1. Kal lison nkoraẑanti ku Jeova nsina Abraon?

 I SEDUBA un kombersa ku Abraon nunka ka na ciga di diskisi. Deus usaba un anju pa fala Abraon di kuma, i na kaba ku sidadis di Sodoma ku Gomora. Es omi fiel fikaba preokupadu. I punta: “Bu na kaba ku justus juntu ku jintis mau? . . . Nta Juis di tudu mundu i ka ta fasi kusa diritu?” Ku pasensa, Jeova juda si amigu ki gosta ciu del pa i aprindi un lison importanti: Deus ka na kaba nunka ku jintis bon. Es lison ta judanu i animanu. — Kum 18:​23-33.

2. Kal sertesa ku no tene di kuma ora ku Jeova na julga jintis, i ta fasil sempri ku justisa i ku miserikordia?

² Kal sertesa ku no tene di kuma ora ku Jeova na julga jintis, i ta fasil sempri ku justisa i ku miserikordia? Pabia no sibi di kuma, Jeova “ta jubi korson” di jintis. (1 Sam 16:7) Na bardadi, i “kunsi korson di tudu jinti.” (Anos ku pui letras karegadu ku italiku; 1 Re 8:​38, 39; 1 Kron 28:9) Es i un bardadi importanti. Jeova mas nos jiru, pa kila, i ka tudu ora ku no pudi ntindi diritu motivu ku pui i toma sertus disisons. E ku manda apostolu Paulu nspiradu pa punta aserka di Jeova Deus: “Kin ku pudi splika kusas ki disidi?” — Rom 11:33.

3-4. Kal purguntas ku utrora no pudi fasi i ke ku no na bin fala del nes studu? (Jon 5:​28, 29)

³ Mesmu manera ku no sibi di kuma Jeova sempri ta fasi ke ki sertu, no pudi tene purguntas suma kilis ku Abraon fasiba. Te mesmu no pudi punta: ‘Sera ki jintis ku Jeova kaba ku el, suma jintis di Sodoma ku Gomora,  pudi lantandadu pa vivi mas? Sera ki i pusivel pa alguns delis fasi parti di “resureison di . . . maus”?’ — At 24:15.

⁴ No jubi ke ku no ntindi aserka di resureison. I ka tarda, no ntindi diritu ke ku signifika “lanta pa vida” ku “lanta pa kondenason.” a (Lei Jon 5:​28, 29.) Es ntindimentu lebanu pa utru mudansas ku no na fala del nes studu i na kil ku na bin. Aserka di julgamentus ku Jeova ta fasi ku justisa, no na fala di ke ku no ka sibi, dipus, no na fala di ke ku no sibi.

KE KU NO KA SIBI

5. Ke ku no publikasons falaba del aserka di jintis ku Jeova kaba ku el na Sodoma ku Gomora?

⁵ Na pasadu, no publikasons falaba di kuma jintis ku Jeova kaba ku el, suma kilis di Sodoma ku Gomora, ka na lantandadu. Ma, dipus di servu jiru di fiansa studa diritu i fasi orasons, e lebadu na fasi es purgunta: Sera ki no pudi fala kila ku tudu sertesa?

6. (a) Kal ki alguns isemplus di julgamentu di Jeova kontra jintis mau? (b) Ke ku Biblia ka kontanu?

⁶ I ten manga di storias di Biblia ku fala di julgamentus di Jeova kontra jintis mau. Pur isemplu, Jeova kaba ku tudu jintis na diluviu, menus Noe ku si familia. Tambi i usa israelitas pa kaba ku seti nasons ku staba na vivi na Tera di Purmesa. Jeova usaba tambi un anju pa mata 185 mil tropas asirius na un noti. (Kum 7:23; Lei 7:​1-3; Isa 37:​36, 37) Sera ki Biblia danu tudu informason ku na mostra di kuma, Jeova disidi kaba ku kada un des jintis di un bias pa sempri, sin speransa di resureison? Nau. I ka danu tudu informason. Pabia ku no pudi fala kila?

7. Ke ku no ka sibi aserka di jintis ku muri na diluviu o di kilis ku muri oca israelitas konkista tera di Kanaan? (Jubi diseñu .)

⁷ Mesmu manera ku no sibi di kuma Jeova kaba ku tudu es jintis, no ka sibi kuma ki oja kada un delis. Tambi no ka sibi si kontra kilis ku matadu, teneba oportunidadi di aprindi aserka di Jeova i ripindi. Na tempu di diluviu, Biblia fala di kuma Noe “konta jinti kuma e dibi di yanda diritu”. (2 Ped 2:5) Ma, i ka fala di kuma, oca ki na kumpu barku garandi, i tenta tambi konta kada algin di kuma, i na bin cuba garandi ku na dana tudu. Di mesmu manera, no ka sibi si tudu jintis mau ku moraba na Kanaan, teneba oportunidadi di aprindi aserka di Jeova i muda se manera di vivi.

8. Ke ku no ka sibi aserka di jintis di Sodoma ku Gomora?

⁸ Ke gora di jintis ku matadu, oca Jeova kaba ku Sodoma ku Gomora? Un omi justu comadu Lo moraba na se metadi. Ma, sera ki no sibi si Lo prega elis tudu? Nau. E seduba mau, ma sera ki kada un delis sibiba ke ki sertu ku eradu? Lembra di kuma manga di omis di ki sidadi mistiba viola ospris di Lo. Biblia fala di kuma es manga di omis seduba “desdi rapasis te bejus”. (Kum 19:4; 2 Ped 2:7) Sera ki na bardadi no sibi si Jeova, Deus ku ta mostra miserikordia, kondena kada un delis sin speransa di resureison? I bardadi di kuma, te mesmu i ka tenba des omis justu na ki sidadi. (Kum 18:32) E seduba mau i Jeova teneba rason di kaba ku elis. Ma, sera ki no pudi fala ku tudu sertesa di kuma, nin un  delis ka na lantandadu na “resureison di . . . maus”? Nau, no ka pudi fala kila ku tudu sertesa!

9. Ke ku no ka sibi aserka di Salomon?

⁹ Biblia fala tambi di jintis ku seduba bon, ma ku dipus bin sedu mau. Rei Salomon i un isemplu di kila. I nsinaduba diritu kamiñu di Deus i Jeova bensual ciu. Ma, mas tardi i bin ta adora deusis falsu. Si pekadus pui pa Jeova paña raiba i nason di Israel sufri pa manga di anus. Pa manga di anus, no ta pensaba di kuma Salomon na bin lantadadu. Motivu ku pui no ta pensaba asin i pabia, Biblia fala di kuma Salomon “bin diskansa, i nteradu na prasa di si pape Davi.” Biblia fala tambi di mesmu kusa pa jintis fiel ku muri, suma pur isemplu rei Davi. (1 Re 11:​5-9, 43; 2 Re 23:13) Ma sera ki manera ki nteradu ta da garantia di kuma i na bin lantandadu? Biblia ka fala kila. Alguns pudi pensa di kuma Salomon na bin lantandadu, pabia Biblia fala di kuma “kil ku muri i sta ja libri di pekadu.” (Rom 6:7) Ma es ka signifika di kuma tudu kilis ku muri na bin lantandadu, suma si kontra e tene diritu di bin vivi mas. Resureison i un prenda di no Deus ku amanu. I ta dal pa kilis ki misti da oportunidadi di sirbil pa sempri. (Jo 14:​13, 14; Jon 6:44) Sera ki Salomon na risibi es prenda? So Jeova ku sibi resposta, anos no ka sibi. Ma, no sibi di kuma Jeova na fasi ke ki justu.

KE KU NO SIBI

10. Kuma ku Jeova ta sinti ku mortu di jintis? (Ezekiel 33:11) (Jubi tambi diseñu.)

¹⁰ Lei Ezekiel 33:11. Jeova kontanu kuma ki ta sinti aserka di julga jintis. Apostolu Pedru skirbi mesmu kusa ku Ezekiel. I fala di kuma, Jeova “ka misti pa ningin pirdi.” (Anos ku pui letras karegadu ku italiku; 2 Ped 3:9) Es palabras ta konsolanu. No sibi di kuma Jeova ka ta lestu pa kaba ku un algin pa sempri. I ta mostra miserikordia garandi, tambi i ta mostral kada bias ki pusivel.

11. Ba kin ku ka na lantandadu, i kuma ku no sibi kila?

¹¹ Ke ku no sibi aserka di jintis ku ka na lantandadu? Biblia fala so di alguns delis. b Jesus mostra di kuma Judas Iskariotis ka na lantandadu. (Mar 14:21; jubi tambi Jon 17:12 ku nota di studu.) Judas sibiba di kuma ke ki fasi i kontra Jeova ku si Fiju. Ma mesmu asin, i fasil. (Jubi Markus 3:29 ku notas di studu.) Di mesmu manera, Jesus falaba di kuma alguns ŝefis riliẑiosu ku staba kontra el na muri sin speransa di resureison. (Mat 23:33; jubi Jon 19:11 ku nota di studu “o homem.”) Tambi apostolu Paulu avisa apostatas ku ka ripindi di kuma, e ka na bin lantandadu. — Eb 6:​4-8; 10:29.

12. Ke ku no sibi aserka di miserikordia di Jeova? Bu pudi da isemplus.

¹² Ma, ke ku no sibi aserka di miserikordia di Jeova? Kuma ki mostra di kuma i “ka misti pa ningin pirdi”? Jubi isemplu di kuma ki mostra miserikordia pa alguns jintis ku fasiba pekadus gravi. Rei Davi fasi pekadus gravi. Pur isemplu, i kai cai, tambi i mata algin. Ma, Davi ripindi, Jeova mostra miserikordia i purdal. (2 Sam 12:​1-13) Kuas na tudu si vida, rei Manasés fasi manga di kusas meduñu. Ma, mesmu kes kusas meduñu,  Jeova mostra miserikordia i purda Manasés, pabia i ripindi. (2 Kron 33:​9-16) Es isemplus ta lembrantanu di kuma, Jeova ta mostra miserikordia kada bias ki oja di kuma i tene motivu di fasil. I na bin lantanda es jintis, pabia e nota di kuma e fasi pekadus gravi i e ripindi.

13. (a) Pabia ku Jeova mostra miserikordia pa ninivitas? (b) Ke ku Jesus bin fala mas tardi aserka di ninivitas?

¹³ No sibi tambi di miserikordia ku Jeova mostra pa ninivitas. Deus fala Jonas aserka di Ninive: “Konta kusa ku Deus fala kontra el, pabia se maldadi subi tok i ciga ña dianti.” Ma, oca e ripindi di se pekadus, Jeova purda elis ku bondadi. I mostra miserikordia garandi, mas di ki Jonas. Jonas staba ku raiba i Jeova lembrantal di kuma ninivitas “ka kunsi se mon direita nin skerda”. (Jona 1:​1, 2; 3:10; 4:​9-11) Mas tardi, Jesus usa ki isemplu pa nsina aserka di justisa ku miserikordia di Jeova. Jesus fala di kuma ninivitas ku ripindi na bin lantandadu “na dia di julgamentu”. — Mat 12:41.

14. Ke ku “lanta pa kondenason” o julgamentu na signifika pa ninivitas?

¹⁴ Ma, ke ku signifika ‘jinti di Ninive na bin lanta na dia di julgamentu’? Jesus staba na fala di tempu ku jintis na bin “lanta pa kondenason” o julgamentu. (Jon 5:29) I staba na fala di si Renansa di Mil Anu, nunde ku “bons ku maus” na bin lantandadu. (At 24:15) Jintis mau na bin “lanta pa kondenason” o julgamentu. Es signifika di kuma, dipus ke lantandadu, Jeova ku Jesus na jubi diritu si kontra e na obdisi i aplika kusas ke aprindi. Si un ninivita nega adora Jeova, i ka na pirmitidu kontinua vivi. (Isa 65:20) Ma, tudu kilis ku disidi sirbi Jeova ku fidelidadi, e na tene oportunidadi di vivi pa sempri! — Dan 12:2.

15. (a) Pabia ku no dibi di ivita fala di kuma, kilis ku kabadu ku el na Sodoma ku Gomora ka na lantandadu? (b) Ke ku Judas misti fala ku si palabras ku sta na Judas 7? (Jubi kuadru “ Ke ku Judas misti fala?”)

¹⁵ Oca Jesus staba na papia di jintis di Sodoma ku Gomora, i fala di kuma “na dia di juisu”, i na sedu mas  fasil pa relis di ki pa jintis ku negal i ku nega si nsinus. (Mat 10:​14, 15; 11:​23, 24; Luk 10:12) Ke ki misti fala? No pudi pensa di kuma Jesus staba na usa un komparason izaẑeradu nes mumentu. Ma i ka kila ki staba na usa. Nin i ka kila ki usa oca i na papiaba di ninivitas. En ves di kila, i parsi di kuma Jesus staba na papia di jintis di Sodoma ku Gomora sin usa komparason. “Dia di juisu” ki falaba del oca ki na papia di Sodoma ku Gomora, i mesmu ku “dia di julgamentu” ki falaba del oca ki na papia di ninivitas. Suma ninivitas, jintis di Sodoma ku Gomora ta fasiba tambi mau kusas. Ma ninivitas teneba oportunidadi di ripindi. Lembra tambi di ke ku Jesus fala aserka di kilis ku na “lanta pa kondenason.” “Kilis ku fasi mal” na fasi parti di jintis ku na bin lantandadu. (Jon 5:29) Pa kila, i parsi di kuma i ten algun speransa pa jintis di Sodoma ku Gomora. I pudi sedu di kuma, pelu menus alguns des jintis na lantandadu, i no pudi tene oportunidadi di nsina elis aserka di Jeova ku Jesus Kristu!

16. Ke ku no sibi aserka di kuma ku Jeova na disidi kin ki i na bin lantanda? (Jeremias 17:10)

¹⁶ Lei Jeremias 17:10. Es versikulu judanu sibi kuma ku Jeova ta julga: Jeova sempri ta ‘rabista korson i spurmenta pensamentus.’ Ora ki disidi kin ki na lantanda, i na “paga kada algin konformi si manera di yanda”. Asin, ora ku Jeova na disidi si i na lantanda un algin o nau, i ta sigi sempri si normas di justisa, ma tambi i ta sta pruntu pa mostra miserikordia kada bias ki ten basi di fasil. Pa kila, no ka dibi di fala nunka di kuma, un algin ka na lantandadu, so si no sibil pabia Biblia fala di kuma i na sedu asin!

“JUIS DI TUDU MUNDU” NA “FASI KUSA DIRITU”

17. Ke ku na bin kontisi ku pekaduris ku muri?

¹⁷ Disna ku Adon ku Eva junta ku Satanas i e rebela kontra Jeova Deus, bilions di jintis muri ja. Mortu i “inimigu” garandi ku mata manga di jintis! (1 Kor 15:26) Ke ku na bin kontisi ku tudu ki  jintis? Un numeru pikininu di 144.000 sigiduris fiel di Kristu na bin lantandadu pa vivi na seu, i e ka na muri mas. (Apok 14:1) Manga di omis ku minjeris fiel ku ama Jeova, na bin lantandadu na “resureison di . . . bons” i e na vivi pa sempri na Tera, si e kontinua sedu bon duranti Renansa di Mil Anu di Kristu ku ultimu testi. (Dan 12:13; Eb 12:1) Tambi duranti Mil Anu, “maus” ku nklui kilis ku nunka ciga di sirbi Jeova o te mesmu e “fasi mal”, na dadu oportunidadi di muda se manera di vivi i sedu servus fiel di Jeova Deus. (Luk 23:​42, 43) Ma, i ten pekaduris mau dimas i ku disidi rebela kontra Jeova, pa kila, Jeova disidi di kuma e ka na ciga di lantandadu. — Luk 12:​4, 5.

18-19. (a) Pabia ku no pudi tene sertesa aserka di julgamentu di Jeova pa kilis ku muri? (Isaias 55:​8, 9) (b) Ke ku no na fala del na studu ku na bin?

¹⁸ Sera ki no pudi tene sertesa di kuma ora ku Jeova na julga jintis, sempri i ta toma bon disison? Sin! Suma ku Abraon ntindi diritu, Jeova i “Juis di tudu mundu”, i perfeitu, i mas jiru, i ta mostra miserikordia. I trena si Fiju i dal otridadi di julga tudu jintis. (Jon 5:22) Tantu Pape suma Fiju pudi sibi ke ku sta na korson di kada pekadur. (Mat 9:4) Pa kila ora ke julga un algin, e ta fasi sempri ke ki “diritu”!

¹⁹ Pa no disidi konfia na Jeova i na tudu disisons ki ta toma. No rikuñisi di kuma no ka tene kapasidadi pa julga, ma Jeova tene ki kapasidadi! (Lei Isaias 55:​8, 9.) E ku manda no disa pa Jeova ku si Fiju julga tudu jintis. Tambi no sibi di kuma no Rei Jesus, na kopia justisa ku miserikordia di si Pape di manera perfeitu. (Isa 11:​3, 4) Ma, ke ku no pudi fala aserka di kuma ku Jeova ku Jesus na julga jintis na garandi tribulason? Ke ku no ka sibi? I ke ku no sibi? Na studu ku na bin, no na ruspundi es purguntas.