di ansions na runi ku el juntu ku si papes.

‘JEOVA TA SINTI GARANDI PENA KU MISERIKORDIA’

19. Kuma ku ansions ta sforsa pa kopia Jeova ora ke runi ku un algin ku fasi pekadu gravi?

¹⁹ Ansions ku na sirbi na kumison, tene responsabilidadi dianti di Jeova di manti kongregason limpu. (1 Kor 5:7) E misti tambi fasi tudu ke pudi pa juda ki algin ku fasi pekadu pa i ripindi. I ora ke na judal e ta tene sempri speransa di kuma i na muda. Pabia di ke? Pabia e misti kopia Jeova ku “ta sinti garandi pena ku miserikordia.” (Tiagu 5:11) Apostolu Jon trata si ermons ku irmas ku amor. I fala sin: “Ña fijus, N na skirbi bos e kusas pa ka bo peka. Ma si algin fasi un pekadu, no ten un algin justu, ku sedu Jesus Kristu, ku ta difindi pa nos dianti di no Pape.” — 1 Jon 2:1.

20. Ke ku no na bin fala del na ultimu studu des Sintinela?

²⁰ Inflismenti, utrora un ermon o irma ta nega ripindi. Si es kontisi, i dibi di tiradu di kongregason. Kuma ku ansions ta fasi nes kasus gravi? No na bin fala des, na ultimu studu des Sintinela.