Apostolu Paulu fala sin pa kristons di Tesalónika: “Si algin ka seta palabra de karta, bo rapara si dunu diritu.” (2 Tes 3:14) Na pasadu, no ta falaba di kuma es orientason i pa ansions. Si un algin kontinua viola prinsipius di Biblia mesmu ki dadu konsiju manga di bias, ansions ta fasiba un diskursu pa avisa kongregason. Dipus di kila, publikaduris ta para pasa tempu o jumbai ku ki algin.

Ma i pirsis mudansa na no ntidimentu des asuntu. No ntindi gosi di kuma, konsiju di Paulu na rifiri disison ku kada publikadur na kongregason dibi di toma pabia di sertus situasons. Gosi, ansions ka pirsisa mas di fasi un diskursu pa avisa kongregason pa e toma kuidadu ku un algin ku na viola prinsipius di Biblia. Pabia ki pirsis es mudansa? Jubi ke ku Paulu staba na fala del oca ki da es konsiju.

Paulu notaba di kuma alguns jintis na kongregason ka ta “sigi nsinamentu”. E nega sigi konsiju ki da elis basiadu na Palabra di Deus. Na visita ki fasiba elis, i da es ordi: “Si algin nega tarbaja, i ka dibi di kume tambi.” Mesmu asin, alguns nega tarbaja pa sustenta se kabesa, apesar di kuma e pudi fasil. Tambi e staba na miti na vida di utrus. Kuma ku ermons ku irmas dibi di trata e koldadi di jinti? — 2 Tes 3:​6, 10-12.

Paulu fala: “Bo rapara si dunu diritu.” Palabra gregu ku usadu li, ta da ideia di sibi es i kal algin, i toma kuida pa ka sedu influensiadu pa rel. Paulu staba na da es orientason pa tudu kongregason i ka so pa ansions. (2 Tes 1:1; 3:6) Pa kila, kada publikadur ku nota di kuma un ermon o irma na kongregason nega obi konsiju di Palabra di Deus, i pudi disidi ivita si kumpañerasku.

Sera ki es signifika di kuma, ki algin na tratadu suma un algin ku tiradu di kongregason? Nau, pabia Paulu fala mas: “Bo konsijal suma ermon.” Asin, kada publikadur na kongregason na kontinua sta juntu ku el na runion i prega ku el, ma i ka na pasa tempu kel na jumbai o na divirtimentu. Pabia? Pabia Paulu fala: “Pa i pudi burguñu.” Ora ku no ivita kumpañerasku ku un ermon des manera, kila pudi pul sinti borgoña di ke ki sta na fasi i muda. — 2 Tes 3:​14, 15.

Kuma ku kristons aos pudi aplika es konsiju? Purmeru, no dibi di sertifika di kuma, ki algin “ka ta sigi nsinamentu”, suma ku Paulu fala. Paulu ka staba na papia di jintis ku ta fasi kusas ku no konsiensia ka pirmitinu fasi, kusas ku ka ta viola prinsipius o leis di Biblia. Nin i ka staba na fala di jintis ku punu fika mal. Ma Paulu staba na papia di kilis ku dadu konsiju basiadu na Palabra di Deus, ma nin ku sin e disidi disobdisi.

Aos, si no nota di kuma un ermon o irma kontinua disobdisi konsiju di Palabra di Deus, a no na toma no propi disison di kuma, no ka na sta juntu ku ki algin na jumbai o na divirtimentu. Suma es i un disison pesual, no ka na kontal utru algin, fora di membrus di no familia ku sedu Tustumuñas di Jeova i ku mora juntu ku nos. Ma no na kontinua sta juntu ku el na runion i prega ku el. Ora ki muda si manera, no pudi torna sta mas ku el suma antis.