Mesmu asin, Jeova na spera pa no pera ku pasensa pa i aẑi na si tempu sertu. Pabia ki na spera pa no fasi kila? Ke ku pudi judanu sedu filis nkuantu no na pera?

PABIA KU JEOVA MISTI PA NO PERA?

Biblia fala sin: “Jeova sta na pera ku pasensa pa mostra bos fabur. I na lanta pa mostra bos miserikordia. Pabia Jeova i Deus di justisa. Filis i tudu kilis ku kontinua na peral.” (Isa 30:​18, Tradução do Novo Mundo) Es palabras di Isaias skirbidu pa judeus rebeldi. (Isa 30:1) Ma tambi i tenba alguns judeus ku seduba fiel, i es palabras da elis speransa. Es mesmu palabras ta da tambi servus fiel di Jeova di no tempu speransa.

Pa kila, no ten ku pera ku pasensa, pabia Jeova sta na pera ku pasensa. I marka un tempu ki na bin kaba ku es mundu mau, i sta na pera pa ki dia ku ora ciga. (Mat 24:36) Ora ku ki dia ciga, i na sedu klaru di kuma akusason ku Satanas lantanda kontra Jeova ku si servus, i ka bardadi. Dipus i na kaba ku Satanas ku kilis ku sta na si ladu, ma i na ‘mostranu miserikordia.’

Nkuantu ki dia ka ciga, Jeova pudi ka kaba ku no purblemas, ma i danu garantia di kuma no pudi sedu filis nkuantu no na pera. Suma ku Isaias fala, no pudi sedu filis nkuantu no na pera pa un bon kusa kontisi. (Isa 30:18) a Kuma ku no pudi tene es filisidadi? I ten kuatru kusas ku pudi judanu.

KUMA KU NO PUDI SEDU FILIS NKUANTU NO NA PERA

Konsentra na kusas pusitivu. Rei Davi oja manga di kusas mau na si vida. (Sal 37:35) Mesmu asin, i fala: “Diskansa na SIÑOR, bu peral. Ka bu fadiga pabia di ki algin ku kusas ta kuri diritu ku el, nin pabia di omi ku ta pui si planus mau na pratika.” (Sal 37:7) Davi propi aplika es konsiju,  pabia i konsentra na si speransa di salbason. I prestaba tambi atenson na kada benson ki risibi di Jeova. (Sal 40:5) Anos tambi, si no konsentra na kusas pusitivu di situason ku no sta na pasa, en ves di konsentra na kusas negativu, i na sedu mas fasil pa no pera Jeova.

Kontinua ngaba Jeova. Skirbidur di Salmu 71, ku talves sedu Davi, fala Jeova asin: “N na ten speransa sempri, N na ngabau kada bias mas.” (Sal 71:14) Kuma ki na ngababa Jeova? Atraves di papia ku utrus aserka di Jeova i kanta kantigas pa ngabal. (Sal 71:​16, 23) Suma Davi, no pudi tene filisidadi nkuantu no na pera Jeova. No pudi ngabal ora ku no na prega, na no kombersas di kada dia, i ora ku no na kanta no kantikus. Prosimu bias ku bu na kanta kantigas di Renu, pabia ku bu ka na presta atenson na si letras i kuma ki na fasiu sinti ben?

Disa pa bu ermons ku irmas nkoraẑau. Oca Davi na pasa situasons difisil, i fala Jeova asin: “Na pursensa di bu pobu . . . N na pui ña speransa na bu nomi”. (Sal 52:9) Anos tambi no pudi disa pa no ermons ku irmas nkoraẑanu i ka so na runions ku pregason, ma tambi na jumbai. — Rom 1:​11, 12.

Fortalisi bu speransa. Salmu 62:5 fala sin: “Ña alma, pera ku pasensa pa Deus; son nel ku ña speransa sta.” I importanti tene un speransa forti, prinsipalmenti si fin ka ciga na tempu ku no pensaba di kuma i na ciga. No dibi di sta konvensidu di kuma purmesas di Jeova na bin kumpri i ka mporta kantu tempu ku no na peral. No pudi fortalisi no speransa atraves di studa Palabra di Deus, suma pur isemplu si profesias, ligason ku si mensaẑen tene, ku kusas ku Jeova konta aserka del. (Sal 1:​2, 3) No pirsisa tambi di kontinua ‘ora ku spiritu santu’ pa manti no amisadi ku Jeova, nkuantu no na pera kumprimentu di purmesa di vida ku ka ta kaba. — Jud 20, 21.

Suma rei Davi, tene sertesa di kuma Jeova ta oja kilis ku na peral, tambi i ta mostra elis si amor fiel. (Sal 33:​18, 22) Kontinua pera Jeova ku pasensa, ora ku bu konsentra na kusas pusitivu na bu vida, ora ku bu ngabal, ora ku bu disa pa bu ermons ku irmas nkoraẑau, i ora ku bu manti bu speransa forti.