N padidu na 1935 na Darlaston, ku fasi parti di Black Country (Pais Negru), na un reẑion na Inglatera, ku dadu es nomi pabia di fumu ku ta bin di manga di fabrikas. Oca ku N tene serka di kuatru anu, ña papes kumsa ku studa Biblia ku Tustumuñas di Jeova. Entri 14 ku 15 anu, N staba konvensidu di kuma es i bardadi, i N batisadu na 1952 ku 16 anu.

Kuas na mesmu tempu, N kumsa ku aprindi tarbaju na un fabrika garandi, ku ta kumpu feramentas pa tarbaju ku partis di mutur di karus. N kumsa ku trenadu pa okupa un lugar importanti na fabrika, i un tarbaju ku N gostaba ciu del.

N teneba un disison importanti pa toma, oca superintendenti viaẑanti kumbidan pa N ba ta diriẑi Studu di Livru di Kongregason na runion di semana, na ña kongregason na Willenhall. Ma N teneba un purblema. Na ki tempu, N ta matiba runions na dus kongregason. Duranti semana, N ta mati runion na kongregason ku sta pertu di ña kau di tarbaju na sidadi, serka di 32 kilometru di ña kasa. Na kada fin di semana, ora ku N riba na kau di ña papes, N ta mati runions di kongregason na Willenhall.

Suma N mistiba apoia organizason di Jeova, N seta konviti ku superintendenti viaẑanti fasin, kila signifika kuma, N dibi di disa ki tarbaju ku N gostaba ciu del. Nunka N ripindi di disison ku N toma, di disa pa Jeova gia ña kamiñu, i kila pirmitin pa N tene un vida filis.

Oca ku N ta matiba runion di kongregason na sidadi, N kontra ku un irma bonita di nomi Anne ku konsentraba na sirbi Jeova. No kasa na 1957, no tene manga di disignasons interesanti na sirvisu di Jeova, suma pioneru regular, pioneru spesial, sirbi na sirkuitu i sirbi na Betel. Anne pun pa N tene alegria na ña vida.

 Na 1966, no staba kontenti di mati skola di Jiliadi na turma 42. No disignadu pa Malaui, ku kunsidu suma korson di Afrika, pabia e ta risibi jintis diritu i ku bondadi. No ka pensaba kuma, no ka na pudi fika la pa manga di tempu.

No ciga na Malaui na 1 di Fevereru di 1967. Na purmeru mis, no pasa mas tempu na aprindi lingua, dipus no kumsa ku sirbi na distritu. No ta kurintiba karu tudu terenu, ku alguns jintis ta pensa kuma i pudi kuri na kualker lugar, te mesmu na rius. Ma es i ka bardadi. No pudi kurintil so na kaus ku tene un bokadu di yagu. Utrora, no pirsisa di lona pa kubri karu na tempu di cuba, pa yagu ka pudi entra dentru. I seduba un manera difisil di kumsa no disignason suma misionariu, ma no gostaba del!

Na mis di Abril, N nota di kuma i ka na tarda no na bin tene purblemas ku guvernu. N obi na radiu kombersa di prisidenti di Malaui, Dr. Hastings Banda. I fala kuma Tustumuñas di Jeova ka ta paga mpustu, i e sta na kria purblemas pa guvernu. Na bardadi, es akusasons seduba falsu. Anos tudu no sibiba kuma, guvernu ka gosta pa manera ku no sedu neutru na asuntus pulitiku, prinsipalmenti manera ku no nega kumpra kartons di partidu pulitiku.

Na mis di Setembru, no lei na jornal nunde ku prisidenti akusa ermons di kuma, e sta na kria purblemas na tudu ladu. I anunsia na un kongresu pulitiku di kuma, i ka na tarda guvernu na tuji tarbaju di  Tustumuñas di Jeova. E tuji no tarbaju na 20 di Otubru di 1967. Logu dipus, polisias ku kilis di imigrason bin pa filial pa fical i manda misionarius fora di pais.

Dipus di tris dia na prison, no diportadu pa Maurisiu, un tera ku kolonizadu pa Gran-Bretaña. Ma, otridadis na Maurisiu ka seta pa no fika la suma misionarius. Pa kila, no disignadu pa Rodesia (ku kunsidu gosi pa Zimbabue). Oca ku no ciga la, no kontra ku un polisia di imigrason ku sedu duru dimas, i tujinu entra na pais. I fala sin: “Bo serkadu di Malaui. E ka seta bos fika na Maurisiu, i gosi bo bin li pabia bo ka setadu fika na ki teras.” Anne kumsa ku cora. Parsin kuma ningin ka misti risibinu! Na ki mumentu N mistiba riba pa Inglatera. Pa fin, otridadis di imigrason pirmitinu pa no pasa noti na filial, ma e falanu di kuma, no dibi di apresenta na se sedi mansin di kil dia. No staba kansadu, ma no kontinua disa kusas na mon di Jeova. Mansin di ki dia di tardi, sin spera no risibi pirmison di fika na Zimbabue suma visitantis. Nunka N ka na diskisi di kuma ku N sinti kil dia, N staba konvensidu di kuma Jeova staba na gia no kamiñu.

Na filial di Zimbabue N disignadu pa tarbaja na dipartamentu di sirvisu pa kuida di Malaui ku Mosambiki. Ermons na Malaui staba na sufri pirsigison risu. Un di tarbaju ku N ta fasi, i traduzi relatorius ku superintendentis di sirkuitu di Malaui ta manda. Un dia oca ku N na tarbajaba te di noti pa kabanta un relatoriu, N cora oca ku N lei aserka di abusu violentu ku no ermons ku irmas staba na pasa. * Ma tambi N nkoraẑadu ciu pa se fidelidadi, se fe i ku manera ke nguenta. — 2 Kor 6:4, 5.

No fasi tudu ku no pudi pa da kumida spiritual pa ermons ku fika na Malaui, tambi pa kilis ku kuri pa Mosambiki pabia di violensia. Ekipa di traduson pa Ŝiŝeva, lingua ku mas ta papiadu na Malaui, munda pa un orta garandi di un ermon na Zimbabue. Ku bondadi, i kumpu kasas ku un skritoriu pa relis. Di la, e kontinua se tarbaju importanti di traduzi publikasons basiadu na Biblia.

No fasi aranẑu pa superintendentis di sirkuitu di Malaui, bai pa Zimbabue kada anu pa mati kongresu di distritu na Ŝiŝeva. Ora ke ciga e ta risibi sbosus di kongresu. Ora ke riba Malaui, e ta fasi se minjor pa konta ermons ke ke aprindi na kongresu. Na un anu, oca ke bai visita Zimbabue, no organiza Skola di Ministeriu di Renu pa nkoraẑa es superintendentis di sirkuitu koraẑosus.

Na Fevereru di 1975, N bai Mosambiki pa visita ermons ku irmas di Malaui, ku sta na kampu di refuẑiu. E ermons staba na sigi nobu orientasons di organizason di Jeova ku nklui aranẑu di tene un korpu di ansions. Nobu ansions organiza manga di atividadis spiritual, suma fasi diskursus publiku, kombersa aserka di testu di dia ku Sintinela, te mesmu fasi asembleias. E organizaba kampu suma na kongresu, ku dipartamentus di limpesa, distribuison di kumida ku suguransa. Es ermons fiel fasi manga di kusas ku benson di Jeova. Dipus di visita elis, N sinti nkoraẑadu dimas.

Na fin di anu 70, filial di Zambia kumsa ku kuida di Malaui. Ma, N kontinua na pensa na ermons di Malaui, i ora pa relis, suma ku manga di utrus ta fasi tambi. Manga di bias, suma membru di Kumison di Filial di Zimbabue, N ta kontra ku representantis di sedi mundial juntu ku ermons responsavel di Malaui, Afrika di Sul ku Zambia. Kada bias no ta fala di mesmu asuntu: “Ke mas ku no pudi fasi pa no ermons di Malaui?”

Ku tempu, pirsigison rapati. Ermons ku kuriba di Malaui kumsa ku riba puku-puku, i  kilis ku fikaba kumsa ku sufri menus pirsigison. Paisis visiñu disa Tustumuñas di Jeova prega i fasi runions, e tira ristrisons ke puiba elis. Mosambiki fasi mesmu kusa na 1991. Ma no ta punta no kabesa: ‘Kal tempu ku Tustumuñas di Jeova na Malaui na sta livri?’

Situason pulitiku na Malaui muda, i na 1993 guvernu para tuji atividadis di Tustumuñas di Jeova. I ka tarda, N papia ku un misionariu ku puntan: “Sera ki bu na riba pa Malaui?” Na ki tempu N teneba 59 anu, pa kila N ruspundil: “Nau, N beju ja!” Ma, na ki mesmu dia, no risibi un mensaẑen di Korpu Guvernanti ku kumbidanu pa no riba Malaui.

No gostaba di no disignason na Zimbabue, pa kila i seduba un disison difisil pa nos. No staba kontenti na Zimbabue, pabia no teneba bon amigus la. Ku bondadi, Korpu Guvernanti falanu kuma, no pudi fika na Zimbabue si no misti. Asin, no pudiba kuji no kamiñu ku fasilidadi, i fika na Zimbabue. Ma N lembra di kuma, Abraon ku Sara disa se kasa oca ke tene idadi, pa pudi obdisi Jeova i sigi si orientason. — Kum 12:1-5.

No disidi sigi orientason di organizason di Jeova, no riba pa Malaui na 1 di Fevereru di 1995, i sedu data ku no kompleta 28 anu, desdi ku no cigaba la pa purmeru bias. Kumison di Filial formadu pa mi ku mas dus ermons, i ka tarda no kumsa ku organiza atividadis di Tustumuñas di Jeova.

I seduba un benson di oja kuma ku Jeova pui pa tarbaju kirsi rapidu! Numeru di publikaduris omenta rapidu, i sai di serka di 30.000 na 1993, pa mas di 42.000 na 1998. * Korpu Guvernanti aprova pa i kumpudu nobu filial, pa kuida di manga di nesesidadis ku sta na ojadu na tiritoriu. No kumpra un terenu di 12 ektar na Lilongwe, i N disignadu pa tarbaja na kumison di konstruson.

Ermon Guy Pierce di Korpu Guvernanti, fasi diskursu di dedikason di nobu kaus ku kumpudu na Maiu di 2001. Mas di dus mil Tustumuñas di Jeova di Malaui mati, manga  delis fasi mas di 40 anu ke batisadu. E ermons ku irmas fiel nguenta pirsigison duru pa manga di anus, oca ku no tarbaju tujidu. E seduba koitadi, ma, e teneba fe ku amisadi forti ku Jeova. Gosi e sta kontenti di visita se nobu Betel. Kualker kau ke bai na Betel e ta kantaba kantikus di Renu na stilu Afrikanu, i kila tokaba no korson, i purmeru bias ku N oja un kusa suma es. I prova di kuma Jeova bensua ciu kilis ku nguenta difikuldadis ku fidelidadi.

Dipus ku konstruson di filial kaba, N kumsa ku risibi disignasons pa dedika Salons di Renu pa Jeova. Kongregasons na Malaui, benefisia di programa pa aselera konstruson di Salons di Renu, na teras nunde ku ermons ka tene manga di diñeru. Antis, alguns kongregasons ta fasiba runions na kaus ku ta kumpuduba ku eukaliptus. E ta fasi stera di paja pa kubri riba, ku kaus di sinta kumpridu di dubi. Dipus, ermons fikaba kontenti di fasi tijolus ku usadu pa kumpu se nobu kaus bonitu pa runions. Ma ermons pirfiri usa bankus kumpridu na Salons di Renu en ves di asentus, pabia e pudi tene mas un lugar pa cibini un algin.

Tambi N kontenti dimas di oja kuma ku Jeova juda jintis torna kristons maduru. N fikaba tokadu ku jovens ermons Afrikanu, pabia e staba dispostu pa juda i e aprindi rapidu manga di kusas, atraves di trenamentu ke dadu pa organizason di Jeova, i ku tarbaju ke ta fasi. Suma rusultadu, e konsigi kuida di manga di responsabilidadis na Betel, tambi na kongregasons. Kongregasons fortalisidu mas inda pa nobu superintendentis di sirkuitu lokal, manga delis i kasadu. Es kasalis disidi ka tene fijus inda pa pudi fasi mas na sirvisu di Jeova, apesar di kuma manga di jintis, te mesmu se familias misti pa e tene fijus.

Dipus di 52 anu na Afrika N teneba alguns purblemas di Saudi. Korpu Guvernanti aprova rekumendason di Kumison di Filial pa N disignadu mas pa Gran-Bretaña. No fikaba tristi di disa no disignason ku no gostaba ciu del, ma familia di Betel di Gran-Bretaña ta kuida ben di nos, manera ku no beju ja.

N sta konvensidu di kuma, disa pa Jeova gia ña kamiñu i minjor disison ku N ciga ja di toma. Si N konfiaba na ña propi ntindimentu, kin ku sibi nunde ku ña tarbaju na lebanba. Jeova sempri sibi ke ku N pirsisaba del, pa ‘ndirita ña kamiñu.’ (Dit 3:5, 6) Suma joven, N staba dimiradu di sibi kuma ku tarbaju ta fasidu na un fabrika garandi. Ma, organizason di Jeova dan un tarbaju ku dan mas kontentamentu. Pa mi, sirbi Jeova seduba i kontinua sedu, un vida ku na bardadi tene sintidu!