STUDU 33
KANTIKU 130 Vamos Perdoar-nos Uns aos Outros
Kuma ku kongregason pudi kopia manera ku Jeova ta trata kilis ku fasi pekadu gravi
“Si algin fasi un pekadu, no ten un algin . . . ku ta difindi pa nos.” — 1 JON 2:1.
KE KU NO NA BIN APRINDI
No na aprindi di ke ku kontisi na kongregason di Korintu, oca ku un ermon fasi un pekadu gravi.
1. Ke ku Jeova misti pa tudu jintis?
JEOVA kumpu pekaduris ku liberdadi di kuji. No ta toma disisons kada dia. Alguns ta sedu mas importanti di ki utrus. Disison mas importanti ku un algin pudi toma, i dedika si vida pa Jeova i fasi parti di si familia. Jeova misti pa anos tudu no toma es disison. Pabia di ke? Pabia i ama pekaduris, tambi i misti pa e sedu filis. I misti pa e tene un amisadi ku el i vivi pa sempri. — Lei 30:19, 20; Gal 6:7, 8.
2. Ke ku Jeova misti pa kilis ku ka ripindi inda? (1 Jon 2:1)
2 Ma, Jeova ka ta obriga ningin sirbil. I ta disa pa kada kin disidi ke ki i na fasi. Ke ku ansions dibi di fasi, si un kriston batisadu fasi un pekadu gravi? Si i ka ripindi, i dibi di tiradu di kongregason. (1 Kor 5:13) Ma, mesmu asin, Jeova na bardadi misti pa algin ku fasi pekadu gravi ripindi, i pa i pasa tene mas amisadi ku el. Na bardadi, un motivu importanti ku pui Jeova da resgati, i pa i pudi purda kilis ku ripindi di se pekadus. (Lei 1 Jon 2:1.) Jeova, Deus di amor garandi, pidi pa kilis ku fasi pekadus gravi pa e ripindi. — Zak 1:3; Rom 2:4; Tiagu 4:8.
3. Ke ku no na fala del nes studu?
3 Jeova kontanu kuma ki ta sinti aserka di pekadu, tambi kuma ki ta sinti ku kilis ku fasi pekadus gravi. I misti pa no sinti di mesmu manera. Nes studu, no na oja (1) ke ku Paulu fala pa kongregason di Korintu fasi, oca ku un ermon fasi un pekadu gravi. (2) Ke ku Paulu fala kongregason pa i fasi oca ku ki omi ripindi. (3) No na oja kuma ku Jeova ta sinti aserka di kilis ku fasi un pekadu gravi.
KE KU KONGREGASON DI KORINTU FASI OCA KU UN ERMON FASI UN PEKADU GRAVI
4. Ke ku pasa na kongregason di Korintu? (1 Koríntius 5:1, 2)
4 Lei 1 Koríntius 5:1, 2. Na si terseru bias misionariu, Paulu obi un kusa mau dimas ku staba na kontisi na nobu kongregason na Korintu. Un ermon na ki kongregason staba na fasi pekadu seksual ku si madrasta. Es komportamentu nujenti, i “nin kil ku ka kunsi Deus ka ta fasi”! Ma utrus ermons pensaba di kuma, i ka mal pa ki ermon ku staba na komporta des manera, kontinua na kongregason. Talves alguns na kongregason pensaba di kuma e staba na mostra di kuma e ta sinti pena, suma ku Jeova ta sinti pa jintis imperfeitu. Ma Jeova ka ta konkorda ku mau komportamentu na metadi di si povu. Pabia di si mau komportamentu, ki omi na bardadi staba na dana bon nomi di kongregason. Tambi si kontinuaba na kongregason, utrus kristons pudiba kumsa ku fasi mesmu kusa. Pa kila, ke ku Paulu fala kongregason pa e fasi?
5. Ke ku Paulu fala pa kongregason fasi, i ke ku kila signifika? (1 Koríntius 5:13) (Jubi tambi diseñu.)
5 Lei 1 Koríntius 5:13. Jeova orienta Paulu pa skirbi un karta pa kongregason, nunde ki splika di kuma ki omi ku fasi pekadu i ku ka ripindi, dibi di tiradu di kongregason. Kuma ku kilis ku sta na kongregason dibi di tratal? Paulu fala elis pa e para “junta” ku el. Ke ku kila signifika? Paulu splika di kuma es ordi nklui ‘nin pa e ka kume ku el.’ (1 Kor 5:11) Ora ku no sinta pa kume ku un algin, no kustuma tambi tene un bon kombersa ku el. Asin, Paulu misti fala kongregason di kuma, e ka dibi di pasa tempu ku kil omi. Es na proteẑi kongregason di mau influensia. (1 Kor 5:5-7) Tambi es pudi juda kil omi pa i nota di kuma, i fasi un kusa mau dimas. Kila pudi pul pa i burguñu i ripindi.
Jeova orienta Paulu pa skirbi un karta pa kongregason, nunde ki splika di kuma ki omi ku fasi pekadu i ku ka ripindi, dibi di tiradu di kongregason. (Jubi paragrafu 5)
6. Ke ku kongregason fasi oca ke risibi karta di Paulu, i ke ku kil omi ku ta fasiba pekadu bin fasi?
6 Dipus ki manda karta pa kristons na Korintu, Paulu staba na pensa na kuma ku kongregason na reaẑi, ora lei ki karta. Ma dipus, Titu konta Paulu bon noba. Kongregason sigi orientason di Paulu, i e tira ki omi ku staba na fasi pekadu. (2 Kor 7:6, 7) Tambi, dipus ku Paulu manda si purmeru karta, ki omi ripindi di si pekadu! I muda si komportamentu ku si manera di pensa. Tambi i kumsa ku sigi normas justu di Jeova. (2 Kor 7:8-11) Ke ku Paulu fala kongregason pa e fasi?
KUMA KU KONGREGASON DIBI DI TRATABA KI OMI KU RIPINDI
7. Ke ku ki omi fasi, dipus di tiradu di kongregason? (2 Koríntius 2:5-8)
7 Lei 2 Koríntius 2:5-8. Paulu fala di kuma ‘kastigu ke dal i justa.’ Na utrus palabras, disiplina yangasa si objetivu na kil omi. Es i kal objetivu? I pul pa i ripindi. — Eb 12:11.
8. Ke ku Paulu fala pa kongregason fasi dipus?
8 Pa kila, Paulu orienta kongregason pa e ‘purda i anima’ ermon ku yara, i pa e ‘mostral ki garandi amor ke tene pa rel.’ Nota di kuma Paulu mistiba pa ermons fasi mas di ki so disa pa ki omi riba pa kongregason. I mistiba pa kongregason mostra ki omi pa ke ke na fala i fasi, di kuma na bardadi e purdal i e amal. Asin, ermon pudiba tene sertesa di kuma, e staba kontenti pa manera ki riba pa kongregason.
9. Pabia ki pudiba sedu difisil pa alguns purda ki ermon ku ripindi?
9 Sera ki i seduba difisil pa alguns mostra bondadi pa ki omi, oca ki riba pa kongregason? Biblia ka kontanu, ma i pudi sedu di kuma i kontisi. Ke ki i fasi ka tisi so purblemas pa kongresason, ma i pudi sedu di kuma alguns afetadu pa ke ki i fasi. Alguns na kongregason ta sforsaba ciu pa obdisi mandamentus di Jeova. Pa kila, e pudiba pensa di kuma i ka justu pa un algin ku fasi es pekadu gravi disadu riba mas pa kongregason. (Komparal ku Lukas 15:28-30.) Ma, pabia ki importanti pa kongregason mostra amor di bardadi pa se ermon ku riba?
10-11. Ke ku pudi kontisi si ansions nega purda ki omi ku ripindi?
10 Kuma kes omi na sintiba si ansions ka disal riba pa kongregason dipus ki ripindi? O kuma ki na sintiba si ermons ku irmas ka mostral amor, dipus ki riba? I pudi “disanima dimas.” I pudi pensa di kuma i ka pudi mas sirbi Jeova. I pudi te mesmu para sforsa pa pertusi di Jeova.
11 Ke mas ku pudi kontisi si ermons ku irmas nega purda ki omi ku ripindi? E pudi pirdi se propi amisadi ku Jeova. Pabia di ke? Pabia, e ka na kopia Jeova ku ta purda pekaduris ku ripindi. En ves di kila, e na kopia Satanas ku sedu mau i ku ka ta purda. E pudi disa pa Diabu usa elis pa e pui pa ki omi para sirbi Jeova. — 2 Kor 2:10, 11; Ef 4:27.
12. Kuma ku kongregason pudiba kopia Jeova?
12 Kuma ku kongregason na Korintu pudiba kopia Jeova, en ves di kopia Satanas? I ora ke purda kilis ku ripindi, suma ku Jeova ta fasi. Jubi ke ku alguns skirbiduris di Biblia fala aserka di Jeova. Davi fala, Jeova ‘i bon, i sta pruntu pa purda.’ (Sal 86:5) Mikeias fala sin: “I ka ten ningin suma bo, o Deus, ku ta purda pekadu, ku ta diskisi di disobdiensia”. (Mik 7:18) Tambi Isaias fala sin: “Omi malvadu pa i disa si kamiñu ku si mau pensamentus, pa i konverti, i riba pa SIÑOR no Deus ku ta ten pena del, pabia i sta sempri pruntu pa purda.” — Isa 55:7.
13. Pabia ki bon pa ka tarda na ribanta ki omi ku ripindi di kongregason? (Jubi kuadru “ Kal tempu ku omi na Korintu ribantadu?”)
13 Pa kopia Jeova, kongregason na Korintu dibi di purda ki omi ku ripindi, i mostral di kuma e amal. Paulu fala di kuma, si e purda ki omi ku ripindi, e na mostra di kuma e ‘obdisi na tudu.’ (2 Kor 2:9) I bardadi di kuma ki omi tiradu di kongregason so pa puku misis, ma disiplina lebal pa i ripindi. Pa kila, i ka tenba nesesidadi di ansions pera, antis di ribantal pa kongregason.
KUMA KU NO PUDI KOPIA JUSTISA KU PURDON DI JEOVA
14-15. Kal lisons ku no pudi aprindi di ke ku kontisi na Korintu? (2 Pedru 3:9) (Jubi tambi foto.)
14 Manera ku asuntu tratadu na antigu Korintu, skirbidu “pa nsinanu”. (Rom 15:4) Ke ku kontisi ta mostranu di kuma, Jeova ka ta disa kilis ku fasi pekadu gravi i ku ka ripindi, kontinua na kongregason. Alguns pudi pensa di kuma suma Jeova ta purda sempri, i pudi disa pa un algin ku ka ripindi kontinua na kongregason. Ma i ka asin ku Jeova ta mostra si purdon. Jeova ta purda, ma i ka ta seta tudu tipu di komportamentu. Si normas di ke ki sertu ku ke ki eradu ka ta muda. (Jud 4) Si Jeova disa na kongregason kilis ku fasi pekadu gravi i ku ka ripindi, i ka na seduba nada bon, pabia tudu kongregason na sufri. — Dit 13:20; 1 Kor 15:33.
15 Mesmu asin, no aprindi di kuma Jeova ka misti pa ningin kabadu ku el. I misti salba jintis sempri ki pusivel. I ta purda jintis ku muda se manera di pensa ku se asons, i ku misti sirbil. (Eze 33:11; lei 2 Pedru 3:9.) Pa kila, oca omi na Korintu ripindi i muda si komportamentu, Jeova usa Paulu pa splika ermons di kuma, e dibi di purdal i risibil na kongregason.
No ta kopia amor ku purdon di Jeova, ora ku no mostra amor ku bondadi pa kilis ku ribantadu na kongregason. (Jubi paragrafu 14 ku 15)
16. Kuma ku bu sinti aserka di Jeova, dipus ku bu aprindi di kuma ku omi na Korintu tratadu?
16 Isemplu na kongregason di Korintu mostra di kuma Jeova amanu ciu, i ta fasi ke ki sertu, tambi i justu. (Sal 33:5) Sera ki es ka ta lebanu ngaba no Deus? No na gardisi ciu pa manera ki ta purda, pabia anos tudu no ta fasi pekadu i no pirsisa di si purdon. Kada un di nos tene motivu di gardisi Jeova pa resgati ki da, pa no pekadus pudi purdadu. I ta animanu ciu sibi di kuma, na bardadi Jeova ama si povu, tambi i misti pa no sedu filis pa sempri!
17. Ke ku no na fala del na studus ku na bin?
17 Si un algin fasi un pekadu gravi aos, kuma ku ansions di kongregason pudi kopia amor di Jeova i juda ki algin pa i ripindi? Kuma ku kongregason dibi di reaẑi, ora ku ansions disidi tira o ribanta un algin di kongregason? Es purguntas na ruspundidu na studus ku na bin.
KANTIKU 109 Demonstra Verdadeiro Amor
