1. Ke ku Jeova fasi logu dipus ku Adon ku Eva peka? (Kumsada 3:15)

 LOGU dipus ku Adon ku Eva peka, Jeova da speransa pa se fijus atraves di un profesia importanti. Ke ku Jeova fala sta na Kumsada 3:15. — Lei.

2. Ke ku manda es profesia i importanti?

² Es profesia sta na purmeru livru di Biblia. I un profesia importanti, pabia di un manera o di utru, tudu livrus di Biblia sta ligadu ku el. Suma ku fojas ta juntadu i koladu pa forma un livru, palabras ku faladu del na Kumsada 3:15 junta tudu livrus di Biblia so na un mensaẑen, ku sedu, Deus na manda un Libertadur pa kaba ku Diabu i ku tudu kilis ku ta sigil i ku ta fasi ke ki mau. * I na sedu un benson pa tudu kilis ku ama Jeova!

3. Ke ku no na fala del nes studu?

³ Nes studu, no na oja resposta des purguntas aserka di profesia di Kumsada 3:15: Ba kin ku faladu del? Kuma ku es profesia kumpri? I kuma ku no sta na benefisia del?

4. Kin ki “serpenti”, i kuma ku no sibi kila?

⁴ Kumsada 3:14, 15 fala di “serpenti”, “jorson” di serpenti, “minjer” ku “jorson” di minjer. Biblia judanu kunsi kada un delis. * Pa kumsa, no na papia di “serpenti”. Un serpenti normal ka pudi ntindi ke ku Jeova fala na jardin di Eden. Pa kila, julgamentu di Jeova dibi di sedu kontra un kriatura jiru. Kila i kin? Apokalipsi 12:9 splika di manera klaru kin ki serpenti. I fala kuma “antigu serpenti” i Satanas, Diabu. Ma ba kin ku sedu jorson di serpenti?

5. Ba kin ki jorson di serpenti?

⁵ Utrora Biblia ta usa palabra “jorson” pa fala di kilis ku ta kopia un algin diritu, i e pudi comadu di si fijus. Pa kila, jorson di serpenti i anjus ku ka sedu fiel, ku jintis ku sta kontra Jeova Deus i kontra si povu, suma Satanas. Es nklui anjus ku bandona se pusison na seu na tempu di Noe, tambi jintis mau ku ta komporta suma se pape, Diabu. — Kum 6:1, 2; Jon 8:44; 1 Jon 5:19; Jud 6.

6. Ke ku manda “minjer” ka pudi sedu Eva?

⁶ Gosi, no pirsisa di sibi kin ki “minjer”. I ka pudi sedu Eva. Pabia di ke? Jubi so un di motivus. Profesia fala di kuma jorson di minjer na ‘masa’ serpenti na kabesa. Suma ku no ojaba ja, serpenti i un anju mau, comadu Satanas, i nin un umanu imperfeitu di jorson di Eva ka tene kapasidadi  di masal na kabesa. Pa kila, kuma ku Satanas na kabadu ku el?

7. Suma ki faladu na Apokalipsi 12:1, 2, 5, 10, kin ki minjer ku faladu del na Kumsada 3:15?

⁷ Ultimu livru di Biblia kontanu kin ki minjer ku faladu del na Kumsada 3:15. (Lei Apokalipsi 12:1, 2, 5, 10.) I ka un minjer ku sta na Tera! I tene lua bas di si pe, ku un koroa ku dozi strela na si kabesa. I padi un fiju ku ka kustuma ojadu, ku sedu Renu di Deus. Es Renu sta na seu, pa kila, minjer tambi dibi di sta na seu. I na representa parti di organizason di Jeova ku sta na seu ku formadu pa si anjus fiel. — Gal 4:26.

8. Kin ki parti mas importanti di jorson di minjer, i kal tempu ki sedu es parti mas importanti? (Kumsada 22:15-18)

⁸ Palabra di Deus judanu tambi sibi kin ki parti mas importanti di jorson di minjer. Es parti mas importanti di jorson di minjer dibi di bin na jorson di Abraon. (Lei Kumsada 22:15-18.) Suma ku profesia falaba ja, Jesus bin di jorson des omi fiel. (Luk 3:23, 34) Ma, es jorson dibi di tene puder mas di ki pekadur, pabia i dibi di masa Satanas Diabu i kaba ku el. Pa kila, oca ki tene kuas 30 anu, i unjidu ku spiritu santu di Deus. Oca ki unjidu, Jesus torna parti mas importanti di jorson di minjer. (Gal 3:16) Dipus di Jesus muri i resusitadu, Deus “pul koroa di gloria ku onra”, tambi i dal “tudu puder na seu ku na tera”, es nklui puder di “kaba ku kusas ku diabu fasi.” — Eb 2:7; Mat 28:18; 1 Jon 3:8.   

9-10. (a) Ba kin mas ku fasi parti di jorson di minjer, i kal tempu ke fasi parti del? (b) Ke ku no na bin aprindi?

⁹ Ma, alen di Jesus, utrus tambi na fasi parti di jorson. Apostulu Paulu mostra ba kin ku fasi parti di jorson, oca ki fala sin pa kristons unjidu judeus ku jintius: “Si bo pertensi Kristu, bo sedu jorson di Abraon, bo na risibi kil ku Deus fala i na da.” (Gal 3:28, 29) Ora ku Jeova unji un kriston ku spiritu santu, es algin ta fasi parti di jorson di minjer. Asin, jorson formadu pa Jesus Kristu ku 144.000 ku na bai guverna ku el. (Apok 14:1) Elis tudu e ta sforsa pa pensa i aẑi suma se Pape, Jeova Deus.

¹⁰ No sibi ja ba kin ku faladu del na Kumsada 3:15. Gosi, no na bin aprindi ke ku Jeova fasi ja pa kumpri es profesia, i kuma ku kila ta judanu aos.

11. Na kal sintidu ku jorson di minjer murdidu “na kalkañada”?

¹¹ Di akordu ku profesia di Kumsada 3:15, serpenti na murdi jorson di minjer “na kalkañada.” Kila kumpri oca ku Satanas usa judeus ku romanus pa mata Fiju di Deus. (Luk 23:13, 20-24) Suma ku molostru na kalkañada pudi tuji algin yanda pa algun tempu, di mesmu manera, oca ku Jesus muri i ka konsigi fasi kualker kusa pa algun tempu, oca ki sta tris dia na koba. — Mat 16:21.

12. Kuma ku kabesa di serpenti na masadu, i na kal tempu?

¹² Pa profesia di Kumsada 3:15 pudi kumpri, Jesus ka pudiba kontinua na  koba. Pabia di ke? Pabia di akordu ku profesia, jorson na masa kabesa di serpenti. Es signifika di kuma, kalkañada di Jesus pirsisa di kuradu. I kila propi ku kontisi! Na terseru dia dipus di si mortu, Jesus lantandadu pa vivi na seu, nunka mas i ka na muri. Na tempu ku Deus marka, Jesus na kaba ku Satanas. (Eb 2:14) Kristu ku kilis ku na rena ku el na kaba ku inimigus di Deus, ku sedu jorson di serpenti. — Apok 17:14; 20:4, 10. *

13. Kuma ku no sta na benefisia di kumprimentu des profesia?

¹³ Si bu sedu un servu dedikadu di Deus, bu sta na benefisia di kumprimentu des profesia. Jesus bin pa Tera suma omi. I kopia manera di sedu di si Pape, sin falia. (Jon 14:9) Asin, atraves del ku no kunsi i no ama Jeova Deus. Tambi no ta benefisia di nsinu di Jesus i di kuma ki ta orienta kongregason kriston aos. I nsinanu vivi di un manera ku na judanu kontenta Jeova. Anos tudu no pudi benefisia pa manera ku Jesus muri o murdidu na kalkañada. Di kal manera? Oca Jesus resusitadu, i da balur di si sangi suma sakrifisiu perfeitu pa “limpanu di tudu pekadu.” — 1 Jon 1:7.

14. Kuma ku no sibi kuma profesia ku Jeova fasi na Eden ka kumpri logu-logu? Bu pudi splika.

¹⁴ Ke ku Jeova fala na profesia ki fasi na Eden, ta mostra di kuma i ka na kumpri na ki tempu. I na toma tempu pa minjer forma jorson ku purmitidu, pa Diabu junta si sigiduris i pa i ten inimisadi (o odiu) entri ki dus grupu. Si no ntindi es profesia, i na judanu, pabia i avisanu di kuma, mundu ku sta na kontroladu pa Satanas na odia adoraduris di Jeova. Mas tardi, Jesus da si disipulus mesmu avisu. (Mar 13:13; Jon 17:14) Sin duvida, no sta na oja kumprimentu des parti di profesia, spesialmenti duranti es ultimus 100 anus. Di kal manera?

15. (a) Pabia ku odiu ku mundu tene pa jorson di minjer aumenta? (b) Pabia ku no ka tene motivu di medi Satanas?

¹⁵ Puku dipus ku Jesus numiadu suma Rei Mesianiku na 1914, Satanas serkadu di seu. Gosi i obrigadu fika li na tera, i pera dia ki na kabadu ku el. (Apok 12:9, 12) Ma i ka sta na pera sin fasi nada. Satanas sta ku raiba, i ataka povu di Deus. (Apok 12:13, 17) E ku manda, odiu di mundu aumenta kontra povu di Deus. No ka tene motivu di medi Satanas ku si sigiduris. En ves di kila, no pudi tene mesmu konfiansa suma apostulu Paulu ku fala sin: “Si Deus i pa nos, kin ku na sta kontra nos?” (Rom 8:31) No pudi tene konfiansa total na Jeova, pabia suma ku no oja, maioria di kusas ku faladu del na profesia di Kumsada 3:15 kumpri ja.

16-18. Kuma ku ntindi profesia di Kumsada 3:15 juda Curtis, Ursula ku Jessica?

¹⁶ Purmesa di Jeova ku sta na Kumsada 3:15 pudi judanu nfrenta kualker difikuldadi na no vida. Curtis ku ta sirbi suma misionariu na Guam  fala sin: “Kusas ku N pasa na ña vida pui pa i difisil pa N manti fiel pa Jeova. Ma, medita na profesia di Kumsada 3:15 judan pa N kontinua konfia na ña Pape ku sta na seu.” Curtis sta na pera dia nunde ku Jeova na bin kaba ku tudu no difikuldadis.

¹⁷ Un irma na Baviera comadu Ursula fala di kuma, ntindi Kumsada 3:15 judal sta konvensidu di kuma Biblia i nspiradu pa Deus. I oja kuma ku tudu utrus profesia sta ligadu ku es profesia, i es tokal ciu. I fala mas: “Oca ku N aprindi di kuma Jeova aẑi logu-logu pa danu speransa, es pun pa N amal mas inda.”

¹⁸ Jessica di Mikronesia fala sin: “N ta lembra inda di kuma ku N sinti oca ku N nota di kuma, N oja bardadi! Profesia ku faladu del na Kumsada 3:15 staba na kumpri. Es judanba lembra di kuma, vida ku no sta na vivi aos i ka kila ku Jeova mistiba pa nos. Tambi es profesia judan fortalisi ña konfiansa di kuma, sirbi Jeova ta pirmitin tene minjor vida gosi, tambi un vida mas minjor inda na futuru.”

19. Ke ku manda no pudi tene sertesa di kuma ultimu parti di profesia na kumpri?

¹⁹ Suma ku no oja, Kumsada 3:15 sta ja na kumpri. I sibidu ja klaru ba kin ki jorson di minjer ku jorson di serpenti. Jesus ki parti mas importanti di jorson di minjer, kuradu di si molostru na kalkañada, gosi i sedu Rei puderosu ku ka ta muri. Kilis ku sta na kujidu pa forma sugundu parti di jorson di minjer, sta ja kuas pa kompleta. Suma purmeru parti di profesia kumpri ja, no tene tudu motivu di fia di kuma, ultimu parti na kumpri tambi, ku sedu kabesa di serpenti na masadu. Servus di Deus na kontenti dimas ora ku Satanas kabadu ku el! Ka bu disisti te ora ku ki dia ciga. No Deus i di konfiansa. Atraves di jorson di minjer, Jeova na tisi manga di bensons pa “tudu nasons di mundu”. — Kum 22:18.