1. Ke ku no sta konvensidu del, i pabia?

 ORA ku bu oja purblemas na mundu, sera ki i ta difisil pa bu fia di kuma kusas na minjoria? Familias ka ta mostra amor pa n̈utru suma purmeru. Maioria di jintis aos, sedu mas violentu i e ta pensa so na se kabesa. Manga di jintis ta oja kuma i difisil konfia na kilis ku tene otridadi. Ma, es kusas pudi konvensiu di kuma kusas na minjoria. Pabia? Pabia jintis sta na aẑi izatamenti suma ki faladu na un profesia interesanti aserka di “fin de tempu”. (2 Tim 3:1-5) Nin un algin sinseru ka pudi nega di kuma es profesia sta na kumpri. Kumprimentu des profesia ta prova di kuma, Kristu Jesus kumsa guverna suma Rei di Renu di Deus. Entri manga di profesias aserka di Renu, es i so un delis. No fe na torna mas forti ora ku no studa mas utrus profesias ku sta na kumpri nes ultimus anus.

2. Ke ku no na fala del nes studu, i pabia? (Splika diseñu ku sta na kapa.)

² Nes studu, no na oja (1) profesia ku na judanu sibi kal tempu ku Renu kumsa ku guverna, (2) profesias ku na judanu ntindi di kuma Jesus torna Rei di Renu di Deus  na seu, i (3) profesias ku na mostra kuma ku inimigus di Renu di Deus na kabadu ku el. No na oja kuma, es profesias kombina ku n̈utru suma pesas di jugu di kebra kabesa, i na judanu oja di kuma, i ka na tarda, fin na ciga, suma ku Jeova purmiti.

3. Kal garantia ku profesia ku sta na Daniel 7:13, 14 ta danu aserka di Rei di Renu di Deus?

³ Profesia ku sta na Daniel 7:13, 14 ta danu garantia di kuma, Kristu Jesus na sedu minjor Guvernanti di Renu di Deus. Jintis di tudu nason na sta kontenti di ‘sirbil’, i ningin ka na toma si lugar suma Guvernanti. Utru profesia na livru di Daniel fala di kuma, Jesus na risibi si Renu na fin di un tempu ku markadu, ku comadu di seti tempu. Sera ki i pusivel sibi kal tempu ku Jesus sedu Rei?

4. Splika kuma ku Daniel 4:10-17 judanu diskubri kal anu ku Kristu na kumsa rena? (Jubi tambi nota.)

⁴ Lei Daniel 4:10-17. “Seti tempu” representa 2.520 anu. Es tempu kumsa na 607 AEK, oca ku Babilonius tira ultimu rei na tronu di Jeova na Jerusalen. I kaba na 1914 EK, oca Jeova pui Jesus suma Rei di Renu di Deus, “kil ku sedu si propi dunu”. * — Eze 21:25-27.

5. Di kal manera ku profesia ku fala di “seti tempu” pudi benefisianu?

⁵ Kuma ku es profesia pudi benefisianu? Ntindi profesia ku na fala di “seti tempu”, ta danu konfiansa di kuma Jeova na kumpri si purmesa na tempu sertu. Jeova disidi di kuma i na pui pa Jesus sedu Rei na tempu ki marka. Oca kil tempu ciga, Jeova fasi suma ki fala. Pa kila, i na kumpri tambi tudu utrus profesias na tempu ki marka. Ku sertesa, dia di Jeova “ka na tarda.” — Aba 2:3.

6. (a) Kal kusas ku no ta oja na Tera, ku ta mostra kuma Kristu sta na guverna na seu? (b) Kuma ku es kusas konfirmadu na profesia ku sta na Apokalipsi 6:2-8?

⁶ Pertu di fin di si ministeriu na Tera, Jesus fala di kusas ku na kontisi na mundu, ku na juda si sigiduris sibi di kuma i kumsa rena na seu. Alguns des kusas ki fala del i geras, fomi ku tirmidura di con. Tambi i fala di kuma, i na ten duensas ku na laga “na manga di lugar”, un isemplu di kila i duensa di COVID-19. Es kusas fasi parti di ke ku Biblia coma di “sinal” di presensa di Kristu. (Mat 24:3, 7; Luk 21:7, 10, 11) Mas di 60 anu dipus ki muri i riba pa seu, Jesus da apostulu Jon mas garantia di kuma es kusas na bin sedu. (Lei Apokalipsi 6:2-8.) Tudu es kusas kontisi disna ku Jesus sedu Rei na 1914.

7. Pabia ku manga di kusas mau kontisi na Tera disna ku Jesus sedu Rei?

⁷ Ke ku manda situason na mundu piora oca ku Jesus sedu Rei? Apokalipsi 6:2 danu un informason importanti. Purmeru kusa ku Jesus fasi dipus ki sedu Rei di Renu di Deus, i gera. I geria kontra kin? I geria kontra Diabu ku si dimonius. Di akordu ku Apokalipsi kapitulu 12, Satanas pirdi gera, el ku dimonius e fercadu bas na Tera. Satanas kumsa ku  mostra si raiba kontra pekaduris, i kila tisi ‘ai pa kilis ku mora na tera’. — Apok 12:7-12.

8. Suma ku no oja profesias aserka di Renu sta na kumpri, kuma ku es pudi benefisianu?

⁸ Kuma ku es profesias pudi benefisianu? Situasons ku sta na pasa na mundu ku komportamentu di jintis, ta judanu nota di kuma Jesus sedu Rei. En ves di fika mal ora ku no oja jintis na pensa so na se kabesa i sedu mau dimas, no ta lembra di kuma, se komportamentu sta na kumpri profesia di Biblia. Renu di Deus sta ja na guverna! (Sal 37:1) Nkuantu Armajedon sta mas na pertusi, no mas na oja sufrimentu na mundu. (Mar 13:8; 2 Tim 3:13) Sera ki bu ka na gardisi no Pape amorosu ku sta na seu, pa manera ki judanu ntindi pabia ki ten manga di purblemas na mundu?

9. Ke ku profesia ku sta na Daniel 2:28, 31-35, fala aserka di ultimu putensia mundial, i kal tempu ki kumsa manda?

⁹ Lei Daniel 2:28, 31-35. No sta na oja kumprimentu des profesia aos. Suñu di Nabukodonosor mostra ke ku na kontisi “na kabantada di tempu”, dipus di Kristu kumsa rena. Inimigus di Jesus ku sta na Tera, nklui ultimu putensia mundial ku Biblia falaba ja del, ku representadu pa “pes di feru ku di lama”. Es putensia mundial sta ja na manda. I kumsa ku manda na Purmeru Gera Mundial oca ku Gran-Bretaña ku Stadus Unidu kumsa ku kolabora di un manera spesial, e forma putensia Anglo-Amerikanu. Statua di suñu di Nabukodonosor falaba ja tambi di pelu menus dus kusas  aserka des putensia mundial, ku na sedu diferenti di renus ku pasa.

10. (a) Ke ku no sta na oja aos na Putensia Mundial Anglo-Amerikanu ku faladuba ja del na profesia di Daniel? (b) Kal pirigu ku no dibi di ivita? (Jubi kuadru “ Toma kuidadu ku lama!”)

¹⁰ Purmeru, diferenti di utrus putensias mundial ku faladuba ja del na vison, Putensia Mundial Anglo-Amerikanu ka representadu pa materialis risistenti suma uru o prata, ma pa feru jagasidu ku lama. Lama na representa povu. (Dan 2:43) Aos, no pudi oja di manera klaru influensia di jintis na eleisons, kampañas di diritu sivil, manifestasons garandi i ku sindikatus ku ta pui pa i difisil pa es putensia mundial fasi ke ke misti.

11. Kuma ku guvernu di Putensia Mundial Anglo-Amerikanu, ta fortalisi no konfiansa di kuma no sta na vivi na tempu di fin?

¹¹ Sugundu, Putensia Mundial Anglo-Amerikanu ku representadu pa pes di statua garandi, i ultimu putensia mundial ku Biblia falaba ja del. I ka na bin ten utru putensia pulitiku dipus del. Ma, Renu di Deus na bin kaba ku el na Armajedon juntu ku tudu utrus guvernus di pekadur. * — Apok 16:13, 14, 16; 19:19, 20.

12. Kal utru kusa ku profesia di Daniel fala del ku ta danu animu ku speransa?

¹² Kuma ku es profesia pudi benefisianu? Profesia di Daniel fala di utru kusa ku ta mostra di kuma, no sta na vivi na tempu di fin. Mas di 2.500 anus atras, Daniel falaba di kuma dipus di Babilonia, i na ten kuatru putensia mundial ku na manda riba di povu di Deus. Alen des, i konta di kuma ultimu des putensia, na sedu Putensia Mundial Anglo-Amerikanu. Es ta danu animu ku speransa di kuma i ka na tarda, Renu di Deus na bin kaba ku tudu guvernus di pekadur i manda riba di tudu Tera. — Dan 2:44.

13. Ke ku “oitu rei” ku “des rei” ku faladu del na Apokalipsi 17:9-12 ta representa, i kuma ku es profesia sta na kumpri?

¹³ Lei Apokalipsi 17:9-12. Pabia di manga di danu ku Purmeru Gera Mundial tisi, i kontisi un kusa ku kumpri utru profesia di Biblia aserka di fin de tempu. Guvernantis di mundu misti tisi pas na mundu. Pa kila, na Janeru di 1920 e forma Liga di Nasons ku bin substituidu pa Nasons Unidu na Otubru di 1945. Es organizason comadu di “oitu rei”. Ma, i ka putensia mundial. I tene puder so pabia di guvernus ku ta apoial. Biblia coma ki guvernus di “des rei”.

14-15. (a) Ke ku Apokalipsi 17:3-5 fala aserka di “Garandi Babilonia”? (b) Ke ku sta na pasa ku apoiu ku sta na dadu pa riliẑion falsu?

¹⁴ Lei Apokalipsi 17:3-5. Na un vison ku apostulu Jon risibi di Deus, i oja un minjer di mau vida comadu “Garandi Babilonia” ku representa tudu grupu di riliẑions falsu. Kuma ku es vison sta na kumpri? Pa manga di tempu, riliẑions falsu kopera di pertu ku puderis pulitiku di mundu, i e ta apoia elis. Ma, i ka na tarda, Jeova na pui na korson di puderis pulitiku “pa e fasi ke ki teneba na si sintidu”. Kal ku na sedu rusultadu? Es puderis pulitiku, ku sedu “des rei”, na ataka organizasons di riliẑions falsu i kaba ku elis. — Apok 17:1, 2, 16, 17.

¹⁵ Kuma ku no sibi kuma fin di Garandi  Babilonia pertu? Pa ruspundi es purgunta, i bon lembra di kuma parti di antigu sidadi di Babilonia proteẑiduba pa yagu di riu garandi comadu riu Eufrates. Livru di Apokalipsi kompara milyons di apoiaduris di Garandi Babilonia, suma “yagu” ku ta proteẑi. (Apok 17:15) Ma, i konta tambi di kuma yagu na “seku”, es ta mostra kuma tudu grupu di riliẑions falsu na pirdi manga di se apoiaduris. (Apok 16:12) Es profesia sta na kumpri aos, pabia manga di jintis ka sedu riliẑiosu, i e ta buska suluson di se purblemas na utru kau.

16. Kal benefisiu ku no tene di ntindi tempu ku Nasons Unidu formadu, i kal tempu ku Garandi Babilonia na kabadu ku el?

¹⁶ Kuma ku es profesias pudi benefisianu? Ku formason di Nasons Unidu, tambi manera ku manga di jintis ka sta ja na apoia riliẑions falsu, ta prova di kuma no sta na fin de tempu. Apesar di kuma manga di jintis ka sta na apoia Garandi Babilonia, i ka kila ku na kaba ku organizasons di riliẑions falsu. Suma ki faladuba  ja, Jeova na pui na korson di “des rei”, ku sedu puderis pulitiku ku ta apoia Nasons Unidu, “pa e fasi ke ki teneba na si sintidu”. Di repenti es nasons na kaba ku Garandi Babilonia, es na dimira jintis na mundu. * (Apok 18:8-10) Ora ku Garandi Babilonia kabadu ku el, es na afeta mundu ntidu i kila pudi tisi difikuldadis, ma povu di Deus na tene pelu menus dus motivu di fika kontenti. Riliẑions falsu, ku sedu inimigus di Jeova Deus na kabadu ku el pa sempri, tambi i ka na tarda no na libradu des mundu mau! — Lukas 21:28.

17-18. (a) Kuma ku no pudi kontinua torna no fe forti? (b) Ke ku no na bin fala del na studu ku na bin?

¹⁷ Daniel falaba ja di kuma, “ntindimentu” di bardadi na torna ciu. I kila ku sedu! Gosi no ntindi profesias aserka di no tempu. (Dan 12:4, 9, 10) Manera ku es profesias sedu izatu dimas, e ta aumenta no konfiansa na Jeova ku si Palabra nspiradu. (Isa 46:10; 55:11) Pa kila, kontinua torna bu fe forti, atraves di studa Biblia fundu, i juda utrus disenvolvi un bon relason ku Jeova. I na guarda ketu tudu kilis ku fiansa nel, i na da elis “susegu.” — Isa 26:3.

¹⁸ Na studu ku na bin, no na bin fala di profesias aserka di kongregason kriston na tempu di fin. Suma ku no na bin aprindi, es profesias mostra tambi di kuma no sta na vivi na fin de tempu. No na bin oja mas provas di kuma, Jesus, ku sedu gosi no Rei, sta na gia si sigiduris fiel.