Jesus nsina jintis pa e tene pas ku n̈utru. Ma un bias, i fala si apostulus: “Ka bo pensa kuma N bin pa tisi pas na tera. N ka bin tisi pas, ma N tisi spada. N bin pa dividi omi kontra si pape, fiju femia kontra mame, minjer kontra mame di si omi.” (Mat 10:34, 35) Ke ku Jesus mistiba fala?

Jesus ka misti separa familia di n̈utru, ma i sibi kuma, kusas ki na nsina na tisi divison na alguns familia. Ma, kilis ku misti sedu disipulus di Kristu i batisa, pirsisa di ntindi di kuma, utrora se familia pudi ka kontenti ku disison ke toma. Si kontra se parseru o utru algin na familia sta kontra elis, kila pudi pui pa i difisil pa e kontinua sedu fiel pa nsinamentus di Kristu.

Biblia nkoraẑa kristons pa e tene “pas ku tudu jinti”. (Rom 12:18) Ma nsinus di Jesus pudi sedu suma “spada” na alguns familia. Es pudi kontisi ora ku un algin na familia seta nsinus di Jesus, ma utrus nega o e sta kontra ki nsinus. Si es kontisi, kilis di si familia ta torna “inimigu” di ki algin ku sta na aprindi bardadi. — Mat 10:36.

Disipulus di Kristu ku sta na vivi ku se familia ku sta na utru riliẑion, utrora, e ten ku disidi se na fasi kusas ku na kontenta Jeova ku Jesus, o fasi kusas ku na kontenta se familia. Pur isemplu, familia ku ka sedu Tustumuña di Jeova, pudi tenta forsija elis pa e fasi un festa riliẑiosu. Ora ke testadu, kin ke na kontenta? Jesus fala: “Kin ku gosta di si pape o mame mas di ki mi, i ka mersi sedu di mi”. (Mat 10:37) Jesus ka misti fala di kuma pa sedu si disipulus, kilis ku na aprindi bardadi dibi di rapati amor ke tene pa se papes. Ma ke ki i staba na nsina elis, i pa e sibi disidi kal ki kusas mas importanti na se vida. Si kontra no familia sta kontra no sforsu di adora Jeova, no na kontinua ama elis, ma no ta rikuñisi di kuma no amor pa Jeova i mas importanti.

Sin duvida, no ta sinti mal ora ku no familia sta kontra nos. Mesmu asin, disipulus di Jesus dibi di lembra di si palabras: “Kin ku ka toma si krus pa bin ña tras, i ka mersi sedu di mi.” (Mat 10:38) Na utrus palabras, kristons ta oja oposison di familia suma parti di sufrimentu ku disipulus di Kristu ta seta nguenta. Ma e tene speransa di kuma, pabia di se bon komportamentu, se familia na muda se manera di pensa i misti aprindi mensaẑen ku sta na Biblia. — 1 Ped 3:1, 2.