1. Kal ki vontadi di Jeova aos?

 VONTADI di Deus aos, i pa bon noba di Renu pregadu na tudu Tera. (Mar 13:10; 1 Tim 2:3, 4) Es i tarbaju di Jeova, i importanti dimas, e ku manda i kuji si Fiju ki ama pa i orienta es tarbaju. No pudi tene sertesa di kuma, suma no tene Jesus pa orientanu, tarbaju di pregason na kompletadu suma ku Jeova misti antis di fin ciga. — Mat 24:14.

2. Ke ku no na fala del nes studu?

² Nes studu, no na oja kuma ku Jesus sta na usa “servu jiru, di fiansa” pa da kumida spiritual, i organiza kampaña mas garandi di pregason ku ciga ja di ten. (Mat 24:45) No na oja tambi ke ku kada un di nos pudi fasi pa apoia Jesus ku servu jiru di fiansa.

3. Kal puder ku Jesus dadu?

³ Jesus sta na orienta tarbaju di pregason. Kuma ku no pudi tene sertesa di kila? Puku antis di bai pa seu, Jesus kontra ku alguns di si sigiduris fiel na un monti na Galileia. I fala elis: “N dadu tudu puder na seu ku na tera.” Nota es palabras ki fala dipus: “Asin, bo bai pa jinti di tudu nasons, bo fasi elis ña disipulus.” (Mat 28:18, 19)  Asin, entri manga di utrus kusas, Jesus dadu puder pa orienta tarbaju di pregason.

4. Pabia ku no pudi tene sertesa di kuma, Jesus kontinua orienta tarbaju di pregason?

⁴ Jesus konta di kuma, tarbaju di pregason ku di fasi disipulus na fasidu na “tudu nasons”, tambi i na sta ku si sigiduris “tudu dia te na kabantada di tempu.” (Mat 28:20) Es palabras ta mostra di un manera klaru di kuma, tarbaju di pregason na kontinua bas di orientason di Jesus te na no tempu.

5. Kuma ku no sta na juda na kumpri profesia di Salmu 110:3?

⁵ Jesus ka sta preokupadu si i na bin ten puku tarbajaduris na fin de tempu ku no sta na vivi. I sibi di kuma profesia ku sta na livru di Salmu na kumpri: “Bu tropas na pursenta di bon vontadi na dia ku bu bai gera.” (Sal 110:3) Si bu ta prega bon noba, bu ta sta na apoia Jesus ku servu jiru di fiansa, tambi bu ta juda na kumpri es profesia. Tarbaju sta na avansa, ma i ten difikuldadis.

6. Kal difikuldadi ku pregaduris di Renu ta nfrenta aos?

⁶ Un difikuldadi ku pregaduris di Renu ta nfrenta aos i oposison. Apostatas, lideris riliẑiosu ku pulitikus ta konta manga di jintis mintida aserka di no tarbaju. Si no parentis, jintis ku no kunsi ku kolegas di tarbaju nganadu pa es informason falsu, e pudi presionanu pa no para sirbi Jeova i para prega. Na alguns teras no inimigus ta ameasa, ataka o prindi no ermons ku no irmas, te mesmu e ta ficadu na prison. No ka ta fika dimiradu pa manera ku jintis ta tratanu des manera. Jesus falaba ja: “Tudu jintis na odia bos pabia di ña nomi.” (Mat 24:9) Manera ku jintis odianu es ta mostra di kuma no tene fabur di Jeova. (Mat 5:11, 12) I Diabu ku sta tras des oposison. Ma Jesus mas Satanas tene puder! Ku apoiu di Jesus, bon noba sta na yangasa jintis di tudu nason. Jubi ke ku ta prova kila.

7. Kal prova ku bu oja, ku ta mostra di kuma Apokalipsi 14:6, 7 sta na kumpri?

⁷ Un utru difikuldadi ku no ta nfrenta ora ku no na prega, i di kuma manga di jintis ka ta papia mesmu lingua ku nos. Na kusas ku Jesus mostra apostulu Jon, i kontal di kuma na no tempu, bon noba na vensi es difikuldadi. (Lei Apokalipsi 14:6, 7.) Di kal manera? No sta na fasi tudu ku no pudi pa da manga di jintis opurtunidadi di obi mensaẑen di Renu. Aos, jintis na tudu parti di mundu pudi lei asuntus basiadu na Biblia na no site jw.org, pabia i tene informason na mas di 1.000 lingua! I dadu aprovason pa traduzi livru Bu Pudi Tene un Vida Filis pa Sempri! na mas di 700 lingua! Es i no livru prinsipal pa fasi disipulus. Kumida spiritual sta tambi dispunivel na gravasons di video pa kilis ki surdu, ku publikasons na braili pa segus. No sta na oja kumprimentu des profesias di Biblia. Jintis di “tudu linguas di nasons” na ‘purifikadu boka’ o e na aprindi papia lingua puru di bardadi ku sta na Biblia. (Zak 8:23; Sof 3:9) Tudu es kusas sta na fasidu bas di bon orientason di Jesus Kristu.

8. Te nes mumentu, kal ku sedu rusultadu di no tarbaju di pregason?

⁸ Aos, mas di 8 milyons di jintis na 240 teras junta ku organizason di Jeova, i kada anu mas di 100 mil jintis ta batisadu! Ma, mas importanti di ki  numeru di jintis, i maneras di sedu di un kriston, ku sedu “naturesa nobu” ku es nobus disipulus aprindi tene. (Kol 3:8-10) Manga delis para leba mau vida, para sedu violentu, para sedu rasista o nvolvi na asuntus pulitiku. Profesia ku sta na Isaias 2:4 sta na kumpri; e ka sta “na nsina mas gera.” Suma no ta sforsa ciu pa tene nobu manera di sedu, no ta juda jintis pa e bin pa organizason di Deus, tambi no ta mostra di kuma no sta na sigi no lider Kristu Jesus. (Jon 13:35; 1 Ped 2:12) Pabia ku es sta na kontisi? Pabia Jesus sta na danu ajuda ku no pirsisa del.

9. Di akordu ku Mateus 24:45-47, ke ku Jesus fala i na kontisi na tempu di fin?

⁹ Lei Mateus 24:45-47. Jesus fala kuma na tempu di fin, i na kuji “servu jiru, di fiansa” pa da kumida spiritual. Pa kila, no na spera pa es servu tarbaja risu na no tempu. I es ku no sta na oja. No lider sta na usa un grupu pikininu di omis unjidu, pa da povu di Deus ku utrus jintis ku sta nteresadu, kumida spiritual “na ora sertu.” Es omis ka ta oja se kabesa suma dunus di fe di utrus. (2 Kor 1:24) En ves di kila, e rikuñisi di kuma Jesus Kristu i “ŝef o gubernadur” di si povu. — Isa 55:4.

10. Kal un des publikasons ku mostradu na diseñu ku judau pa bu kumsa sirbi Jeova?

¹⁰ Desdi 1919, servu jiru di fiansa fasi diferenti tipu di publikasons pa da jintis ku sta nteresadu, purmeru opurtunidadi di aprindi bardadi di Palabra di Deus. Na 1921, servu jiru di fiansa fasi livru A Harpa de Deus pa juda jintis ku sta nteresadu aprindi nsinus di Biblia. Konformi tempu na muda, i fasidu utrus publikasons.  Kal publikason ku judau kunsi i ama no Pape ku sta na seu? Sera ki i livru “Seja Deus Verdadeiro”, A Verdade Que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, Ke ki Biblia Na Bardadi ta Sina?, O Que Nos Ensina a Bíblia?, o i no nobu livru Bu Pudi Tene un Vida Filis pa Sempri!?Tudu es livrus fasidu pa judanu fasi disipulus. E ciga na bon mumentu ku no pirsisaba del.

11. Ke ku manda i importanti pa anos tudu no aprindi mas aserka di Jeova ku Biblia?

¹¹ I ka so jintis ku sta nteresadu ku pirsisa di kunsimentu fundu aserka di Jeova ku Biblia. Anos tudu no pirsisa. Apostulu Paulu fala sin: “Bianda risu i pa garandi”. Paulu fala mas kuma, ora ku no aplika ke ku no aprindi na Biblia, kila na judanu “ntindi ben ku mal.” (Eb 5:14) I pudi sedu difisil dimas obdisi normas di Jeova gosi, pabia manga di jintis ta pensa i komporta di un manera susu. Ma Jesus sertifika pa no aprindi kusas ku no pirsisa del pa manti no fe forti. No ta risibi es nsinamentu na Palabra nspiradu di Deus, ku sedu Biblia. Servu jiru di fiansa ta purpara i da es kumida spiritual, bas di orientason di Jesus.

12. Suma Jesus, kuma ku no da balur pa nomi di Deus?

¹² Suma Jesus, no da nomi di Deus balur ki meresi. (Jon 17:6, 26) Pur isemplu, na 1931, no seta toma nomi ku tiradu na Biblia, ku sedu Tustumuñas di Jeova. Asin, no mostra di kuma nomi di Deus i importanti pa nos, tambi no misti kunsidu ku nomi di no Pape ku sta na seu. (Isa 43:10-12) Disna di Otubru di ki anu, nomi di Deus kumsa ku pudu na kapa di kada numeru des rivista. Alen di  kila, Tradução do Novo Mundo da Bíblia Sagrada torna nomi di Deus na lugar ki dibi di sta na si Palabra. Es diferenti ciu ku igreẑas ku ta fala e sedu kriston, ku tira nomi di Deus na manga di se tradusons di Biblia!

13. Ke ku konvensiu di kuma Jesus sta na usa “servu jiru, di fiansa” aos? (Jon 6:68)

¹³ Atraves di “servu jiru, di fiansa”, Jesus fasi pa i ten un organizason sin kumpañer li na Tera, pa apoia adorason di bardadi. Kuma ku bu ta sinti aserka des organizason? Talves bu sinti suma apostulu Pedru, ku fala es palabras pa Jesus: “Siñor, pa kin ku no na bai? Abo ku tene palabra ku ta da vida ku ka ta kaba.” (Jon 6:68) Nunde ku kada un son di nos na staba aos, si kontra no ka kunsi organizason di Jeova? Atraves des organizason, Kristu sertifika pa no tene tudu ke ku no pirsisa del pa no kontinua sedu fiel pa Deus. Tambi i ta trenanu pa no pudi kumpri ben no tarbaju di pregason. Alen des, i ta judanu “bisti nobu naturesa”, pa no pudi kontenta Jeova. — Ef 4:24.

14. Kal benefisiu ku bu tene di fasi parti di organizason di Jeova duranti duensa di COVID-19?

¹⁴ Jesus ta da bon orientason na tempu di difikuldadis. No oja benefisiu des orientason oca ku duensa di COVID-19 kumsa. Nkuantu manga di jintis na mundu ka sibi ke ke na fasi, Jesus sertifika pa no risibi orientason klaru ku na proteẑinu. No nkoraẑadu pa no usa maskra ora ku no na sai i manti distansia fisiku. Ansions lembrantadu pa e manti sempri kontaktu ku tudu jintis na kongregason, tambi pa e sta atentu ku ke  ke pirsisa del pa e manti suguru ku bon saudi, i pertusi di Jeova. (Isa 32:1, 2) No risibi utrus orientason ku nkoraẑamentu atraves di atualizasons di Korpu Guvernanti.

15. Kal orientason ku dadu pa fasi runions i prega duranti COVID-19, i kal ku sedu rusultadu?

¹⁵ Duranti COVID-19, no risibi tambi orientason klaru aserka di kuma ku no dibi di fasi runions di kongregason, i partisipa na tarbaju di pregason. Nin i ka tarda, no kumsa ku mati runions, asembleias ku kongresus atraves di internet. Tambi kuas na tudu ladu, no kumsa ku prega atraves di karta ku telefoni. Jeova bensua no sforsus. Na manga di filialis numeru di publikaduris aumenta ciu. I manga delis tene spiriensia nkoraẑanti duranti COVID-19. — Jubi kuadru “ Jeova bensua no tarbaju di pregason.”

16. Ke ku no pudi tene sertesa del?

¹⁶ Alguns pudi sinti di kuma organizason sedu kautelosu dimas aserka di duensa di COVID-19. Ma ku tempu, i fika klaru di kuma orientason ku no risibi i di jiresa. (Mat 11:19) Ora ku no pensa fundu na kuma ku Jesus sta na gia si povu ku amor, no ta tene sertesa di kuma i ka mporta ke ku na kontisi na futuru, Jeova ku si Fiju ki ama na sta ku nos. — Lei Ebreus 13:5, 6.

17. Kuma ku bu ta sinti di sta bas di orientason di no Lider Jesus?

¹⁷ No sta kontenti dimas manera ku Jesus sedu no Lider! No fasi parti di un organizason ku ka sta divididu pa kultura, nasionalidadi ku lingua. No risibi manga di instruson di Palabra di Deus, tambi no risibi manga di trenamentu ku no pirsisa pa fasi tarbaju di pregason. Kada un di nos nsinadu kuma ki pudi bisti nobu naturesa o manera di sedu di un kriston, i no sta na aprindi ama n̈utru. No tene tudu motivu di tene konfiansa, pabia Jesus i no Lider!