YOMARA ku si ermons, Marcelo ku Hiver mora na un tabanka pikininu na Guatemala. Yomara kumsa studa Biblia ku Tustumuñas di Jeova. Ku tempu, si ermons kumsa studa Biblia tambi. Ma, i tenba un purblema. Elis tudu e segu, i e ka pudi lei braili. Pa kila, kin ku ta studa Biblia ku elis ta lei paragrafus ku versikulus di Biblia pa relis.

I ta seduba tambi difisil pa e mati runions. E ka pudiba bai pa Salon di Renu mas pertu delis, elis so. I ta leba 40 minutu pa bai pa la. Ma, ermons di kongregason juda elis pa e pudi mati tudu runions. Oca e kumsa fasi disignason di studantis na runion di semana, ermons ta juda elis nkorna se partis.

Na Maiu di 2019, runions di kongregason kumsa ku fasidu na se tabanka. Dipus, un kasal di pionerus regular munda pa se tabanka. E ka sibiba lei nin skirbi braili, ma e mistiba nsina es studantis segu kuma ke pudi fasil. Pa kila, e bai pa un biblioteka e kumpra livrus di braili pa pudi aprindi kuma ke pudi nsina utrus usal.

Na puku misis, es tris ermons segu aprindi lei braili ku fasilidadi. Kila juda elis fasi progresu spiritual. Gosi Yomara, Marcelo ku Hiver sta na sirbi suma pionerus regular. Marcelo i servu ministerial. Kada semana e ta sta okupadu na sirbi Jeova. Manera ke ta pega tesu, kila nkoraẑa utrus pa e fasi mesmu kusa.

Es tris ermons gardisi ciu pa apoiu amorosu ke risibi di kongregason. Yomara fala sin: “Disna di no purmeru kontaktu, Tustumuñas di Jeova mostranu amor di bardadi”. Marcelo fala sin: “No tene bon amigus na no kongregason, i no fasi parti di un familia di ermons na mundu ntidu ku sta unidu na amor.” Yomara ku si ermons sta na pera dia ku Jeova na pui pa Tera sedu un paraísu. — Sal 37:10, 11; Isa 35:5.