STUDU 20
KANTIKU 67 Eu Vou Pregar!
Kontinua prega pabia di amor!
“I pirsis pa Bon Noba kontadu pa tudu rasa.” — MAR 13:10.
KE KU NO NA BIN APRINDI
Kuma ku amor ta lebanu prega ku animu i ku tudu no korson.
1. Ke ku no aprindi na runion anual di 2023?
NA RUNION anual di 2023, a no risibi nobu ntindimentus interesanti na alguns kusas ku no fia nel, tambi no obi anunsius interesanti aserka di pregason. Pur isemplu, no aprindi di kuma alguns jintis pudi tene oportunidadi di sta na ladu di povu di Jeova, mesmu dipus ku Garandi Babilonia kabadu ku el. No aprindi tambi di kuma apartir di Novembru di 2023, publikaduris di Renu ka pirsisa mas di ntrega relatoriu di tudu se atividadis di pregason. Sera ki es mudansas misti fala di kuma, no tarbaju di pregason tene puku importansia o i ka muitu urẑenti suma antis? Klaru ki nau!
2. Pabia ku no tarbaju di pregason ta sedu mas urẑenti kada dia ku sol na mansi? (Markus 13:10)
2 Kada dia ku sol na mansi, no tarbaju di pregason ta sedu mas urẑenti. Pabia di ke? Pabia i ka sobra manga di tempu antis di fin ciga. Jubi ke ku Jesus falaba aserka di tarbaju di pregason na fin des tempu. (Lei Markus 13:10.) Di akordu ku ke ku Mateus skirbi, Jesus fala di kuma, bon noba na pregadu na tudu mundu antis di “fin” ciga. (Mat 24:14) Es palabra na trata di fin kompletu di mundu mau di Satanas. Jeova fiksa ja “dia ku ora” ku es kusas na kontisi, nin i ka na tarda. (Mat 24:36; 25:13; At 1:7) Kada dia ku pasa, no mas na pertusi di ki tempu. (Rom 13:11) Nkuantu ki tempu ka ciga, no dibi di kontinua prega.
3. Ke ku ta lebanu prega?
3 Ora ku no na pensa na pregason, i bon pa no fasi no kabesa es purgunta importanti: Pabia ku no ta prega bon noba? I pabia di amor. Ora ku no na prega, no ta mostra no amor pa bon noba, amor pa jintis, i mas importanti, amor pa Jeova i pa si nomi. No papia di kada un delis.
NO TA PREGA PABIA NO AMA BON NOBA
4. Kuma ku no ta aẑi ora ku no risibi un bon noba?
4 Sera ki bu lembra di kuma ku bu sinti, oca ku bu risibi un bon noba, talves un algin di bu familia padi o bu oca tarbaju ku bu pirsisa del? Sin duvida, bu na kontenti di konta es bon noba pa bu familia ku amigus. Sera ki i mesmu kusa ku kontisi oca ku bu obi noba mas minjor di ki tudu nobas, ku sedu, bon noba di Renu di Deus?
5. Kuma ku bu sintiba oca ku bu kumsa aprindi bardadi ku sta na Palabra di Deus? (Jubi tambi fotos.)
5 Pensa na kuma ku bu sintiba, oca ku bu kumsa aprindi bardadi ku sta na Palabra di Deus. Bu aprindi di kuma bu Pape ku sta na seu amau, i misti pa bu fasi parti di si familia di adoraduris, i purmiti kaba ku dur ku sufrimentu, tambi bu pudi tene speransa di oja kilis ku bu ama ku muri lanta, pa vivi na nobu mundu. Bu aprindi tambi manga di utrus kusas. (Mar 10:29, 30; Jon 5:28, 29; Rom 8:38, 39; Apok 21:3, 4) Es bardadis ku bu aprindi toka bu korson. (Luk 24:32) Bu ama ke ku bu aprindi, i bu misti konta tudu jintis es bardadis importanti! — Komparal ku Jeremias 20:9.
Oca ku bu obi bon noba, bu misti konta tudu jintis es bardadis importanti! (Jubi paragrafu 5)
6. Ke ku bu aprindi di spriensia di Ernest ku Rose?
6 Jubi es spriensia. Un ermon comadu Ernest b teneba des anu kontra si pape muri. Ernest fala sin: “N puntaba ña kabesa: ‘Sera ki i bai pa seu? O sera ki i muri di un bias?’ N ta nveẑaba utrus mininus ku teneba papes.” Ernest ta baiba sempri simiteriu, i ta finka juju na koba di si pape i ta ora asin: “Di fabur, Deus, N misti sibi nunde ku ña pape sta.” Serka di 17 anu dipus ku si pape muri, Ernest kumbidadu pa studa Biblia, i seta logu. I fikaba kontenti dimas di aprindi di kuma, kilis ku muri ka sibi nada, i suma se sta na un sonu fundu, i Biblia purmiti di kuma e na bin lantandadu na futuru. (Ekl 9:5, 10; At 24:15) Pa fin, i konsigi oja respostas pa si purguntas ki teneba pa manga di anus! Ernest kontentiba dimas ku bardadis di Biblia ki staba na aprindi. Si minjer, Rose, kumsa ku studa Biblia i gosta ciu di ke ki staba na aprindi. E batisa na 1978. E kontentiba dimas di konta ke ke fia nel pa se familia, se amigus i ku utrus ku misti sukuta elis. Pabia di kila, Ernest ku Rose konsigi juda mas di 70 jintis pa e kunsi Jeova i batisa.
7. Ke ku ta kontisi ora ku amor ku no tene pa bardadis di Biblia toka no korson? (Lukas 6:45)
7 Ora ku no ama bardadis di Biblia, no ta misti kontal pa tudu jintis. (Lei Lukas 6:45.) No ta sinti suma disipulus di Jesus di purmeru sekulu ku fala sin: “No ka pudi disa di fala kusa ku no oja, ku no obi.” (At 4:20) No ama bardadis di Biblia ciu, e ku manda no misti kontal pa manga di jintis ku no pudi.
NO TA PREGA PABIA NO AMA JINTIS
8. Pabia ku no misti konta utrus bon noba? (Jubi kuadru “ Amor Na Judau Fasi Disipulus.”) (Jubi tambi foto.)
8 No ama jintis, suma ku Jeova ku si Fiju ama jintis. (Dit 8:31; Jon 3:16) No ta sinti pena garandi pa kilis ku sta “sin Deus” i ku sta “sin speransa”. (Ef 2:12) Pabia di se purblemas, e pudi sta suma si e sta na un koba fundu. Ma anos no tene korda ku pudi tira elis di la, ku sedu, bon noba di Renu di Deus. Pabia di amor ku pena ku no tene pa relis, no misti fasi tudu ku no pudi pa konta elis bon noba. Es mensaẑen ku tene balur pudi da elis speransa, juda elis tene filisidadi desdi gosi, i da elis oportunidadi di tene “vida di bardadi”, ku sedu, vida ku ka ta kaba na nobu mundu di Deus. — 1 Tim 6:19.
Pabia di amor ku pena ku no tene pa jintis, no misti fasi tudu ku no pudi pa konta elis bon noba. (Jubi paragrafu 8)
9. Kal avisu ku no sta na da aserka di futuru, i pabia di ke? (Ezekiel 33:7, 8)
9 No amor pa jintis ta lebanu tambi avisa elis di kuma, fin des mundu mau pertu ja. (Lei Ezekiel 33:7, 8.) No ta sinti pena di jintis, nkluindu no familia ku ka ta sirbi Jeova. Manga di jintis ta vivi se vida sin sibi di kuma, i na bin un “garandi foronta suma nunka i ka ten disna di kumsada di mundu te aos, nin nunka mas i ka na ten.” (Mat 24:21) No misti pa e sibi ke ku na bin kontisi na tempu di julgamentu. Purmeru, riliẑions falsu na kabadu kel, dipus tudu mundu mau na kabadu kel na Armajedon. (Apok 16:14, 16; 17:16, 17; 19:11, 19, 20) No na ora pa manga di jintis seta es avisu, i pa e disidi sirbi Jeova juntu ku nos. Ma ke gora di kilis ku ka misti sukutanu gosi, nkluindu no familia ku no ama?
10. Pabia ki urẑenti pa no kontinua avisa jintis aserka di ke ku na bin kontisi?
10 Suma ki splikadu na studu ku pasa, i pudi sedu kuma Jeova misti salba jintis ku kumsa mostra fe nel, ora ke oja Garandi Babilonia kabadu ku el. Si sedu asin, i urẑenti dimas pa no kontinua avisa jintis aserka di ke ku na bin kontisi. Pensa nes: E pudi bin lembra di ke ku no fala elis gosi. (Komparal ku Ezekiel 33:33.) Talves e na lembra di avisu ku no da elis, i kila pudi leba elis junta ku nos na adorason di bardadi, antis di sedu tardi dimas. Suma guarda di prison na Filipus ku muda so dipus ku “con tirmi ku forsa”, talves alguns ku ka seta no mensaẑen gosi, pudi muda ora ke oja Garandi Babilonia kabadu ku el. — At 16:25-34.
NO TA PREGA PABIA NO AMA JEOVA KU SI NOMI
11. Kuma ku no ta da Jeova gloria, rispitu ku puder? (Apokalipsi 4:11) (Jubi tambi fotos.)
11 Motivu mas importanti ku pui no ta prega bon noba, i pabia no ama Jeova Deus ku si nomi santu. No ta oja no pregason suma un manera di ngaba Deus ku no ama. (Lei Apokalipsi 4:11.) Di tudu korson, no konkorda ku es palabras: ‘O Jeova no Deus! Bu mersi risibi gloria, rispitu ku puder’. No ta dal gloria ku rispitu ora ku no mostra utrus prova klaru di kuma i el ku “kumpu tudu kusa”, i no sta bibu pabia i el ku danu vida. No ta dal puder, ku sedu no puder, ora ku no usa no tempu, no forsa ku kusas ku no tene pa prega konformi no situason. (Mat 6:33; Luk 13:24; Kol 3:23) Pa rusumi: No gosta di papia ku utrus aserka di Deus ku no ama. Tambi no ta sinti motivadu pa konta utrus aserka di si nomi i kal tipu di Deus ki i sedu. Pabia ku no ta fasi kila?
No ta da Jeova no puder, ora ku no usa no tempu, no forsa ku kusas ku no tene pa prega konformi no situason. (Jubi paragrafu 11)
12. Kuma ku no ta santifika nomi di Jeova na pregason?
12 No amor pa Jeova ta lebanu pa santifika si nomi. (Mat 6:9) Es signifika kuma no misti konta utrus di kuma, mintida ku Satanas konta kontra Jeova i ka bardadi. (Kum 3:1-5; Jo 2:4; Jon 8:44) Ora ku no na prega, no ta tene vontadi garandi di konta tudu jintis ku misti sukuta, bardadi aserka di Jeova i kal tipu di algin ki sedu. No misti pa tudu jintis sibi di kuma, si manera di sedu mas garandi i amor, si manera di manda i justu, i ka na tarda, si Renu na kaba ku tudu sufrimentu i tisi pas ku filisidadi pa pekaduris. (Sal 37:10, 11, 29; 1 Jon 4:8) Ora ku no difindi nomi di Jeova na pregason, no ta santifika si nomi. No ta kontenti di sibi di kuma no sta na fasi kusas suma Tustumuñas di Jeova ku no sedu. Pabia ku no pudi fala kila?
13. Pabia ku no kontenti di comadu Tustumuñas di Jeova? (Isaias 43:10-12)
13 Jeova comanu di si “tustumuñas”. (Lei Isaias 43:10-12.) Alguns anus atras, un karta di Korpu Guvernanti fala sin: “Privileẑiu mas garandi ku un algin pudi tene i di comadu di Tustumuña di Jeova.” Pabia ku no pudi fala es? Jubi un isemplu. Si bu pirsisa di un algin pa sedu bu tustumuñu na un tribunal, bu na kuji un algin ku bu kunsi diritu, i ku bu konfia nel, i ku tene bon nomi i ku utrus pudi konfia nel. Manera ku Jeova kujinu pa sedu si Tustumuñas, ta mostra di kuma Jeova kunsinu diritu, tambi i konfia di kuma no na konta utrus kuma, el i uniku Deus di bardadi. No ta sinti di kuma Jeova danu balur garandi, manera ku no sedu si Tustumuñas. Pa kila, no ta apruveita tudu oportunidadi di fasi utrus kunsi si nomi, i mostra di kuma manga di mintidas ku kontadu aserka del i ka bardadi. Des manera, no ta fasi ke propi ku no nomi fala no dibi di fasi, ku sedu, Tustumuñas di Jeova! — Sal 83:18; Rom 10:13-15.
NO NA KONTINUA PREGA TE FIN
14. Kal kusas interesanti ku na bin kontisi nin i ka na tarda?
14 No sta ku presa di bin oja kusas interesanti ku na bin kontisi nin i ka na tarda! Ku bensons di Jeova, no na spera oja manga di jintis seta bardadi antis di garandi tribulason kumsa. Tambi, no ta kontenti dimas di sibi di kuma, mesmu na tempu mas difisil ku ka ciga di ojadu, ku sedu garandi tribulason, manga di jintis na sai di mundu di Satanas i junta ku nos pa ngaba Jeova! — At 13:48.
15-16. Ke ku no dibi di kontinua fasi, i te kal tempu?
15 Nes mumentu, no tene tarbaju di fasi. No tene privileẑiu di prega bon noba di Renu di Deus na tudu mundu, un tarbaju ku nunka ka na ripitidu. Na mesmu tempu, no dibi di kontinua avisa jintis aserka di ke ku na bin kontisi nin i ka na tarda. Jintis pirsisa di sibi di kuma, fin des mundu mau sta na pertusi kaba bias mas. Asin, ora ku tempu di julgamentu ciga, e na sibi di kuma, mensaẑen ku no ta pregaba bin di Jeova Deus. — Eze 38:23.
16 Pa kila, ke ku no dibi di sta disididu pa kontinua fasi? No na kontinua prega ku vontadi garandi, ku urẑensia i ku animu garandi, te ora ku Jeova fala: “I justa!” No na fasil pabia di amor: Amor pa bon noba, amor pa jintis, i mas importanti, amor pa Jeova i pa si nomi.
KANTIKU 54 “Este É o Caminho”
a Runion anual fasidu dia 7 di Otubru di 2023, na Salon di Asembleia di Tustumuñas di Jeova di Newburgh na Nova York, Stadus Unidu di Amerika. Programa kompletu mostradu na JW Broadcasting®. Parti 1 mostradu na Novembru di 2023 i parti 2 mostradu na Janeru di 2024.
b Jubi artigu “A Bíblia muda a vida das pessoas — Fiquei impressionado com as respostas da Bíblia”, publikadu na Sintinela di 1 di Fevereru di 2015.