1. Ke ku pudi juda povu di Jeova pa e kontinua adoral, mesmu ku purblemas ke ta pasa?

 BIBLIA fala di kuma tempu ku no sta na vivi nel i “dias di kansera”. (2 Tim 3:1) Alen di purblemas ku no ta pasa nes mundu mau, povu di Jeova ta pirsigidu tambi. Ke ku ta judanu kontinua adora Jeova mesmu kes purblemas? Un di kusa importanti ku ta judanu i kunsi Jeova suma “Deus bibu.” — Jer 10:10; 2 Tim 1:12.

2. Na kal sintidu ku Jeova sedu Deus bibu?

² Jeova ta oja tudu purblemas ku no ta pasa i sempri i ta buska oportunidadis pa judanu. (2 Kron 16:9; Sal 23:4) Si no ta oja Jeova suma Deus bibu, kila pudi danu forsa pa nguenta kualker purblema ku no pudi pasa. No jubi kuma ku kila kontisi ku rei Davi.

3. Ke ku Davi misti fala ku palabras, Jeova “sta bibu”?

³ Davi kunsiba Jeova, tambi i konfiaba nel. Oca rei Saul ku utrus tenta mata Davi, i ora pa Jeova judal. (Sal 18:6) Dipus ku Deus ruspundi si orason i salbal, Davi fala sin: Jeova “sta bibu!” (Sal 18:46) Nes testu, Davi ka staba so na rikuñisi di kuma Deus ten. Un livru mostra di kuma, Davi konfiaba di kuma Jeova i Deus di bardadi ku sempri ta juda si servus. Pa ke ki pasa, Davi sibiba di kuma Jeova i Deus bibu, i kila lebal pa i kontinua sirbil i ngabal. — Sal 18:​28, 29, 49.

4. Kuma ku no ta benefisia di oja Jeova suma Deus bibu?

⁴ Sta konvensidu di kuma Jeova i Deus bibu, pudi judanu sirbil di tudu korson. No na tene forsa di nguenta  situasons difisil i tene vontadi di kontinua tarbaja duru na si sirvisu. Tambi no na sta disididu pa kontinua sedu amigus di Jeova.

DEUS BIBU NA DAU FORSA

5. Ke ku pudi danu konfiansa ora ku no sta na pasa situasons difisil? (Filipensis 4:13)

⁵ No pudi nguenta kualker situason difisil, nin si i pikininu o garandi, si no lembra di kuma Jeova i Deus bibu, tambi i sta pruntu pa judanu. Jeova pudi judanu lida ku kualker purblema, pabia nin un purblema i ka difisil dimas pa no Deus. I Deus ku tene tudu puder, i pudi danu puder pa nguenta. (Lei Filipensis 2:13.) Asin, no tene tudu motivus di nfrenta no purblemas ku konfiansa. Ora ku no oja kuma ku Jeova judanu na purblemas pikininu, no ta tene konfiansa di kuma i na judanu tambi na purblemas garandi.

6. Ke ku Davi pasa ocal joven ku aumenta si konfiansa na Jeova?

⁶ No jubi dus kusa ku kontisi ku Davi ku aumenta si konfiansa na Jeova. Oca Davi seduba joven bakiadur, un ursu ku un lion paña karnel di si pape. Na tudu es dus situasons, ku koraẑen, Davi serka es limarias i salba karnel. Ma Davi ka pensaba di kuma i fasi es ku si propi forsa. I sibiba di kuma i Jeova ku judal. (1 Sam 17:​34-37) Davi nunka ka diskisi di ke ku pasa. Pensa fundu nes, judal tene konfiansa di kuma, Deus bibu na dal forsa na futuru.

7. Ke ku Davi konsentra nel, i pabia ku kila judal geria ku Golias?

⁷ Mas tardi, ocalba joven ku ka teneba inda 20 anu, Davi baiba kampamentu di tropas israelitas. I nota di kuma tropas mediba pabia un jiganti filisteu comadu Golias, ta saiba pa “disafia tropas di Israel”. (1 Sam 17:​10, 11) Tropas mediba pabia e konsentraba na jiganti i na ke ki i na falaba na kampu di gera. (1 Sam 17:​24, 25) Ma, Davi konsentraba na utru kusa. Davi sibiba di kuma oca ku Golias staba na goza tropas di Israel, i staba na koba “Deus bibu”. (1 Sam 17:26) Davi staba na pensa na Jeova. I konfiaba di kuma, Deus ku judal oca ki i seduba bakiadur, i na judal mas nes situason. Ku ajuda di Deus, Davi geria ku Golias i matal! — 1 Sam 17:​45-51.

8. Ke ku pudi aumenta no konfiansa di kuma, Jeova na judanu ora ku no sta na pasa pa purblemas? (Jubi tambi foto.)

⁸ Anos tambi no pudi sai ben ora ku no na pasa purblemas, si no lembra di kuma Deus bibu sta pruntu pa judanu. (Sal 118:6) No pudi aumenta no konfiansa di kuma Jeova na judanu, ora ku no lembra ke ki i fasi pa nos na pasadu. Lei storias di Biblia ku na lembrantau kuma ku Jeova salba si servus. (Isa 37:​17, 33-37) Jubi tambi informasons ku sta na no site jw.org ku ta mostra kuma ku Jeova juda no ermons ku irmas na no tempu. Alen di kila, lembra di mumentus ku Jeova judau. Ka bu preokupa si bu ka tene spriensias garandi, suma geria ku ursu o ku lion. Pabia di ke? Bardadi i di kuma, Jeova fasi manga di kusas pa bo! Jeova kumbidau pa bu sedu si amigu. (Jon 6:44) I so ku si ajuda ku pui bu kontinua na sirbil te aos. Pabia ku  bu ka na pidil pa i judau lembra di mumentus ki ruspundi bu orasons, judau na mumentu ku bu pirsisa o kuida di bo, oca ku bu na pasa un situason difisil? Pensa fundu nes mumentus na aumenta bu konfiansa di kuma Jeova na kontinua judau.

9. Ke ku no pirsisa di lembra del ora ku no na pasa pa purblemas? (Ditus 27:11)

⁹ Oja Jeova suma un Algin bibu, na judanu oja no purblemas di un bon manera. Ora ku no na pasa pa purblemas, no pirsisa di konsentra na ke ki mas importanti. Diabu fala di kuma, ora ku no tene purblemas, no na bandona Jeova. Pa kila, manera ku no ta reaẑi dianti di purblemas ta pui pa Jeova kontenti o fika tristi. (Jo 1:​10, 11; lei Ditus 27:11.) Ora ku no kontinua sedu fiel pa Jeova mesmu ku no purblemas, no ta mostra no amor pa Jeova, i mostra tambi di kuma Diabu i munturus. Sera ki nunde ku bu sta na vivi, guvernu sta kontra povu di Jeova, bu sta na pasa purblemas finanseru, o jintis ku bu sta na prega ka sta na mostra interesi, o bu sta na pasa utru purblema? Si bu resposta i sin, lembra di kuma bu situason pudi dau oportunidadi di kontenta Jeova. Lembra tambi di kuma, Jeova nunka ka na pirmiti pa bu pasa un purblema ku bu ka na pudi nguenta. (1 Kor 10:13) I na dau forsa pa bu nguenta.

DEUS BIBU NA BIN PAGAU

10. Ke ku Deus bibu na bin fasi pa kilis ku ta adoral?

¹⁰ Jeova sempri ta paga kilis ku ta adoral. (Eb 11:6) I ta danu pas ku kontentamentu gosi, tambi i na bin danu vida ku ka ta kaba na futuru. No pudi pui no speransa na Jeova, i sta konvensidu di kuma i tene diseẑu ku puder pa paganu. Pabia des, no ta kontinua  sta okupadu na no adorason, suma ku servus fiel di Deus fasiba na pasadu. I es ku Timótiu fasiba. — Eb 6:​10-12.

11. Ke ku leba Timótiu na tarbaja duru na kongregason? (1 Timótiu 4:10)

¹¹ Lei 1 Timótiu 4:10. Timótiu puiba si speransa na Deus bibu. E ku manda i tarbaja duru pa Jeova i pa utrus. Kuma ki fasil? Apostolu Paulu nkoraẑal pa i fasi progresu na si manera di nsina, na pregason i na kongregason. Paulu falal tambi pa i da un bon isemplu pa si ermons na fe, tantu pa jovens suma pa jintis di idadi. I dadu tambi tarbaju difisil, nkluindu da konsijus forti ma ku amor, pa kilis ku pirsisaba del. (1 Tim 4:​11-16; 2 Tim 4:​1-5) Utrora utrus ka ta notaba di tarbaju ku Timótiu ta fasiba o e ka ta dalba balur, ma i teneba sertesa di kuma Jeova na pagal. — Rom 2:​6, 7.

12. Pabia ku ansions ta tarbaja duru na kongregason? (Jubi tambi foto.)

¹² Aos tambi, ansions pudi tene sertesa di kuma Jeova ta oja, tambi i ta da balur pa se bon tarbaju. Alen di pastoria, nsina i prega, manga di ansions ta juda na projetus di konstruson i juda ora ki ten disastris natural. Utrus ta sirbi na Grupus ku ta Visita Duentis o na Kumisons di Ligason ku Ospital. Ansions ku ta sta dispunivel pa fasi es tarbajus sibi di kuma, kongregason i di Jeova i ka di pekaduris. Pabia di kila, e ta tarbaja di tudu korson pa kongregason i e konfia ciu di kuma, Jeova na paga elis pa ke ke ta fasi. — Kol 3:​23, 24.

13. Kuma ku Jeova ta sinti ora ku no ta sforsa pa sirbil?

¹³ Anos tudu no ka pudi sedu ansions. Ma anos tudu no tene un kusa ku no pudi da pa Jeova. No Deus  ta kontenti dimas ora ku no fasi no minjor pa sirbil. I ta nota di oferta ku no ta da pa obra mundial, nin si i pikininu. I ta kontenti dimas ora ku no yalsa mon pa kumenta na runions, mesmu si no tene medu, tambi i ta kontenti ora ku no purda kilis ku yaranu. Mesmu si bu sinti di kuma bu ka pudi fasi ciu pa Jeova suma ku bu mistiba, konfia di kuma Jeova da balur pa ke ku bu ta konsigi fasi. I amau pabia di kusas ku bu ta fasi, tambi i na bin pagau. — Luk 21:​1-4.

KONTINUA SEDU AMIGU DI DEUS BIBU

14. Kuma ku kontinua sedu amigu di Jeova na judanu kontinua sedu fiel? (Jubi tambi foto.)

¹⁴ Si no sedu amigu intimu di Jeova, i na sedu mas fasil pa no kontinua sedu fiel. I es ku kontisi ku José. I nega fasi pekadu seksual. I sibi di kuma ke ki na fasi pudi afeta Jeova, i ka misti pui pa Jeova fika mal. (Kum 39:9) Si no misti tene un amisadi intimu ku Jeova, no pirsisa di ranja tempu pa ora i studa si Palabra. Asin no amisadi ku el na torna mas forti. Ora ku no tene un amisadi intimu ku Jeova, suma José, no ka na misti fasi nada ku na pul pa i fika mal. — Tiagu 4:8.

15. Ke ku no pudi aprindi di ke ku kontisi ku israelitas na lala? (Ebreus 3:12)

¹⁵ Kilis ku diskisi di kuma Jeova i Deus bibu, pudi lestu ku disvia di si kamiñu. Jubi ke ku kontisi ku israelitas oca ke staba na lala. E sibi di kuma Jeova izisti, ma e kumsa ku duvida si kontra i pudi da elis ke ke pirsisaba del. Te mesmu e punta: ‘Nta Jeova sta na no metadi o nau?’ (Sai 17:​2, 7) Dipus e rebela kontra Deus. Sin duvida, no misti ivita es mau isemplu. — Lei Ebreus 3:12.

16. Ke ku pudi testa no fe?

 ¹⁶ Jintis di mundu ta pui pa i difisil pa no kontinua sedu amigu di Deus. Manga delis ta nega di kuma Deus ten. Manga di bias, kilis ku ta dispresa ke ku Deus misti pa no fasi, ta parsi di kuma e tene un bon vida. Ora ku no oja es na kontisi, no fe pudi testadu. No fia kuma Deus ten, ma no pudi kumsa ku duvida si kontra i na judanu. Skirbidur di Salmu 73 cigaba di sinti di mesmu manera. I nota di kuma kilis ku ka ta rispita leis di Deus, kontinua tene un bon vida. Kila lebal kumsa ku duvida si kontra i bali pena sirbi Deus. — Sal 73:​11-13.

17. Ke ku na judanu kontinua sedu amigus di Jeova?

¹⁷ Ke ku juda salmista muda si manera di pensa? I pensa fundu na ke ku na kontisi ku kilis ku diskisi di Jeova. (Sal 73:​18, 19, 27) I pensa tambi na bensons ku no ta tene di sirbi Jeova. (Sal 73:24) Anos tambi no pudi pensa fundu na bensons ku no risibi di Jeova. Imaẑina kuma ku no vida na seduba diferenti si no ka ta sirbiba Jeova. Fasi es pudi judanu kontinua fiel, i fala suma salmista: “Ma pa mi, i bon pa N pertu Deus.” — Sal 73:28.

18. Pabia ku no ka pirsisa di medi futuru?

¹⁸ No pudi nfrenta kualker purblema duranti fin de tempu, pabia no sta na “sirbi Deus bibu, Deus di bardadi”. (1 Tes 1:9) No Deus ta preokupa ku nos i sempri i na judanu. I staba ku si servus na pasadu, tambi i sta ku nos aos. I ka na tarda, no na bin pasa un foronta mas garandi ku nunka ciga di ojadu na Tera. Ma no ka na sta anos so. Jeova na sta ku nos. (Isa 41:10) Pa anos tudu no “fala ku fiansa: ‘Siñor i ña Judadur; N ka na medi.’” — Eb 13:​5, 6.