UTRORA skirbiduris di Biblia ta ripiti mesmu frasi palabra pa palabra. No jubi tris motivus ku talves pui skirbiduris di Biblia fasi kila:

Tempu ki skirbidu. Na antigu di Israel, maioria di jintis ka teneba se propi livru di Lei. E mas ta obiba leitura di Lei ora ku nason ntidu juntaba na tabernakulu. (Lei 31:​10-12) I pudi sedu ki, i ta tenba manga di kusas ku pudi distrai elis, ora ke firma pa manga di oras e na obi leitura di Lei na grupu garandi. (Ne 8:​2, 3, 7) Nes mumentus, ripiti palabras prinsipal ta fasi pa i sedu mas fasil pa jintis lembra del, tambi pa e pul na pratika. Ripiti alguns frasi palabra pa palabra, juda elis lembra di partis di Lei ku Jeova daba elis. — Sir 18:​4-22; Lei 5:1.

Stilu ki skirbidu. Alguns partis di Biblia i kantigas, suma pur isemplu livru di Salmus, Kantiga di Salomon ku livru di Miskiñu. Utrora, es kantigas ta tene koru o palabras ku ta ripiti, es ta distaka tema di kantiga, tambi i ta juda kilis ku na obil pa e nkornal. Pur isemplu, nota palabras ku sta na Salmu 115:​9-11: “Pobu di Israel, bo fiansa na SIÑOR; el i bo ajuda ku bo tajadera. Familia di Aron, bo fiansa na SIÑOR; el i bo ajuda ku bo tajadera. Kilis ku rispita SIÑOR, bo fiansa nel; el i bo ajuda ku bo tajadera.” Sera ki bu nota kuma ku ripitison des palabras pudiba juda kilis ku na kanta pa e grava es bardadis importanti na se menti ku se korson?

Pa pudi distaka asuntus importanti. Utrora, skirbiduris di Biblia ta ripiti palabras importanti. Pur isemplu, oca ku Jeova fala israelitas pa e ka kume sangi, i fasi pa Moisés splika manga di bias ke ku manda e ka dibi di kumel. Deus mistiba distaka di kuma vida di un kriatura i si sangi, ku sedu, sangi ta representa vida. (Sir 17:​11, 14) Mas tardi, oca ku apostolus ku ansions na Jerusalen fasi lista di kusas ku no dibi di ivita pa pudi kontenta Deus, e distaka mas un bias di kuma i pirsis ivita sangi. — At 15:​20, 29.

I bardadi di kuma Biblia tene frasis ku ripiti, ma kila ka misti fala di kuma Jeova misti pa no tene kustumu di ba ta ripiti frasis di Biblia. Pur isemplu, Jesus fala sin: “Si bo na ora, ka bo ripiti palabra ciu”. (Mat 6:7) Dipus i danu isemplu di asuntus ku no pudi pidi na orason ku sta di akordu ku vontadi di Deus. (Mat 6:​9-13) Apesar di kuma no dibi di ivita ripiti mesmu palabras manga di bias na no orasons, no sta livri di papia mas di mesmu asuntus manga di bias. — Mat 7:​7-11.

I pa un bon motivu ku Palabra nspiradu di Deus ripiti sertus palabras ku frasis. Es i un di manga di maneras ku no Nsinadur Mas Garandi ta nsinanu kusas mas minjor pa nos. — Isa 48:​17, 18.