1. Ke ku Jesus fala si disipulus aserka di tempu di fin, i kal avisu ki da elis?

 PUKU dias antis di Jesus muri, kuatru di si disipulus puntal: “Kal sinal ku na mostra . . . kuma mundu” na bin kaba? (Mat 24:3) Talves es disipulus staba na punta kuma ke pudi sibi kal tempu ku Jerusalen ku si templu na kabadu ku el. Na si resposta, Jesus ka fala so di distruison di Jerusalen ku si templu, ma tambi di tempu ku mundu na bin kaba, ku sedu, tempu ku no sta na vivi nel aos. Aserka di tempu di fin, Jesus fala sin: “Di ki dia ku ora, ningin ka sibi, nin anjus na seu, nin Fiju; son ña Pape ku sibi.” Dipus i da si disipulus avisu pa e kontinua “bisia”. — Mar 13:32-37.

2. Pabia ki importanti pa kristons di purmeru sekulu kontinua bisia?

² Kristons judeus di purmeru sekulu pirsisa di kontinua sta atentu; pa e pudi salva. Jesus fala si sigiduris ke ke dibi di jubi pa pudi sibi, kal tempu ku Jerusalen ku templu na kabadu ku el. I fala sin: “Ora ku bo oja tropas da Jerusalen volta, bo ta sibi kuma ora ciga pa prasa danadu.” Na ki mumentu e pirsisa di obi avisu di Jesus i “kuri pa montis.” (Luk 21:20, 21) Kilis ku sigi es avisu salva oca Romanus kaba ku Jerusalen.

3. Ke ku no na bin oja nes studu?

³ Aos, no sta na vivi na tempu ku es mundu mau pertu kabadu ku el. Pa kila, no dibi di kontinua sedu jiru i kontinua sta atentu. Nes studu, no na oja kuma ku no pudi  sedu ekilibradu ora ku no na oja kusas ku sta na pasa nes mundu, kuma ku no pudi toma sintidu ku no kabesa i kuma ku no pudi usa diritu tempu ku sobra.   

4. Pabia ku no dibi di sta interesadu di oja kuma ku kusas ku sta na pasa aos na mundu ta kumpri profesias di Biblia?

⁴ No tene un bon motivu di sta interesadu di oja kuma ku kusas ku sta na pasa aos na mundu, ta kumpri profesias di Biblia. Pur isemplu, Jesus falanu di kusas ku na kontisi pa judanu sibi kal tempu ku mundu di Satanas pertu kaba. (Mat 24:3-14) Apostolu Pedru nkoraẑanu pa no sta atentu ku profesias ku na kumpri pa no fe kontinua sedu forti. (2 Ped 1:19-21) Ultimu livru di Biblia kumsa ku es palabras: “E libru i kusas aserka di Jesus Kristu, ku Deus dal pa i pudi mostra si servus kusas ku ka na tarda pa sedu.” (Apok 1:1) Pa kila, no dibi di interesa ciu na kusas ku sta na pasa na mundu aos, i sibi kuma ke sta na kumpri profesias di Biblia. Talves no sta ku animu di papia des kusas ku no kumpañeris.

5. Ke ku no ka dibi di fasi, i ke ku no dibi di fasi? (Jubi tambi fotos.)

⁵ Ora ku no na papia di profesias di Biblia, no ka dibi di tenta diviña ke ku na kontisi. Pabia di ke? Pabia no ka misti fala nada ku pudi tisi divison na kongregason. Pur isemplu, talves no pudi obi lideris di mundu na papia kuma ke pudi risolvi un purblema i tisi pas ku suguransa. En ves di tenta diviña kuma ku ki palabras sta na kumpri profesia di 1 Tesalonisensis 5:3, no pirsisa di sta atualizadu ku ultimu informason ku publikadu. Ora ku no kombersas basia na publikasons di organizason di Jeova, no ta juda kongregason pa i kontinua unidu na “un sintidu.” — 1 Kor 1:10; 4:6.

6. Kal lisons ku no pudi aprindi di 2 Pedru 3:11-13?

⁶ Lei 2 Pedru 3:11-13. Apostulu Pedru judanu kontinua tene ekilibriu ora ku no na studa profesias di Biblia. I nsentivanu pa no ‘pera dia di Deus. No ba ta fasi forsa pa ki dia ciga dipresa’. Pabia? I ka pabia no misti tenta sibi di “dia ku ora” ku Jeova na tisi Armajedon, ma no misti usa tempu ku sobra pa “tene vida limpu, son pa Deus”. (Mat 24:36; Luk 12:40) Na utrus palabra, no misti komporta di bon manera i tene sertesa di kuma tudu ke ku no ta fasi pa Jeova i pabia di amor garandi ku no tene pa rel. Pa kontinua tene es objetivu, no dibi di toma sintidu ku no kabesa.   

7. Kuma ku no pudi mostra di kuma no toma sintidu ku no kabesa? (Lukas 21:34)

⁷ Jesus fala si disipulus pa e toma sintidu i ka so pa kusas ku sta na pasa na mundu, ma tambi pa se kabesa. Es asuntu tornadu klaru na avisu ku sta na Lukas 21:34. (Lei.) Nota palabras di Jesus ku fala sin: “Bo toma sintidu” ku bo kabesa. Un algin ku toma sintidu ku si kabesa ta sta atentu ku kualker pirigu ku pudi dana si amisadi ku Jeova, i ta fasi tudu pa ivita di ki pirigus. Asin, i ta fika sempri dentru di amor di Deus. — Dit 22:3; Jud 20, 21.

8. Ke ku apostolu Paulu fala pa kristons?

⁸ Apostolu Paulu fala kristons pa e  toma sintidu ku se kabesa. Pur isemplu, i fala kristons di Éfesu: “Bo toma sintidu kuma ku bo na yanda. Ka bo yanda suma kil ki ka jiru, ma suma algin jiru.” (Ef 5:15, 16) Satanas ta tenta sempri dana no amisadi ku Jeova, pa kila, Biblia danu konsiju pa ‘buska ntindi ke ku Siñor misti pa no fasi’, asin no na pudi proteẑi no kabesa di tudu atakis di Satanas. — Ef 5:17.

9. Kuma ku no pudi ntindi ke ku Jeova misti pa no fasi?

⁹ Biblia ka falanu di tudu kusas ku pudi dana no amisadi ku Jeova. Manga di bias, no dibi di toma disisons na asuntus ku ka faladu di manera klaru na Biblia. Pa toma bon disisons no pirsisa di ntindi ke ku Jeova “misti” pa no fasi. No pudi fasi es ora ku no na studa Palabra di Deus sempri i medita nel. Ora ku no ntindi mas ke ku Jeova misti i tenta tene “pensamentu di Kristu”, mas no na yanda “suma algin jiru”, mesmu si no ka tene regras ku na kontanu ke ku no dibi di fasi. (1 Kor 2:14-16) Un ora i ta fasil sibi kusas ku no dibi di ivita. Ma, utrora i ka ta fasil sibi.

10. Kal ki alguns pirigus ku no dibi di ivita?

¹⁰ Alguns pirigus ku no dibi di ivita i mostra interesi na algin sin misti kasa ku el, bibi ciu, kume ciu, fala kusas ku na pui utrus fika mal, jubi kusas ku tene violensia, jubi pornografia ku kusas suma esis. (Sal 101:3) No inimigu, Diabu sta sempri na buska opurtunidadi di dana no amisadi ku Jeova. (1 Ped 5:8) Si no ka sta atentu, Satanas pudi pui na no menti ku korson, nveẑa, disonestidadi, misti tene mas, odiu, orgulyu i guarda algin na korson. (Gal 5:19-21) Na kumsada, no pudi pensa kuma es sentimentus i ka pirigosu. Si no ka fasi logu-logu tudu ku no pudi pa ivita elis, e pudi kontinua kirsi suma un planta ku tene venenu i tisinu purblema. — Tiagu 1:14, 15.

11. Kal pirigu finu ku no dibi di ivita, i pabia di ke?

¹¹ Un pirigu finu i mau kumpañerasku Jubi es situason. Bu ta tarbaja ku un algin ku ka sedu Tustumuña di Jeova. Bu misti pa bu kolega di tarbaju pensa ben di Tustumuñas di Jeova, pa kila, bu ta mostra bondadi i juda utrus. Tambi utrora bu ta kume juntu ku el. I ka tarda, bu kumsa ku kume ku el sempri. Utrora, bu kolega ta papia di kusas imoral. Na kumsada, bu ka gosta di ki kusas. Ku tempu, bu kustuma ku ki kombersas, i gosi bu ka ta fika mal ku el. Dipus un dia bu kolega kumbidau pa bo bai bibi dipus di tarbaju, i bu seta. Gosi, bu kumsa ku pensa suma bu kolega di tarbaju. Nes mumentu, kantu tempu ki na toma antis di bu kumsa aẑi suma el? Na bardadi, no ta trata tudu jintis ku bondadi i ku rispitu, ma no dibi di lembra di kuma, no na bin sedu suma kilis ku no ta pasa tempu ku el. (1 Kor 15:33) Si no toma sintidu ku no kabesa, suma ku Jesus falanu pa no fasi, no na ivita tene kumpañerasku ku ka pirsis ku kilis ku ka ta vivi konformi normas di Jeova. (2 Kor 6:15) No na oja pirigu i no na ivital.   

12. Ke ku disipulus di Jesus dibi di fasi ora ke na pera kabantada des mundu?

¹² Jesus misti pa si disipulus sta okupadu nkuantu e na pera kabantada des mundu. Jesus da elis tarbaju pa fasi.  I da elis ordi pa prega bon noba “na Jerusalen, ku tudu Judeia, ku Samaria, te na lugar mas lunju di mundu.” (At 1:6-8) Sigiduris di Jesus risibi manga di tarbaju! Ora ke fasi tudu ke pudi pa prega utrus, e ta sta na usa diritu se tempu.   

13. Pabia ku no pirsisa di usa diritu no tempu? (Kolosensis 4:5)

¹³ Lei Kolosensis 4:5. Pa toma sintidu ku no kabesa, no pirsisa di pensa diritu na kuma ku no ta usa no tempu. “Tempu” ku kusas ku no ka spera pudi afeta kada un di nos. (Ekl 9:11) No pudi muri di repenti.

14-15. Kuma ku no pudi usa diritu no tempu? (Ebreus 6:11, 12) (Jubi tambi foto.)

¹⁴ No pudi usa diritu no tempu ora ku no na fasi ke ku Jeova misti i torna no amisadi ku el mas forti. (Jon 14:21) No pirsisa di ‘sedu firmi; ka no bulbuli; no tene sempri vontadi na tarbaju di Siñor.’ (1 Kor 15:58) Ora ku fin di no vida o fin des mundu ciga, no ka na ripindi di ke ku no fasi pa Jeova. — Mat 24:13; Rom 14:8.

¹⁵ Aos, Jesus kontinua gia si disipulus na pregason di bon noba di Renu na tudu Tera. I kumpri si purmesa. Atraves di organizason di Jeova, Jesus ta trenanu  pa no sibi kuma di prega, tambi i ta danu tudu ke ku no pirsisa del pa pudi prega bon noba. (Mat 28:18-20) No ta fasi ke ku Jesus misti pa no fasi, ora ku no pega tesu na prega i na nsina utrus. Tambi no ta fasi es ora ku no kontinua sta atentu nkuantu no na pera pa Jeova tisi fin des mundu. Ora ku no aplika konsiju ku sta na Ebreus 6:11, 12, no na manti no speransa “te na fin.” — Lei.

16. Ke ku no sta disididu pa fasi?

¹⁶ Jeova pui ja dia ku ora ki na tisi fin des mundu di Satanas. Ora ku ki dia ciga, Jeova na kumpri tudu profesias ki manda skirbi na si Palabra. Ma utrora no pudi pensa kuma fin na tarda pa ciga. Ma, dia di Jeova “ka na tarda”! (Aba 2:3) Pa kila, no sta disididu pa ‘pera’ na Jeova i ‘pui no speransa na Deus no Salbadur.’ — Mik 7:7.