1. Ke ku mostra di kuma Skrituras seduba importanti pa Jesus?

 IMAẐINA kuma ki seduba obi Jesus na nsina. Manga di bias, i ta falaba palabras di Skrituras Sagradu ki nkorna! Na bardadi, na si purmeru palabras antis di si batismu i na alguns di si ultimu palabras antis di si mortu, Jesus fala di palabras ku sai di Skrituras. b (Lei 8:3; Sal 31:5; Luk 4:4; 23:46) Duranti tris anu i meiu entri es dus mumentu, manga di bias Jesus ta lei, ta papia di Skrituras i ta splika elis. — Mat 5:17, 18, 21, 22, 27, 28; Luk 4:16-20.

2. Ke ku juda Jesus kunsi Skrituras diritu oca ki staba na kirsi? (Jubi diseñu ku sta na kapa.)

² Anus antis di Jesus kumsa si ministeriu, i ta lei i obi Palabra di Deus manga di bias. Na kasa, sin duvida i ta obi Maria ku José na usa palabras di Skrituras na se kombersas di kada dia na familia. c (Lei 6:6, 7) No pudi tene sertesa di kuma Jesus ta baiba pa kasa di juntamentu kada Sabadu juntu ku si familia. (Luk 4:16) Ora ki sta la, i ta sukuta diritu ora ku Skrituras na leidu. Ku tempu, Jesus aprindi lei ki Skrituras Sagradu el propi. Asin, Jesus ka pasa so na kunsi Skrituras diritu, ma tambi i pasa na  amal i disa pa kila ojadu na si asons. Pur isemplu, lembra di ke ku kontisi oca Jesus teneba so 12 anu. Pursoris ku kunsiba Lei di Moisés diritu, ‘dimira jiresa di Jesus, ku raspostas ki na da elis.’ — Luk 2:46, 47, 52.

3. Ke ku no na fala del nes studu?

³ Anos tambi no pudi kunsi i ama Palabra di Deus ora ku no ta lei sempri Skrituras. Ma, kuma ku no pudi benefisia mas di ke ku no lei? No pudi aprindi di ke ku Jesus fala pa kilis ku kunsi Lei, suma pursoris di lei, fariseus ku saduseus. Es ŝefis riliẑiosu ta leiba Skrituras manga di bias, ma e ka ta benefisiaba di ke ke ta lei. Jesus fala di tris kusas kes omis dibi di fasi pa benefisia mas di Skrituras. Palabras ki fala elis na judanu minjoria no kapasidadi (1) pa ntindi ke ku no lei, (2) pa diskubri lisons importanti i (3) pa disa pa Palabra di Deus mudanu.

4. Ke ku Lukas 10:25-29 ta nsinanu aserka di leitura di Palabra di Deus?

⁴ No misti ntindi signifikadu di ke ku no ta lei na Palabra di Deus. Si i ka sin, no pudi ka benefisia ciu di ke ku no ta lei. Pur isemplu, jubi kombersa ku Jesus tene ku “un dutur di lei”. (Lei Lukas 10:25-29.) Oca omi puntal ke ki pirsisa di fasi pa i tene vida ku ka ta kaba, Jesus judal oja resposta na Palabra di Deus. I puntal: “Kuma ki sta skritu na lei? Si bu lei, kuma ku bu ta ntindil?” (Anos ku pui letras karegadu ku italiku) Omi konsigi da bon resposta oca i usa palabras di Skrituras aserka di ama Deus i ama no kumpañer. (Sir 19:18; Lei 6:5) Ma nota ke ki fala dipus: “Kin ki ña kumpañer?” Omi mostra di kuma i ka ntindiba signifikadu di ke ki leiba. Pa kila, i ka sibiba kuma ki pudi aplika diritu ki parti di skrituras na si vida.

5. Kuma ku orason ku lei Biblia lentu ta judanu ntindi minjor ke ku no lei?

⁵ No pudi ntindi diritu Palabra di Deus si no tene bon abitus di leitura. Ali alguns kusas ku pudi judau. Ora antis di bu kumsa leitura. No pirsisa di ajuda di Jeova pa ntindi Skrituras. Pa kila, no pirsisa di spiritu santu pa judanu konsentra na ke ku no sta na lei. Dipus lei lentu. Es na judau ntindi ke ku bu sta na lei. Talves bu na oja di kuma i mas minjor lei na vos altu, o kumpaña leitura ku gravason di Biblia. Si bu obi palabras di gravason i na mesmu tempu ojal na papel, es pudi judau ntindi, lembra i aprindi mas aserka di ke ku bu lei na Palabra di Deus. (Jos 1:8) Ora ku bu kaba lei, ora mas pa gardisi Jeova pa si Palabra, ku sedu un prenda, i pidil pa i judau aplika ke ku bu lei.

6. Pabia ku fasi bu kabesas purguntas i toma notas kurtu pudi judau ora ku bu na lei? (Jubi tambi fotos.)

⁶ Ali mas dus kusas ku pudi judau ntindi Biblia diritu. Fasi bu kabesa purguntas aserka di ke ku bu lei. Ora ku bu lei un kusa na Biblia buska respostas pa es purguntas: ‘Kal ki jintis prinsipal? Kin ku na papia? Kin ki na papia ku el, i pabia? Nunde i na kal mumentu ku es kusa kontisi?’ Es purguntas na judau pensa i sigi ideias importanti di ke ku bu lei. Tambi,  toma notas kurtu ora ku bu na lei. Ora ku bu skirbi ke ku bu lei, bu ta pensa mas nel, i kila ta judau ntindil minjor. Skirbi tambi ta judau lembra di ke ku bu lei. Bu pudi skirbi purguntas, skirbi kusas ku bu oja na bu piskisa, fasi rusumu di pontus prinsipal, skirbi un nota di kuma ku bu pudi usa ke ku bu lei, o skirbi so ke ku bu sinti aserka di ke ku bu lei. Skirbi es notas, pudi judau oja Palabra di Deus suma un mensaẑen pa bo.

7. Kal manera di sedu ku no pirsisa di tene ora ku no na lei Biblia, i pabia di ke? (Mateus 24:15)

⁷ Jesus fala di un manera di sedu importanti ku no pirsisa di tene ora ku no na lei Palabra di Deus, ku sedu, ntindimentu. (Lei Mateus 24:15.) Ke ku ntindimentu signifika? I kapasidadi di ntindi kuma ku un ideia sta ligadu ku utru, kuma ki diferenti ku utru i ntindi un kusa ku ka kontadu di manera klaru. Tambi Jesus mostra di kuma, no pirsisa di ntindimentu pa sibi di kusas ku kontisi ku kumpri profesias di Biblia. No pirsisa tambi des manera di sedu pa pudi benefisia ciu di tudu kusas ku no ta lei na Biblia.

8. Kuma ku no pudi lei ku ntindimentu?

⁸ Jeova ta da si servus ntindimentu. Pa kila, ora i pidil pa i judau tene es manera di sedu. (Dit 2:6) Kuma ku bu pudi aẑi di akordu ku bu orason? Jubi diritu ke ku bu lei, i nota kuma ki sta ligadu ku utru kusas ku bu kunsi. Usa no publikasons pa judau fasi es. Pur isemplu, bu pudi usa Gia di Piskisa pa Tustumuñas di Jeova. Es publikasons na judau ntindi signifikadu di partis di Biblia i jubi di kal maneras ku bu pudi aplikal na bu vida. (Eb 5:14) Ora ku bu na lei ku ntindimentu, bu manera di ntindi Skrituras na aumenta.   

9. Kal bardadi importanti di Palabra di Deus ku saduseus ka seta?

⁹ Saduseus kunsiba diritu purmeru sinku livrus di Skrituras Ebraiku, ma e ka seta bardadis importanti ku sta nes livrus nspiradu. Pur isemplu, jubi kuma ku Jesus ruspundi oca saduseus puntal aserka di resureison. I ruspundi elis: “Bo ka lei na libru di Moisés nunde ku Deus papia ku el na ki arvurisiñu ku na yardi, i falal: ‘Ami i Deus di Abraon, Deus di Isaki, Deus di Jakó’?” (Anos ku pui letras karegadu ku italiku; Mar 12:18, 26) Mesmu manera ku saduseus lei es parti manga di bias, purgunta di Jesus mostra di kuma e ka seta un bardadi importanti di Skrituras, ku sedu, nsinu di resureison. — Mar 12:27; Luk 20:38. d

10. Na ke ku no dibi di presta atenson nel ora ku no na lei?

¹⁰ Ke ku no pudi aprindi? Ora ku no na lei, no misti presta atenson pa tudu ke ku un versikulu o un parti di Biblia pudi nsinanu. No ka misti so ntindi kusas fasil, ma tambi ntindi utrus bardadis ku prinsipius importanti.

11. Kuma ku bu pudi usa 2 Timótiu 3:16, 17, pa diskubri bardadis di Biblia ku tene balur?

¹¹ Kuma ku bu pudi diskubri bardadis ku tene balur ora ku bu na lei Biblia? Jubi ke ku 2 Timótiu 3:16, 17 fala. (Lei.) Es versikulu fala di kuma, “tudu Skritura . . . ten purbitu” pa (1) nsina, (2) raprindi, (3) kuriẑi, i (4) pa mostra manera di yanda diritu. Bu pudi tene es kuatru benefisiu mesmu na livrus di Biblia ku bu ka ta lei sempri. Jubi diritu versikulus pa diskubri ke ki nsinau aserka di Jeova, si ntenson, o aserka di prinsipius ku bin di Deus. Jubi kuma ki ta juda na raprindi. Bu pudi fasi es ora ku bu jubi kuma kes versikulus judau diskubri, i nega mau komportamentu i kontinua sedu fiel pa Jeova. Jubi kuma kes parti di Biblia pudi usadu, pa kuriẑi un mau opinion ku talves un algin fala na pregason. Jubi kualker manera di yanda diritu ku es versikulus fala del, ku pudi judau oja kusas suma ku Jeova ta oja elis. Ora ku bu kontinua pensa nes kuatru benefisiu, bu na diskubri lisons importanti ku pudi judau benefisia mas di bu leitura di Biblia.

12. Pabia ku Jesus fasi fariseus purgunta “nta bo ka lei”?

¹² Jesus tambi fasi purgunta, “nta bo ka lei”? pa mostra di kuma, fariseus  tene mau manera di oja ke ke ta lei na Skrituras. (Mat 12:1-7) e Na ki mumentu, fariseus fala di kuma disipulus di Jesus ka rispita dia di diskansu. Pa ruspundi elis, Jesus fala di dus isemplu di Skrituras, i usa palabras di un versikulu di livru di Oseias pa mostra fariseus di kuma, e ka ntindi pabia ku lei di dia di diskansu fasidu, i e ka mostra miserikordia. Pabia ku leitura di Palabra di Deus ka muda es omis? Pabia ora ke na leil e ta fasil ku objetivu di kritika o diskubri falia na utrus. Es atitudi ta tuji elis ntindi ke ke lei. — Mat 23:23; Jon 5:39, 40.

13. Ku kal atitudi ku no dibi di lei Biblia, i pabia di ke?

¹³ No aprindi ku palabras di Jesus di kuma, no pirsisa di lei Biblia ku un bon atitudi. Diferenti di fariseus, no dibi di sedu umildi i dispostu pa aprindi. No dibi di “risibi ku mansesa ki palabra ku parantadu”. (Anos ku pui letras karegadu ku italiku; Tiagu 1:21) Si no sedu mansu, no na disa pa Palabra di Deus muda kal tipu di algin ku no sedu. So si no ivita kritika o diskubri falia na utrus, ku lisons di Biblia aserka di miserikordia, sinti pena ku amor, pudi mudanu.   

14. Kuma ku no pudi sibi si no sta na disa pa Palabra di Deus mudanu? (Jubi tambi fotos.)

¹⁴ Manera ku no ta trata utrus pudi mostra si no sta na disa pa Palabra di Deus mudanu. Suma fariseus ka disa pa Palabra di Deus muda elis, e ta “kondenaba jintis ku ka ten kulpa.” (Mat 12:7) Di mesmu manera, kuma ku no ta oja utrus i trata elis ta mostra si no sta na disa pa Palabra di Deus mudanu. Pur isemplu, sera ki sempri no ta fala di bon  kusas ku no oja na utrus, o no mas ta fala di se falias? Sera ki no ta sinti pena i sta prontu pa purda, o no ta kritika utrus i kontinua ku raiba ora ke yaranu? No respostas pa es purguntas pudi mostra si no sta na disa pa ke ku no ta lei muda no pensamentus, no sentimentus ku no asons. — 1 Tim 4:12, 15; Eb 4:12.

15. Kal sentimentu ku Jesus tene aserka di Skrituras Sagradu?

¹⁵ Jesus ama Skrituras Sagradu, i si sentimentu i suma kil ku faladu na Salmu 40:8: “Ña Deus, N kontenti pa fasi bu vontadi; bu lei sta dentru di ña korson.” Suma Jesus amaba Skrituras, i seduba filis tambi i kontinua sirbi Jeova. No pudi tambi tene filisidadi i sai ben, si no ta lei Palabra di Deus i aprindi amal. — Sal 1:1-3.

16. Ke ku bu dibi di fasi pa bu pudi benefisia mas di leitura di Palabra di Deus? (Jubi kuadru “ Palabras di Jesus pudi judau ntindi ke ku bu lei.”)

¹⁶ Pa palabras di Jesus ku si isemplu judanu minjoria no manera di lei Biblia. No pudi minjoria no ntindimentu di testus di Biblia ora ku no ora, lei lentu, fasi purguntas i toma notas kurtu. No pudi usa ntindimentu ora ku no jubi diritu ke ku no lei ku ajuda di no publikasons basiadu na Biblia. No pudi aprindi usa Biblia minjor, te mesmu partis ku no ka kunsi diritu, ora ku no na buska lisons importanti ku sta nes testus. No pudi disa pa Palabra di Deus mudanu ora ku no kontinua tene bon atitudi duranti no leitura. Ora ku no sforsa pa fasi es kusas, no na benefisia mas di no leitura di Biblia i pertusi mas di Jeova. — Sal 119:17, 18; Tiagu 4:8.